Geschichde vunn Dehääm

Unser Paulche is e goldisch Katz so klä un frech, en ääfach sießer Schatz
Der weckt uns frieh um fimfe uff, kratz an de Dier un springt uffs Bett enuff
Gebt eher donn kä Ruh bis ich die Aache öffne du.

Drauss in de Kich bin ich dann Doseöffner fer den Racker
Der schlaacht de Bauch sich voll un macht sich dann vumm Acker
De ganze Daach ward der nicht mehr gesähn,
erscht Owens kummder widder häm.

Wonns dungel werd hockt der schunn for de Schduwwedär, so als Godderschprich, wann kummen eer....
dort drin steht jo soin Schoggelschduhl, do schlooft er dann
un Frieh um fimfe fangt des Ganse dann vunn forre an......

 

 

Die Hääd is nor so en kläne Vorort in de Nordpalz. Dort gebts heid ca 165 Haushalte mit umdie 400 Inwohner, un ääner dodefunn war ich bis 1970. 

 

Drowwe uff de Owwerhääd hodds ä Geschäft gewwe, dort hott mer alles kaafe känne un, es war aach Raatschplatz. Wer die Neiischkeide wisse wolld, der hot nore enuff ins Engemanns/Burschderfers gehe misse.

Getroffe hot mer dort jo immer Jemand. Mudder un Dochder hunn im Lade verkaaf un de Herr Engemann, der hots Brot geback.

Im Lade un hinne in de Backschdubb hotts immer sooooooo gut geroch.

Mir Dehääm hadden jo noch Kornäcker -  wars Erbdäl moiner Mamme vunn ährm Vadder.. Des Korn is drunne in de Miehl gemahl worr un vunn dem Mehl hot de Herr Engemann dann Brot geback. Solang bis des Mehl all war hot en Dreipinder alle Woch, nore de Backerlohn gekoschd. Ab dann hummers Brot misse ganz bezahle.

Äämol, ich kunnt mich ned beherrsche un hunn des Knerzje abgebiss. Dehääm hunn ich gesaat, es wärs Burschderfers ehr Katz gewääs. Do war ebbes los, wie sich rausgeschdelld hott, dass dess geschwindelt war......

Des hatt schwer Sänge geb un ich hunn sowas nie werrer gemachd, awwer des hatt halt soooooooo gut geroch un aach geschmeckt.......

In unsrer Gass hot aach de Klaine Fillip gewohnt mit soiner Dochder. Er iss an zwä Schdegge gange un hot känne kaum noch enaus. 's Katrina hot in de Fabrik geschafft und so war der Fillip de ganse Daach allää.

Oikaaf hot die jo, awwer do warn hald aach so Sächelcher wu die ned hätt wisse solle......

Immer wonn de alt Fillip was gebraucht hot, Duwwak orrer e Schnäpsje, dann hodder uns Kinner geruuf. Her, horschemol...du kännsch mer mol ins Burschderfers gehe und Duwwak hole, hodder dann gesaat – du kriech ach was defor.

Merschdens hodder äm dann fuffzich Penning gebb, un des war dortmols viel Geld fer e Kind. Kä Wunner, dass mär uns drum geschdridde hunn, wer oikaafe gehe derf. Sogar gewärrfelt hummer, mit de Kligger, in e Kuhlche uff de Gass, un wer gewunn hod, der derft die fuffzich Penning kassiere.

Märschdens hunn mär Gutselcher dodefor kaaft,die sinn dann gedäält worre.

Ach was hatt der Mann soi Fräd, un mir Kinner immer was Sießes.

Manchmol hod die Fraa Burschderfer uns aach noch was exdra geschengt, ganz wiese gelaund war.

Moi Momme hot emol verzeelt, wiese vumm oikaafe kumme is -  die Fraa Burschderfer hätt im Lade de Leid verzeelt.... " Im Frieda soi Bu war do un hod e Brot gehol, ich wolldem e Gutsje schenge- was männener was der klä Borsch do gessat hot.... **Fraa Burschderfer, ich hunn Dehääm aach noch e Schwesterche**Alla, hunn ichem hald zwä Gutsjer gebb".....

Die Leid im Lade hädden all gelacht.

Des schääne war – der hod des Gutsje aach wärklich soim Schwesterche (also mir)  gewwe.

Die Zeidung getraa hot Sellemols moi Tande Ellfried. Bei Denne war vunn de Rhoipalz (Rheinpfalz) en blaue Kaschde form Haus g'schdann, dort hot en Fahrer Nachts die Zeidunge oig'gschlosse un die Tande Ellfried hot die Moijens um fünf ausgetraache. Äemol im Monat isse kassiere kumme.

For die Poschd hod die Fraa Schdols gesorcht. Die hadd e Schdübbche als Poschdschdell oigerichd, so mit allem drum un dro. Heer, die war dodedorch sogar Beamtin un krieht Heid schäne Rente.

Üwwerhaupt hunn so Sache, un aach die Ärwet uff de Äcker, Sellemols faschd alles die Fraue gemacht, un die Männer sinn schaffe gang, es Geld vediene.

Bauerei war dort schunn nämmie so. Zwä Bauere waren im Ort, wu mer soi frische Milch krieht hot. De Weiser Guschdaf un änner noch uff de Owwerhääd.

Hinkel hadden mer jo selwer drunne uff de Wiss, un manchmol hod moi Mamme Aier verkaaf un vunn däm Geld hoddse moim Babbe donn e Päckelche Duwwak un Bläätcher fer Zigarette se rolle, kaaft. Ich wääs noch, "Batavia" hot der gehääs un de Babbe hott sich dodriwwer richdich fräe känne..... 

De Weid, des war so en rischdische Bosseler, der hott alle Wäschmaschine reperiert, wonn was kabutt war.

En Korbmacher, in de Siedlung drowwe war aach do, der hot mär moin erschde Weirekorb gemach, wunnerschä. Nom Schulranze hunn ich niemäh was anneres genumm wie en Korb, fer zum schaffe geh ned, un fer insekaafe erschd Rechd ned und des is bis Heid noch ned annerschd.

De Schuhmacher is g'schdorwe wie ich noch e Kind war, so hott mer donn halt fer die Schuh flicke se losse, enunner in die Schdadt gemisst.

Jeder hot was gekännt un all hännse sich zammegeholfe wann ebbes war. 

Aus de Schdadt enaus, die drei Kilometer enuff, in die Hääd enin – das war

"Häämkumme"

schunn vunn ganz vorre, vumm Ortsofang o...... 

Gemietlich un nett, warn die Leit vunn de Hääd......

 

 

 

Ich hann emol e Bopp gehatt, jessas, war die schäe.

Giesela hot se g'hees, e lieb Gesicht und schtramme Bäe.

Im Scheesje han ich die gedrickt, die Frankestross bis ganz enuff.

Dort owwe hot se rausgederft. Am Waldrand bei de Ami hot de Hund gekläfft.

Märscht hot die Mamme was ins Scheesje neigesteckelt, des han ich do drowwe dann erausgewerkelt.

Mer han gespeelt,- uff rer Deck han mir gesesse, getrunke un ach was gegesse.

Ich han se gekämmt und Zepp geflecht un was hann ich uffbebasst dass die er Kläed nit dreckisch macht.

Manchmol, wann ich Heit dort owwe steh, denk ich an moi Giesela, was war moi Kindheit doch so schee.

Hach ja......

© Paelzermad 2006

's war beschdimmd so en Daach wie Heid, e bisje reenerisch un kiehl wars aach.

De Herrgodd do owwe had' grad nix zu due, 's warem eeelend langweilisch, also hodder sich hiegesetzt un die Weld geschaff.

Wierer ferdisch war, hodder sich des alles so betrachd .....mhhh...do fehld awwer ebbes....

"Ach, weeche was", saat er so fer sich, ich mach e paar Diere, so vun alle Sorde wu ich kenn, e paar"

Gedenkt, gedu, un schee waas, es hoddem direkt gefall. :-)

Die Diercher sinn uff dere Weld erumgewetzt, hunn minanner g'schpeelt un hadden ehri Freed.

So nooch un nooch hodder awwer gemerkt, dass do noch ebbes fehle duut.

Hie un her hodder üwwerleecht, was'er noch mache kennt.

Uff äeeemol issem ingefall.

Erumbebosselt un prowiert un schwubbs hadder en Mensch gebaud...*Mo (Mann)* hodderne gehäß....

E bisje Verschdand kennt nix schaade, dengt er so fer sich.... un gebd dem Mann e bisje vun "Kapierschem", ;-)

dodezu noch Kraft, weil ,der soll jo uff dere Weld alles rischde, all die schwere Sache mache kenne.

Ackerbau un Viehzucht hodderne gelernd un aach wie mer mid Werkzeig umgehd, wie mehr sich um die Diere kimmerd un aach dasser fer sich selwer Sorche kann.

Alla, des hot soweid jo alles geklabbt.

Ab un zu hod der Mann sich e bisje dabbisch drog'schdelld, do hods Herrgeddel emol e gewaldisches Dunnerkeil fahre geloss.....

awwer alla, hodd des Herrgeddle bei sich gedenkt, der werd des schun alles lerne mid de Zeid.

Jo...,un so hodderm e paar Daach zugeguggt.

"Ach du moi lieb's Herrgeddle vun Biewerach"  .........denne konn ich ned alläns uff dere Weld erumdabbe losse, des gehd ned lang gud un do hod der alles enunnergewerdschafd.

Ebbes muss bassiere, was du ich nore, was mach ich bloss....

Ich hunn do noch Verschdand iwwerisch, un aach vum Herz noch viel, un allerlei anner brauchbares aach.

Ich wärfel des jetzt eefach alles mol zusamme un gugg wasses gebt.....

So is dann noch en Mensch endschdanne – annerschd, awwer scheener.

Ach guggemoldohie dengt's Herrgeddle fer sich, wie schee un fer alles se gebrauche - des nenn ich jetzt *Fra(u)* 

Un so schuf's Herrgeddle die Fraa, dass die im Mann immer saa kann was er mache soll un wie -

un seitdem klabbts aach.....gelle

 

© Paelzermad 2006

 

Hällbeerzeid

In unsere Kinnerzeid muschden mir im Summer, nooch de Schul mit Hällbeere roppe.

Meescht waren's mäe Müdder zesamme, weil die Plätz, wos die schännschde un dickschde gewwe hot, waren dief im Wald, un als Grupp war mäer ääfach sicherer.

Die Müdder hadden Pausebrod un was fer se tringe debei.

Moi Briederche hods jo iwwerhaubd ned leire gekennt, die Hällbeerpliggerei, awwer die Momme, schlau wie se war, die hod uns jo immer was schäänes verschproche, wann mir fleissisch geroppt hunn.

Ich war jo aach ned grad wild druf, weil, on mich sinn jo die Schnooge so gange, ich war immer gonz verschdoche...Ich hätt siesses Blut, händ se immer g'saat.

Ach wann bloss dortmols fer Mädscher schunn Hosse gewwe hätt.

E Lichdung, wo alle Reechejacke, es Gescherr un Dasche ab'gschdellt worre sinn, is ausgesucht worre. Die Fraue hänn sich die Kanne um de Bauch gebunne, hänn e Zeid fer e Paus ausgemacht un hänn sich dann üwwer e großi Fläch verdeelt. Aach mer Kinner hunn uns schäne Plätzjer gesucht un mit roppe ogfang.

Hot Äeni en bsunnerschd scheene Platz gfunne, so hot ses de Onnere zugeruf.

Jeder vunn uns had jo soi eischenes Gescherr, wo die Beere neigeplickt worre sinn un wann des voll war, hann mir des ausgeleert in de große Äemer.

Die Momme hot in e grossi Blechmilchkann gerobbt. Die hat se aach mimme Bännel um ehren Bauch gebunne.

Ich hat e Blechtass mit Hengel, wie die hald Sellemols waren.

Midde in die Hällbeere hunn ich mich ningesetzt un geroppt un Ofangs hod des aach immer rischdich Schpass gemach.

Schdolz bin ich zu de Momme g'loffe, wann ich voll gehatt hunn – ich häers noch Heid, wie sie immer gsaat hot " Kumm Klennes, e Händsche voll bassd noch druff" un was hunn ich mich immer gefreet, wann ich ausleere gekennt hunn, weil, donn deerft ich was tringe, un ich hat immer Dorscht...**gg**

Die Buwe vunn de Tande Luwwis hännd oft versuchd zu beschummle. Die hänn Hällbeerlaab unne in die Becher geschdobbt und e paar Händscher voll Beere druff un hänn donn g'saat" guggemol, ich hunn voll"...awwer die Luwwis hotse immer verwischd....

Die Frau Weid war jo meescht aach mit roppe....ach, wie gut ich mich an die erinner.....

Des war e ziemlisch diggi Frau, awwer, die hod alle annere Müdder was vorgemachd em robbe. Schdunnelang is die gebiggt geloffe un hod mit zwäe Hänn gleichzeidisch gerobbd. So viel wie die Frau hod in de gleiche Zeid Känni geschaffd.

All händ se sich g'roocht wie die Frau Weid des macht, ohne dassrer's Kreiz abbrechd.

Mer Kinner hann nadeerlich vesuchd uns gescheseidich zu iwwertrumpe beim robbe un irschendwie is dodebei so en Nochmiddag aach schnell erum gange.

Jo... un donn war do jo aach noch die Sach mid denne Hällbeermänncher....

Mer hännd nadierlich die Geschichd dodefunn gekennd un allemol wann mer die Tasse augeleert hunn, hunn mer in denne große Äemer nochgeguggt, ob do noch alle Hällbeere drin waren, weil.....

Die Geschichd is jo drum gonge, dass Hällbeerpligger irschendwonn gemergt hann, dass die Äern in de Käerb immer wenischer worre iss, obwohl se doch immer dezugerobbt hunn.

Äns vunn de Kinner hot sich an de rand vumm Platz gesetzt un muschd die Kärb bewache.

Nix iss bassiert, awwer die Hällbeere waren werrer wenischer worre.

Hmmmm....alla hunn sich alle Kinner zesamme hiegesetzt, warn gonz leise un hunn uffgebasst. Un uff äemol.....

Unner de Hällbeerbüsch eraus sinn die Männcher gekroche kumme, vunn alle Seide….klää un hutzlisch warense, große schbitze Ohre un gonz verschrumbelde Gesichder hännd se gehatt.

Hässliche Kerle waren der des.....So schnell wie die die Hällbeere geklaut hänn, so schnell hunn die Kinner gar ned gugge gekennt. Erschd warn se gonz endsetzt, aaaaaaaaawer donn.....

Äens vunn de Mäd hod sich en Schdegge geschnabbt, so e schä gaddingses Eierbackraalche un hod die hässliche Kerle demit verjaachd.

Hui, sinn die ab un die Kinner hinnenoochgerennd.

© Paelzermad 2006

So wars, un gesung hännd se dodebei es

Lauter Hällbeerlied

Als Kinner ham'mer's oft gesung,beim Häämweg aus'em Wald,
un wa's Gescherr mit Hä'lbeer voll, hhot's doppelt laut geschallt.

Friehmorjens sim'mer nausgezoh', e Herd aus unsrer Gaß,
mit Äämer, Milchkann, Schobbeblech, de Kläänschte mit're Tass.

E Nachthäwwel, e aldes hot's Karlche mitgefeert:
Es wa' die roinschte Blechmusik, so hot sich's a geheert.

Ham'mer im Wald e Platz gefunn, wo's Hellbeer hot die Mass,
sinn dabberche mer in die Bisch, denns Plicke macht uns Spaß.

Wer plickt un plickt – ons Maul net denkt, sell sieht mer jo so gut –
Kriet Finger ball wie Dinte bloo, wer eßt e blooi Schnut.

Wie ham'mer Middags uns gefräät, uff unser drugge Brot,
un wa'sche vorm Raschde noch so mied, denoh wa'sch glei kommod.

's Fritzje hot emol gekrisch: "E Weschp hot mich gestoch!"
Un's Klärche blärrt ganz ferchterlich: " Do kummt e Dier gekroch!"

De kleene Kurt, weil sell'mols mied, der hockt ball bloß noch do;
soi Hosseborm wa' hinne dann voll Flecke blitzebloo.

Oft war' en Ääbscher aa debei, der soi Kann net voll,
duht Laab un Hutzle unne noi, dass mer's net merke soll.

Wie hot des Kreiz em weh geduh vum viele, viel Bicke,
doch häämzu is's allertche gang, do hot gesung die ganze Kligge.

Dieses Mundartlied stammt von Kurt Baumann, der 1977 damit den ersten Preis beim Mundartdichter-Wettstreit in Bockenheim errang

 

 

So hots sellmols schunn im Kinnergade g'häs, weil ich de Malschdift in de linxs Hand g'numme hab. "Ei des mache mer do awwer ned", hot die Kinnergadetande gemäänt, hot mer den Schdift abgnumme un in die reschd Hand gedriggt.

Alles was ich genumme hab, egal wasses war, die hot uffgebasst met Adleraache, is glei ogeschosse kumm un hott mit mär geschennt

"Du sollsch doch ned des **beese Hännsche** nemme, greif mirrem reschde, so wies alle onnere Kinner aach machen, siehch'des ned".....spätschdens do hunn ich gewisst, dass ich zwää unnerschiedliche Hänn hunn, nämlich ä gudes un ä beeses.

Die älder Tande, Carola hot se g'häs, die war schlimm. Ball alle Daa hot se mich gepiesakt.

Ich bin do gar ned gere hiegang, awwer die Mamme hot moin Brurer än die Schul gedu un mich ewe än de Kinnergade. Drei Kilomeder nunner un drei - Middags werrer enuff. Vun mer aus hätt se sich des schenge kenne.

Späder donn bin ich jo aach in die Schul kumm, z'erscht in die Amtsgass, do war fer die Kinner bis in die finft Klass.

"Ei guggemol, e linxses"... un schunn esses do genauso losgange.

De Lehrer war e luschdischer, hatt ich zuerschd gemäänt, awwer der war nore luschdisch uff annere er Koschde un mit mär hot der jo e gefunnenes Fresse g'hatt.

Ich bin alle Daach do eninn mit angschd, was werrern Heit werrer mit mer mache.

Mol hodder sich hinner die Dafel g'schdellt un mit emme klatschnasse Schwamm geschmiss, die Brieh is mer iwwers G'sicht geloff un moi Hoor warn nass. "Schreib mid de rechts Hand, hodder g'saat, donn basseert der aach nix."

Alle Kinner hunn gelacht un der Sell hots spassisch g'funne un soi Witzjer geriss, noch dezu.

Wie ich’s werrer mol vergess han. – patsch...hodder mich merreme lange Lineal feschd uff moi Hand geschlaa, de Filler hot en digge Klecks uffs Heft gemacht un alles war verschmeert.

Fer Schtrofarwet,hann ich misse, zu de Hausaufgawe, des alles nommol sauwer abschreiwe.

"Blos ned greine,hunn ich mer immer gesaat, bloss ned greine".....

In de Paus, uffem Schulhof, hunn ich des moim Brurer g'saat. Der hot mer dortmols feschd verschproche, dass, wanner emol groß es, dann verdrescht er denne Lehrer dass der nemmie krawwele konn.

Deheem hotters a de Mamme gesaat, awwer die hot gemännt, mer muss here was de Lehrer saat.

Fer des wu se mer ned geholfe hot, hann ich ehre en Zeddel uffs Bett geleet, wu druffg'schdanne is "Ich hasse dich"....awwer do wars schunn zu schbäd.

Die hatten ehre Ziel jo erreicht. Ich hann rechts geschriwwe.

Irschendwie hab ich die Zeit geschafft un bin in die anner Schul kumme. Dorthie wo die Greesere waren, draus in die nei Schul. Die war nochemol zwee Kilomeder weider dorch die ganz Stadt dorch.

"Ei guggemol, e linxses"...

hots aach do gehees, wie ich in die Kochschdunn kumme bin un des Messer in die linxs Hand genumm hann. Wanns was zu schneide geb hot, hunn ich mich misse hald ans Dischend schdelle, damit dem newer mer nix bassiert, un gud waas.

Awwer die Handarwetsschtunn, beim Freilein Kümmer.....

So e ältliches Freilein, hinnervotzisch un grausam war die.

Nor weil ich die Masche jo links uffgenumm hann, hot die mich in de Bagge gepetzt, dass ich gekrisch hab, so weh hot des gedu. Orrer, wanns ans sticke,stobbe,nähe orrer sunschdwas gange is, ich mach jo alles linxs, des gleiche Speelche.

Die hot de Bagge zwische Zeiche- un Middelfinger gepetzt un feschd zugedriggt.

Des hot se awwer aach bei de Annere gemacht, wann äner was falsch g'hätt hot.

Scheenes Daachs hots mer gelangt.

Es hatt grad geklingelt fer zu de Paus, die Annern warn all schunn draus, bin ich zu dere vor ans Pult un hannse genauso in de Bagge gepetzt, so feschd wie ich nore gekennt hunn. Ich hannere gesaat,wannse dodemit net uffheert mach ich des alle Daa mit Äer genauso wie sie mit määr, un bin enaus. Ich glab die hatt do aach e bisje angscht krieht.

Moi Mamme hot in die Schul kumme misse, awwer weil sich ach annere Eldre iwwer des Freilein beschwert hatten, is mer nix bassiert.

Ich hatt begriff – mer muss sich bloss soiner Haut wehre......

Vun do an hots mich nimmie geschdeert, wann werrer wer g'saat hot.....

"Ei guggemol, e linxses"...

Im Geeschedäl, ich war langsam schdolz druf, annerschd zu soi....

Schreiwe hunn ich jo linxs dann nämmie gekennt, des haddense mer jo grindlich ausgetripp, awwer alles annere mach ich aach Heit noch linxs.

Sellemols hatt ich mer geschwor, wonn sowas Ääner mol mit moim Kind, ach nore prowiert, der muss sich warm oziehje.

Awwer,wees de Deiwel warum, bis jetzert war un ess, ausser määr, in unrer Familie noch kenner en**linxser**.

 

 

© Paelzermad 2006

               

So wars.....  Die Events der WM haddden ogefang un drum  

liefen ach die Uhre  annerschdrum  

Bei uns in Lautre gabs kää halde  Die Stadt stand Kopp, die Junge, wie die Alde.  

G'feiert hämmer bis die Vechel peife
do half kää Feierwehr, kää Streife
mir doobten, dass die ganz Palz bebt   
des hot noch nät mol, Köln an Fassenacht erlebt.
Moins ging´s dann häm, kennt ihr des raffe
dann sinn mir frisch geduscht zum schaffe.
Und Owends, es war zwar echd als Mord
do sinn mir halt, schun werrer fort.
So sinn mir halt, in Lautre – Proschd -  un's Herrgeddel  erhalt´s.  

De Fussball un die goldisch Palz

  

© Paelzermad 2006

 

 

 

 

 

 

Moin Babbe, Ernscht- Fillip hot er gehäs, geruf hotten jeder Ernscht., war en herzenguder Mann.

Er hot im Strossebau geschafft, die Walz gefahr' un ach die Leid im Bussje uff die Ärwet un werrer heem.

Ich glab s'gebt wenisch Schtrosse zwische Alze un Meenz, wurer ned mit dro gebaut hot.

In die Stadt, zu soiner Firma waren des gut 3 Kilomeder, un fer denne Wech hot er e aldes Fahrrad g'hatt. Enunner iss jo prima gange, awwer fer heem ze fahre war de Wech zu steil.

Mir Kinner hann Owens oft howwe am "Alde Berg" geschtann un gewaat bis er kummt.

Hoch g'howe un geschlengert hot er mich, moim Brurer iwwer de Kopp gestrich un 'nen an de Ledderhosse hochgezo...huii - Nie war'rer mied orrer schlecht gelaunt.

Moin Brurer hotter donn uffs Rad gesetzt, die Dasch hann ich getraa, un so simmer heem marschiert.

Sellemols waren mir, imme ganz klenne Heisje gewohnt, was moi Mudder vun ehrem Vadder geerbt g'hatt hätt.

Die Mamme hot meischt mim Schorz im Hof geschtann un noch irschendwas gemacht.

Im Summer war die Weschbitt draus uffem Holzbock uffgebaut, 's hääs Wasser war gericht. De Babbe hots Rad eweggestellt, dann soi Hemd ausgedu un sich gewesch.

Mer zwee henn brav gewaat, weil’s donn glei Owendesse gewwe hot..

Dodenoch musste mer 'ne in Ruh die Zeidung lese losse, hann gespeelt bis er donn g'saat hot

"no, er zwee Ragger, geh'n mol her do"

Jooooooo, dann is g'schnawwel losgange, mir hann alles verzehlt vum Daach.

Oft hot er dann noch Holz gehackt orre was ausgebessert un mer hänn zugugge derfe, orrer mit zum Weiser Guschdaf niwwer.

Des war de Baurehof bei uns im Ort.

Fer mich war des am schänschte, wu ich doch so närrisch war uff die Viecher. Kieh un Gäse, en dicke Ochs mit riesegroße Herner, e Katz mit ehrer Kätzjer, Rolf-e Doggemischling, for dem hann all Reschpekt gehatt, kläne Ente, Gäns un Hinkel, des war moi Welt.

Nore, wannse die Wutze g'schlacht hunn, do hunn ich mich verschteggelt, weil de Metzjer mer ämol mit'eme abbene Sauschwänzje, de Bagge ogemolt hot...eklisch war des, des hann ich nie vergess.

Späder enaus dann, ich war schun acht-noi Johr alt, ich erinner mich noch so gut do dro.

Wann die Leit fer uff die Bauschtell net vollzählisch waren - Platz im Bussje war, do hammer manchmol mitgederft no Nerrerolm an de Rhoi.

Die Mamme hatt Esse un Trinke debei, mer henn bade gederft un sie hot geles.

Wär'n do net die eklisch schlimme Schteschmigge gewess, es wär herrlich g'wess, awwer ich war immer ganz verschtoch un schä was des dann nimmie. L

Aach, no Alze zum Ohredoker hot er uns Moijens mitgenumm.Des war jo aach immer so e Prozedur.

Ich bin jo nore mit,weil’s dodeno dann in de Alzer Kaufhall panierde Fisch mit Grumbeersalat gewwe hott. J

Jo,un Owens hann mir dann an de Stross uff em Babbe soi Bussje gewaat, un er hot uns werrrer mit Heem genumm.

Ich wees noch, wie ich dort an de Ohre operiert wor bin, ich hatt e Loch im Drummelfell - wie moi Babbe mer e paar wunnerscheene Orhbambelscher mitgebrung hot. Aquamarinblaue Stänscher mit silwerner Oifassung . Hann se aarisch lang gehatt.....

In de 60zicher Johre hot er mit de ganze Nochbersleit unser Haus, un ach die Heiser vun de denne gebaut. Dortmols waren des 7 Familie. Die Leit hann sich gescheseitich geholfe und so is eens ums annere gewachs.

1963 sinn mer dann oigezo un ich hat e Stubb fer mich ganz allä, endlich.!

Unser Speelplatz war die Gass. Klickerles un Fedderball, wasses dortmols halt alles so geb hot.

Radfahre hot moi Babbe mich uff dere Gass gelernt un aach im Winder middem Schlerre fahre.

Mer warn jo bloss drei Mäd im Ort, alles annere warn Buwe. Die hann uns noch beigebrung, was mer so fers Lewe braucht, zum Beischbiel uff die Stroh-un Haischteck krawwele un Flobbert schiesse J

Mer brennd heit noch de Hinnere,wann ich an die Senge denge du, wus do geb hot,wie de Babbe uns beim Flobbert schiesse verwischt hot. Hausarrescht un des e gansie Woch, des war schlimm, awwer ich hann schiesse gekennt J

Späder donn, ich war verliebt, was horrer uffbebasst, was des fer Borsch warn, wu do kumm sinn...Hach jo, eener war vun Nack, emme Winzer soiner. Der is kumme, freiweg üwwers klä Deersche gehecht, hot sich form Babbe uffgebaut und hot gesaat: Un ich heirat doi Dochder, dass des wäsch, ob deer des basst orrer net.

Moi Babbe hot nore gons drugge gemeent: do esses ledschde Wort noch long ned geschbroch,un wannde dich net glei abmachsch, tret ich der de Schugg en de Aasch, do lernsche's flieje.

No, des hatt der Nacker awwer glei kabiert un is ab. Aus wars mit dere Lieb'

Eener hot mer soga emol e Maibäämche g'schdeggt, gons owwe uff de Schornschde, moi liwwer,was hot de Babbe do geflucht, bis er des werrer hunne hatt.

Un dann, dann kam die Sach mit'em Fiehrerschei.

Ich han gebiddelt un gebeddelt dass er mich e bisje iewe losst – mer hadden jo dortmols schun e eichenes Audo.

Des hod er mer donn ach so bisje beigebrung.

Ich hann de Fiehrerschei in Alze gemacht, er hot mich abgeholt un Heemzu derft ich fahre. Okumm bin ich prima, nore in die Garasch....

De Babbe hot gemeent, du musch do rickwärts noi. Alla gut....Ich han de Kersch erumgedreht un schee uff de link Seit uffbebasst un rechts esses donn bassiert. Der Rickspichel war halt ab un die Stossstang e klä bisje lädiert.

So..., hot moi Babbe gemeent, jetzt weche aach, wiemer sowas ned machd J

Leischd hot mers ned, awwer leischd hots em, so hot er oft gesaat.

Leischd hot er’s mit mer beschdimmd ned gehatt.

So wars.......

Ich kennt noch viel verzeele vun moim Babbe ..... schä war's.....

 

© Paelzermad 2006

 

In de Heidisch Zeid geht sowas jo goooooooons annerschd.....

 

De Hoiner hot än neije Pzeeeeh sich kaaft, hot rumprowiert, sich aach en Indernetanschluss leeche losse, sich bei so paar Sache aach ogemeld...unner annerem aach bei some Forum fer Seniore.

Heer, horrer sich gedengt, do stehn jo luschdische Name drin, do kennt ich jo mol Äeni oschreiwe....Gedengt, gedo.... un weesche was, ess hot doch wärklich Äeni vun denne z'rick g'schriwwe.

Amme schäne Daach zeichts Blinkersche Poschd o. Des war e Mail vumm Kattel, so hotse gehees.

Heer, hot sich do de Hoiner gedengt, mogugge was der des fer Äeni ess.

Ei dere kennt mer jo mol z'rickschreiwe.....

Uns so hunn sich es Kattel un de Hoiner do in dem Forum fer Seniore kennegelernd.

Jung on Johre waren se jo alle Bäd nimmie, awwer noch jung in ehre Herze drin.

Epaarmol hunn se sich g'schriwwe – E goldisch Bopp, hot sich de Hoiner gedengt, die will ich jetzerd emol sieje. Alla, hennd se sich ehrie Dellefonnummere gewwe un og'rufe.

E Schdimmsche hottse, e Schdimmsche......hach Gott, des Kattel will ich sieh, sächt de Hoiner.

Es Kattel, e bisje verschämt, hot sich erschd gezierd und donn awwer doch en Schpaziergang mimm Hoiner verabred.

Es schaint jo e nedder Mo zesei, hot es so fer sich gedengt, warum dann ned....

Jo, un so hunn se sich in some Daal, im Wald getroff.

De Hoiner war z'erscht an dere Verabredung un hot schunn gewaat. E bisje uffgereecht warer aach.

Do kummts Kattel mit soim klänne Fltzer ogefahr, schdelld sich frech direkt newerschd Ihn un lacht ne aussem Audo eraus o.

Ich glaab, do waas schunn bassert mimm Hoiner, do hodder schunn e bissi soi Herz verlor......

's Kattel is ausg'schieh un hoddem Hoiner mo glei so en kleene Baggeschmatz vebasst.

De Hoiner,ned verleesche, hot se uff die Schnut gebuzzt.

Heer Krott, horrer g'saat...schäen dassde doo bisch.

Er soin Rucksack, äes soi Dasch un ab is gange in de Wald.

Om Baam war 4 g'schdanne. Hot de Hoiner gemeent, mer laafen dem vierer immer nooch, des iss en Rundweech. Gesaat,gedoo.....

Jessas, was hatten die sich all ze verzehle....

Uff eemol, de Hoiner ned iwwerzwersch, er nemmt em Kattel soi Hand und fiehrts dorch de Wald.

Es Kattel hot ne ogelächeld und do isser forscher worre, is schdeh bliwwe, hots am Kopp genumme, beigezoo un herzhaft abgebusselt.

Schäe wars un jo soooooooo romandisch.....

Im verzeele un so ab un zu bussele, sinn die Zwee als weirer geloffe, beschdimmd schunn ball zwee Schdunn.

Hach du liewer Gott, wo simmer donn jetzt eischendlich...un ob mer ned besser werrer zuricklaafen,hunn se alle Bäd üwwerleecht.....

Hie un Hergeriss, wie die Zwee warn, hunn die vor laurer,laurer nämlich ned emol die Wannerkad oig'schdeckt, die hot schee brav im Hoiner soim Audo gewaat....wurer die doch an dem Moije exdra noch gekaaft hatt.....Sooooooooo, un jetzterd.....

Wersch ned glaawe,awwer do hären die Zwee e Audo kumme. E Fraa fahrt langsam de Berch unneruff.

De Hoiner, sich ned geferschd, hald des Audo o un froocht.

Saan so mol, kummt do unne jetzerd ned ball emol die Schossee....

Nääää, lacht die Fraa, des is noch gons schää weid, ei do kennener noch e gud Schdunn laafe, bis dord onne.

Wo schdeed donn Ähne ehr Audo.

Ei do owwe uffem Waldparschplatz, sächt de Hoiner, wie kummer mer do am Beschde jetzerd werrer hie.....

O weh, sächt die Fraa, des is awwer weid un sie missen denne gonse Weech werrer zerick, weil se schunscht zu weid weg, un unne erschd im näkschde Dorf rauskummen.

Ach du moi Liwwer, sächt di de Hoiner, jo dann geh mer hald werrer zerick.

Die Fraa saat uffemol – wannse wollen, ich nemm se gern mid bis do enuff an die groß Waldkreizung, dann hunnse nimmie so weid.

Heer, wesche was...ei die Zwee warn froh un sinn glei oig'schdie.

Im fahre hot se donn verzeelt, dasse im Owwerferschder soi Fraa is un desweeeche im Wald rumfahre derft.

Sie wolld de Hund e bisje renne losse, muss awwer desdeweeche immer erschd de Weech abfahre, ob do aach grad Kenner läeft.

Äen wunnerscheene Schdäpilz hatt se aach im Kob gehatt uff de Rickbank, denne hot se weirer drunne,midde uffem Weech g'funne, hot se sich gefreet.

Drowwe an dere Kreizung sinn die Zwee dann ausgeschdie,hunn sich herzlich bedangt un die Ferschdersfraa hot noch gewinkt.

Ach war der des jetzerd schee, hots Kattel g'saat un de Hoiner hot genickt, jo, do sieht mer mol, dasses nednore in de Palz...näää, sogar midde im Pälserwald, aarisch nedde Leid gebt.

Zerick der Weech, war jetz jo nemmie weid....

Se hunn sich, fer e bisje auszuruhe,uff en Holzschdoss gesetzt und verzeelt.

Hach was war de Hoiner geschwitzt un wierer mit soiner Hand so unnerm Kattel soi Bluse,iwwer dem soin Buckel gefahr is, hotter gemerkt, ei's Kattel schwitzt aach....

Mä hodder sich awwer ned getraut...... un's Kattel hoddene awwer aach abgelengt.

"Her Hoiner, guggemol e Krott", säscht's un biggd sich denooch.... un tatsächlich krawweld do so e klänie Krott iwwers Gras, genau vor ähre Fies. Die Zwäe henn ehrn Schbass dro gehatt, dere Krott zusegugge.

Siehschde, saats Kattel, sogar

**Pälzer Krotte gebts im Pälzer Wald**

Nome Weilche sinn die Zwee uff un weirer,zerick ans Audo.

Jetzt wär en Kaffee ned schlecht, do owwe irschendwo isse Hitt vum Pälzerwaldveroi, do fahre mer jetzt hie. Gesaat, gedoo...

An dere Hitt hunn e paar Audo g'schdanne un mer hot aach zwee Leid draus sitze gesieh.

Alle dann eninn.....

Tschuldschung, awwer heid is geschlosse, sächt der junge Mann....

Ach Herrjeh, schaad, saats Kattel, uffs Klo hätts jo aach emol gemisst.

Do kummt so e älderie Fraa aus de Hittedeer und frocht....Wonnse dorscht hann, kennense gern was krieje, ach e Wärschdsche mit Weck deet ich Äehne wam mache, nore dauert des e bisje.

Ach wär des schee, wann mir en Kaffee krieje kännden, hot's Kattel sich gefreet.

Eijo sächt die Fraa, en Cappuccino mach ich Eich glei....

's hot ned lang gedauert un sie hoddene erausgebrung.

Jetzterd wars jo so, dass der Hoiner jo e Üwweraschung in soim Audo g'hatt hatt.....

Der hatt jo exdra fer denne Daach selwer en Käskuche, schunn Frieh Moijens geback und exdra fers Kattel e paar Schdigger mitgebrung.

Die hot er aussem Audo geholt und die Zwee hunn den Käskuche zu ehrem Cappuccino geschlacht.....

Toll konner backe, der Hoiner, des hottem 's Kattel aach gesaat, wies die ledschde Krimmele vunn dem Blättsche erunner geklaubt hot.

Des war on dem Nomiddag jetzerd schunn Glücksfall Nummer zwee.

En g'schparde Rickweech vunn minnischdens onnerdhalwi Schdunn un

e uffenie Hitt mit Kaffee, wu eischendlich zu war....

War des en wunnerscheene Nomiddag, glawens nor......

Bei uns in de Pfalz gebts aach so e 54 % dicher Kreiderschnaps

Der heest "KRAWWELDIEWANDNUFF"

So was ähnliches wie

Schwarzwälder Kerschwasser mit oigebauder Zigga. beliebt, scherf und orischinell:

Mer nenntne aach
Zehennägelkringelnsich
Haarundfingernägelausfaller

Jedenfalls schmeckt der faschd wie

"Strichbimbulibockforzelorum"!

Weesche jetzt was fer en Schnaps ich mään ??

© Paelzermad 2006

De Horschd, de Bruno,  "Ich" un de Peder

Pälzer Bu

Ich bin en echte Pälzer Bu, (Mäde) De (die) stärkscht vun unsre Gass,

hei, wer die Pälzer Buwe (Mädels) kennt, des is e edli Rass'

kä Schlippche un kä Krage, nä, des is uns viel zu dumm,

mer fliechen jo de ganze Daach im Chauseegrawe rum.

Refrain

Horch do mol hie, des klingt ganz pälzerisch, hollahiaho!

Voller Witz un voller Schneid, so babbeln do die Leit.

Vor so 're Ausdrucksweis hot jedermann Reschpekt.

Des is un bleibt de unverfälschter Pälzer Dialekt.

Un wann zwää Pälzer Hännel hen, des is e wohri Frääd,

en Fremder, wu voriwwergeht, vergeßt's sei Lebdag net.

Die Werter, wu do fliechen riwwer un niwwer iwwer de Disch,

die stehn noch in käm Lexikon, die sin jo noch ganz frisch,

Refrain

Horch do mol hie, des klingt ganz pälzerisch, hollahiaho!

Voller Witz un voller Schneid, so babbeln do die Leit.

Vor so 're Ausdrucksweis hot jedermann Reschpekt.

Des is un bleibt de unverfälschter Pälzer Dialekt.

Zwää Buwe spielen Klickerles un kriehn miteinanner Krach:
He Bankert, geb mei Klicker her, sunscht schlag ich der uff's Dach.
Geh häm du mit deim Krusselkopp un wäsch der mol dei Lais.
Wann ich der uff de Zünder klopp, dann drehscht du dich im Kreis.

Refrain

Horch do mol hie ...

Ei Du Bangert, ei, Du scheeler, ei, Du Rindvieh, Du Kamel,

ei, was bischde dann fer äner, ei, was gugschte dann so scheel?

Du hoscht jo in dem Lewe noch kä Kannelwasser g'soff,

wann ich dich am Schlawitsche nemm, dann saufschte's awwer doch!

Refrain

Horch do mol hie ...

 

Bekanndes Pfälzer Lied, den Dichter kenn ich (leider!) ned.

Ich saa Eich nore äens.....

Wann eiern Bangert, unsern Bangert nommol Bangert schennt,

schennt unser Bangert eiern Bangert solang Bangert,

bis eiern Bangert unsern Bangert nemmie Bangert schennt.

So dass n'ers wissen.....

 

E "Pälzer Krott"

Gebore bin ich im'me klänne Örtche midde im Pälzerwald.

Uffgewachse, faschd med lauder Buwe – mir waren grad drei Mäd im gleiche Alder.

Klar, dass mer all die Usitte vunn de Buwe mitgelernd hot un aach wie mer sich wehrt, was awwer gar nid so schlecht war, weil.....mer hod sich uff dem ellelange Schulweech (3 Killomeder enunner und aach werrer enuff) wenigschdens verteidische gekennd.

Ich hat jo dicke Hoor un Zepp bis enunner, des hot son monsche Borsch zum droziehe velockt, no un - do hots mäeh wie äämol was gesetzt, bis die mich in Ruh geloss hunn.

Im Wald hadden die Buwe e Baamhaus gebaut. Ich weeses noch wie Heid, wie ich do okumm bin mit moim Bobbescheesje.

Drin hat ich die Giesela un's Judda, schä die Hoor gekämmt und sauwere Kleedscher had ich denne oggezoo.

Die Buwe hunn mer die Bobbe abgenumm un, neigierisch wie se waren, nadierlich ausgezoo.

Äener, Peder hodder gehees, der wolld wisse, was innedrin in sorer Bobb is un hot mit soim Sackmesser kreiz un quer in dere ehr Bauch geschnitt. Oooooohr war do was gefällisch.

Moi Brurer war jo aach debei, awwer viel so feisch fer was se mache.

Ich hann mich mit demm Peder gekeild.

Moi Rock hat en Wingelriss g'hatt un die Schdrimp waren aach kabutt, awwer der hatt aach ganz schääne Schramme.

Moi Liwwer, hann ich vunn de Mamme Senge krieht, wie mir hämkumm sinn, Briederche hot nämlich gepetzt.........

Jo, un dann kam die Lehrzeid....

Alle Dag Frieh Moijens drei Killomeder enunner un Owens widder enuff ens Dorf.

Schä war do 's bussiere med de Borsch, dodefor war jo kään Wech so lang...**gg**

Äener, Axel hodder gehees, soi Vadder war Bankdirekter drunne in de Schdadt, der is alle Daach e Stickweg med mer Heem geloffe, un manchmol aach bis ganz enuff, wann ich Owens mittem ens Kinno gedäerft hunn.

Wammer Heid so drüwwer nodengt, was mer do doch geloffe is, Summer, wie Winder.....mer hods jo ned onnerschd gekennt.

Moin Fiehrerschai hunn ich noch gemachd en dere Zeid – achtzeh Fahrschdunn hot der Üwwerzwerch mich brumme losse, die neinzeht war die Priefungsschdunn. Rumms...bin ich äemol dorchgerasseld, weil ich annerer Schdobbschdross ned mit alle vier Rärrer g'schadann hann (hots dortmols gehees) –

Alla halt, värzeh Daach schpäder dene gonse Schambes nochemol.

Jo, un dann war die Lehrzeid rum un ich hunn e Schdell innere greesere Schdadt krieht.

E Audo kaaft mit drei "Fachmänner" am Werk **gg**

(e paar Woche schbäder hot sich rausg'schdelld dass des en Unfallwache war, de Modorblock geress war, un Kenner hatts g'sieh) –

Eweg vunn Dehääm, e Schdubb bei dere Metzjerei, wo ich Oschdellung krieht hatt uns Lewe hot o'gfang.

Fer mich "Dorfmädsche" war des in der Schadt sowas wie Paris, zuminneschd bis ich se gekennt hunn....**g**

Moi Mann hunn ich do kennegelernd,

Moi Bu hunn ich do krieht (bin froh dass ich ne hunn)

un so leb ich Heid noch als eschdi "Pälzer Krott" do in **Klä Paris**

© Paelzermad 2006

 

Es Lena sitz schunn seit dreißisch Johr alle Sundag, vorre in der erschd Kerchebank, dass se aach de Parre sieht!

Ich hunns jo so im Kreitz...,klaat se merschdens.... mei Lewe lang hunn ich geschafft, im Wingert, uffem Acker unn im Gaade aach. Geärnd un ängekochd, Gemies, Obschd un Schmeer. Die Grumbeer hunnisch merschd allans ausgemachd.Devor gesoit, dass im Winder, em Keller immer was se hole war.Unn deham do hot mer mein Mann Komplimende gemacht. Dess konnt der guud, der Charmeur, besunnerschd awwer dann, wann er was gewolld hot.Mei Liewessje hot er gesaat, un aach Budderblimmelche. Unn wann er dess gesaat hot, mei Budderblimmelche,hunn ich gewisst, uff was der enaus will, was der määnt.Grummbeersubb nämlich. Die hott er halt soo aarisch geern gesse. Wie geere deed ich ähm die Heid noch koche......

Des verzeeltse Jedem wu sich newer se sitzt, egal ob der’s heere will orrer ned.

Es Lena....

Latwerch...- seis aus Quetsche, seis aus Beere...Hauptsach mer hot im Winder was uffs Brot se schmeere.

Geschdern war ich uff de Heed, hann mol nuff uff de Quetscheboom geguckt. Ei Deiwel, die färwen sich jo aach schunn, hunn ich noch so fer mich gedenkt und dodebei is mer aach oigefall, wie des Friehjer immer war, wann de Latwerch gekocht worre is.

Is mer so im Schpädsummer,Ofang Herbschd an de Wisse entlang, hot mer vun weirem schunn die blooe Quetsche uff de Bäam leichde gesieh.

Is mer dorchs Ort geloffe, hots an viele Heiser herrlich sieß un fruchtisch geduft.

Ach, un erschd bei uns....

Moi Oma hot jo zu der Zeid schunn bei ehre Klennschde Dochder zwee Derfer weirer driwwe gelebt, awwer wonn Latwerch gekocht worre is,do hot se immer e paar Daach bei uns gesse un geschloof.

Also mit de Lena (so hot jeder moi Oma geruf), moiner Momme, de Hild Oma – die Fraa war zeitlos, schunn alt, seit ich mich on se erinnere kann, gschdorwe esse mit 100 genau wie moi Oma. Nore e paar Johr friehjer....Donn noch die Weide Bine mit ehrer Dochder Meda un monchesmol aach die Fraa Klein, waren des e Heerd Fraue, alle mit Kittelscherz o un nochemol so aldie Vorbinscherz um de Bauch gebunne.

Bei uns im Keller drunne, in de Weschkisch, do war jo e Deer zum Hof enaus.

Hinne, die Trebb erunner sinn die Fraue kumm, Mojens schunn beizeit,

hach jooooo un jede hot ehre eiche Messerche debei gehatt, wo se druff geschwore hot, des deet am beschde schneire.

Quetsche hunn jo die Männer Owens vorher geroppt gehatt, in große Weirekärb un aach des Omachholz gericht fer de große Kessel.

Holscheete fer nochzuleje waren newerm Kessel zumme große Schdabel uffgeschicht.

Jetzert isses dann losgange....

In de alde  Sautrog is Wasser gefillt worre un zwee Fraue hann son große Weirekorb Quetsche dort eninn geschitt un in große Seiher errausgewäsch.

Die Fraue hänn die Stiehl gerickt, sich in en Kreis gesitzt, die Bää leicht gekrätschd un Jede hot sich Quetsche in ehren Vorbinnschorz gerafft.

In de Midd vunn dem Kreis hot die groß Brenk g'schdanne. Dort eninn hot Jedie ehre gekernde Quetsche geschmiss. Gebabbelt un verzeelt hunn die, so vun Friehjer und aach manchmol vunn ehre Sorje, odder was so bassert ess uff dere Welt...ach, des war fer mich es schäänschde do zuseheere.

De Kaffee war gekocht un uff'me kleene Dischje g'schdanne, die Tasse un de Zugger un die Milch newedro, un immer wonn Ääni sich mol hot schdregge misse, isse uffg'schdanne, hot sich mol gereggt un e Tass getrunge. De Kaffeesatz innem kleeine Eemerche denewe.

So um Uhre zeeh, do waren meischd schunn soviel gekeernd, dasses fer de erschde Kessel gelangt hot...., hots Brote geb, meerschdens mit Hausmacher Worschd, - mer hunn jo sellemols alle Johr e Wutz geschlacht, so wie faschd alle Leid em Dorf.

In dere Paus hot moi Momme de Kessel voll vun denne gekernde Quetsche geschitt, es Feierloch mit Omachholz gefillt uns Schdreichhelsje dro gehall. Des hot so schä geknischderd un geknackt un glei esses in dere Weschkich schä mollich warem un gemietlich worre.

So um Uhre Elfe  sinn die Fraue donn häm, was koche fer ehre Kinner un de Mann,

henn Middach gesse, Gescherr gespielt un sin so um Uhre drei als werrer kumm.

Moi Momme un die Oma hunn zwischedrin noch Quetschkuche geback fer die Nochmiddaache zum Kaffee.

Äeni hot jo misse immer am Kessel bleiwe un riehre.

Die Oma Lena un moi Momme hunn sich abgewechseld.

Ich hann jo aach ab un zu mol bisje mit dem große Leffel riehre därfe, awwer ned so aarisch  long, donn dess schlimmschde was hätt basserer kenne war, wann der Latwerch og'hängt wär. O jeh, wonn des werklich ääm emol bassert is, war de Ärscher groß.

Nochmiddags esses donn weirergang un meeschdens so on die drei-vier Daa, bis die Quetsche vun unsere Bääm all zu Latwerch gekocht waren.

Abgeschmeckt hot den moi Momme, donn Jedi hot so ehre eiche Rezepdur gehatt, wie viel Zugger dro muss un wie long der koche muss,  un unser Latwerch is mit Kaffeesatz, Zimt, Schdernanis un noch annereGewärze abgeschmeckt worre....hhhhmmmm legger war der....

Äeni hot Glässer gespielt,die Anner hot eigefillt, die Näxschd hot die Deggel druff geschraubt un in die Oikochhäwwe g'schdellt. Uff 80° hännd se kumme misse, un dann erunner un im Keller drin uffem Borrem steje, bisse kalt waren.

So is Reihum bei Jeder Familie fer de Windervorrot gesorcht worre un Alle hänn sich gescheseidisch geholfe. Ausser beim Beerelatwerch....

Beere hot jo ned Jeder gehatt un do wars so, wer geholf hot, der hot e gewissie Ozahl an Glässer fer sich krieht, sozesaa als Helferlohn.

Do wees ich aach noch denne Schpruch dezu:

Mer essen Beere - Mer trinken Beere (Beereschnaps)

Mer hunn ach Beere fer uffs Brot zu schmeere 

Ehr aach???