Bedder abzieje un Halloween.....
Mondaachs is jo Wäschdaach, alla denkt sichs Ellfried, zieh ich Heit moi Bedder ab.
Wies grad so debei war schellts. Draus schdehts Annlies.
Ei Ellfried, was machsche donn – ei moi Bedder hann ich abgezoo un mach jetzt frische Zische druff..
Och geh, määnts Annlies, loss mo gugge.
Ei Ellfried, wääsche was, die Leinediecher do, die sinn jo schunn ganz schää veschlisse. Hosche kää annere fer druffsemache.
Häer Annlies, hoschd Recht, die kammer nimmie fer gut härnemme.
Ei gell, des saa ich doch....
Waatemol, ich nemm do die Froddeene, die konn de Herrmonn zwar ned leire, awwer der soll sich dro gewähne, orrer mer neije kaafe.
Klor, määnts Annlies, hoschd Recht, awwer jetzt bassemoluff.
Wääsche was mir mit denne alde Leinediecher do machen – do schneide mer uns Gesichder eninn un molen die greislich o un domit gehmer Moije Nacht uff des Halloween.
Wärsch sieh, do kennt uns kää Mensch, do kinne mir mol so rischdich uff de Butz kloppe, därfsches awwer käm verrode.
Doim Alde konnsche jo vezähle, dass de Owends zu mär gehschd, e Rund schdrigge un e bissje maije.....hä? was määnschen dodezu.
Jo, ich wääs jo ned, männsche der märgd des ned....
Ach wo, därfch dich hald ned gar so bleed droschdelle, nemmsch doi Schriggkorb un saasch "Alla schüß, bis schbäder"
Alla gud, ich mach mit...
Prima, wersch sieh, des wird e Morsgaudi, ein Morsschbass.
Geredd, gedu....
Die zwää hunn sich faschd in die Hosse gemach, vor lauder lache, wie se die ferdiche Diecher üwwer de Kopp gezoo - un sich im Schbischel in de Schlofschdubb betracht hann.
Her Annlies, dich kennense beschdimmd on doim digge Aasch und weil du dein Ranse schunn immer vorre hasch, anschdatt uffem Buggel.... giggel.....
Na alla, du musch jo grad was saan Ellfried....Gugg doch dich blossemol o - Du bisch jo so därr, wommer dich schiddelt, rabbeln die Knoche wie omme Schkelett un mer muss angschd hunn, dass de Kopp abfallt.
Ausserdem hosch du im Geschesatz zu mär, jo sowas vunn gar kääm Aasch in de Hosse un vorre aach bloss zwää Erbse uffe Brett genacheld. Alla sei du bloss ruhisch.
Du bisch jo bloss neirisch weil mär die Monnsleid schänne Aue mache dun.
Ach Annlies, kumm loss uns wirrer gut sinn, hosch beschdimmd Rechd seets Ellfried, mit der Veklädung kännt uns kään Mensch.
De näxschde Owend schlaat em Ellfried soi Herz ball Borzelboom, wies im Herrmonn des Schdriggmärche uffdische dut......
Jo määnder, geh nore niwwer beis Annlies, besser wie wonner do bei uns hoggen un maijen, dass mer vumm Fernseh nix veschdehje dut.
"Alla schüß, bis schbäder" saats Ellfried un draus isses.
Schä dass de Word gehall hosch Ellfried, frät sich die Annlies.
Hach Gott, Hach Gott, wonn nore de Herrmonn nix defunn erfahrd, der schlaat mers Kreiz ab, der is doch so eifersichdisch.
Do mach der mol kää Soije, do bin ich jo aa noch do...schliesslisch bin ich doi beschdi Freindin un ich hefl der schunn zu.
Un Jetzt ab enaus uff die Gass un
**Happy Halloween**
http://www.theoworlds.com/Halloween/index.asp?CardID=97346
Den Link bitte anklicken
