Geschichde vunn Dehääm

 

 

Schää wars "Alde", schwer aach un schuld dro an so manchem grauem Hoor

 Wann isch iwwerlee was alles so bassierd is in denne dreihunnerdfümfunsechzisch Daa

ich redd jo gar ned mol vunn dem, was in de Weld so war  

Nä ich mään so ganz allääns fer mich  

Gefrät hann ich mich üwwer viele klääne Sache, e schää geel Reesje, wu ich geschenkt hunn krieht -

unser Paulche, dassem werrer besser geht

moiner Familie, dasse sich vunn Schlääsch erholt, 's is schunn gut dass mer nie vorher wääs, wies werre sollt  

E langvetraudie Schdimm am Dellefon, hot de Weech ins Herz im Nu gefunn nie vergess, nor dief in mich eweggeschloss harrisch die schunn  

Schää gewess sinn die vier Johreszeide, jed so versich hat ebbes ze veschenge

Ich du gere an die wunnerschääne Gaadeschdunne denge

Jed frei Minudd war ich do draus am wergele un maaije mid de Nochbersleid

Wie oft hot ääns iwwer de Zaun geruf, donn un donn is des un des, du wääch Bescheid  

Gligglich war ich aach in schääne Schdunne, awwer die kammer zähle

So manchie dodefunn hann ich mir misse schdehle  

Alsemol Nomiddaachs hunn ich mich ääfach in moi Wächelche gesitzt

un bin de Berch enunner, dorch die Vorrerpalz geflitzt 

 Irchendwo en Waldschbaziergang, e Blimmelche am Wechrand,

e Tass Kaffee, e Lächele nur

Fer mich warn solche Schdunne Erholung, grad no de schdressich Aawet – "Glück un PUR"  

Gegreint hann ich aa, häämlich draus im Wald bei meine Diere ledschd, wie mer gemäänt hänn, dass mer die Aawet kännt veliere 

  Trotzdem, orrer grad se Läd ver Zorn, guggisch neigierisch niwwer in des Neije

Bin bereit se kämpfe un du mich irschendwie doch aach druff freije.  

 "Un aussem Chaos hot e Schdimm geschproch

's kinnt schlimmer sinn, kumm lächel doch  

ich lächel - noch"  

Eich all ein "Gude Rutsch" ins Neije  

Ich hoff, ähr kännt eich aach druff freije.......

*uff's Neije ...... Johr*

 

Moje iss der Schbass vebei, mit der ganse Woihnachtsfei'rerei

Vier freie Daach sinn dann wie nix vegang
Fer Leid alläns warn die aach ellelang

Moin Tender is quadradisch worrn, vunn lauder hogge
Un ramdeesisch druerld moi Kopp vun denne Glogge.

Aa koche, bagge, esse, konn ich nix mäh sie
Kännsch an sone Daach die Gäsegischdre krieh

Moije derf ich endlich widder schaffe
Des is fer mich donn wie Erholung - werschs kaum raffe

In moim Wägelche dorch die Geschend schaugele
Iwwerall nom Rechde gugge un mer "heile Welt" vorgaugele

Im Kalenner no is Woihnachde erschd wirrer in 362 Daache
Puuuuh un "Gottseidank"…ich konns eich saache.... 

määnt die Pälzermad 

 

  

  Ei ähr Leid,  ähr Bumbesjer! (hach ich bin so kuschelisch Heit) 

In moim Kalenner schdehd s´wär Woihnachde.

 

Awwer jetzt es beschde: Hätten ihr gedenkt, daß Woihnachde, des Johr uff de 24.12. fallt?

Desdewääche un iwwerhaupt un sowieso winsch ich eich e gans dolles Feschd un mords viel Geschenge.

 Bass'n uff: wanner was dobbeld krieje dun, orrer noch äfders im Schrank drin hunn, ich wissd dodefor dann e Leesung..**gg**

All des Zeich was'n ähr ned brauche kennen, orrer ned hunn wollen, ei des kinner mär gewwe.

Wie wisch ju eh märrie Kristmes, wie wisch ju eh märrie Kristmes änd eh häppie nju jiär.

 So jetz emol uff blatt: schänie Woihnachde unn en gude Rutsch ins neie Johr. 

 Üzgül challa ufz! Das hääßt "Frohe Weihnachten" uff türkisch. 

E geseechnedes Kwanzaa! Des winscht mer emme schwarze Ameriganer 

So, ich hoff, ich hunn jetz kääner vegess.

Alla dann....

Moiner Familie un all moine Freund un Leser wünsch ich b'sunnerschd herzlich

 

 

 

 

Es vierte Lichdsche waat uffs brenne –

un des schunn seit rer knappe Woch

Genausolang du ich schunn renne hinnerschd-vorrerschd,

innkaafe, schaffe, butze, backe, koch..

Do kummen beese Zeide, kinnt mer määne –

draus sinn all'se nor am jammere un schdähne.

Debei is Woihnachde schunn Moije,

ab fimf vegesst mer donn soi Soije.

Singt "schdille Nacht un - es iss e Ros entschprunge"

denne *Woihnachtswettlaaf* jedenfalls

 hamm'er werrer glatt gewunne.

     

               

Advent Advent – ää Lichdsche brennt

Erscht wars ääns, dann zwää un Heit sinn's drei....

Jetz kummt immer öfdersch mol e Neigiernos in Kisch un Schdubb vebei
Vesucht mit Lischd un Tück erauszekrie, was Aache Heit noch gar ned derfen sieh.
Ich wääs noch Sellemols - Häämlich schnuuse is was schäänes,
schennt aach die Momme "ab enaus un schäm dich Kläänes"
Kaum kammer uffem Bobbes noch schdill sitze
dät mer sooooooo gern wenigschdens e Gutsje doch schdibitze.
Wie soll mer geschbannt wie en Fitzeboo, e Woch noch uff de Heilischomend wade,
wo Wünsche trämerisch längschd in "was bringt's Chrischkinnsche-Gedange"  bade.
De Babbe määnt, kumm geh mer naus in de Wald, e klännes Dannsche hole
un Zweisch mit schääne dicke Goggele dro, so schää kannsch net mol du die mole.
Des Dannsche schdellen mir dann in en Chrischdbaamschdänner
die Zweische grad gewachs, is des ned wunnerprächdisch,

so e schää Dannsche hot beschdimmd  schunscht Känner.... 

Nore noch sechs Daa – am näxschde Sunndaach is soweid –

ich hoff fer alle Mensche uff de Welt, is dann e Riesefreid.

 

 

Es zwedde Lichdsche brennt....
's iss ebbes, was mer faschd ned glawe kennt.

De Rase grient un Gänseblimmel bliehn
Sogar Bettsäächer han ich im schänschde gelb gesiehn

Veschel, Käwwer un aach Schmedderling
Zu dere Johreszeid beinah e Wunnerding

Wie soll mer do on Woihnachde noch denge,
an schdille Nachd mit viel Geschenge

Es zehde Dierche am  Kalenner machen aa mär uff
Ausser Schoggelad schdehd noch e schäänes Schbrichel druff

Gutsjer bagge dud mer, kumm schmeis de Owwe o
zu der Zeit machd mer des, 's iss ewe dro

Iss aa nix mit Winderprachd un Schneerumwiehle
Friehlingswarme "Ichwääsnedwas" Gefiehle

begleiden uns aach werrer Heit
dorsch die, drotzdem wunnerschää Adventszeit

© Paelzermad 2006

 

Schbritzgebaggenes

Nom Rezept vunn moiner Mudder,

entwerrer mit Hasselniss, orrer b'sunnerschd legger, mit Walniss
 

Was mer brauch - un wie'mers machd:

250 Budder
2 Ajer
250 g Zugger
1 Vanillezugger
200 g gemahlene Nisse minanner gut veriehre.

500 g Mehl no un no eninnschaffe,

erschd riehre un de Reschd dann unnerknede.

De Dääg derf ned zu wääch sinn.

Wanns needich is, noch e paar Niss orrer e bisje Mehl unnerknede.

Awwer owachdbasse, - zu feschd derfer aach ned sinn.....

Iss e roinie Gefiehlssach....

De Dääg in e Gebäckschbritz fille, orrer, wies moi Momme immer gemachd hod, dorch de Fläschwolf drehje.

Dodefor gebts exdra Uffsätz mit veschiedene Forme.

Om ääfachschde un schnellschde geht’s, wann zwää minanner schaffen.

Ääner dreht un de Onner schneid die Plätzjer ab,

formt se glei in de Hand zu'me Kringelsche orrer zu'rer klääne Well

un leet se uffs Backblech.

Mid e bisje Iwung geht des Ruckzuck.....

Geback werren die dann bei bei 175° ca. 10-15 Min.

Des Schbritzgebaggne mit de Ende in Kuvertüre tauchen,

uff Alufolie trockne losse un dann in Dose setzen.

Mir hunn Dehääm fer die Plätzjer exdra en Koffer gehadd.

Der is mit Folie ausgeschlaa wor

un die Sorde sinn newernanner eninn gesetzt wor.

 

Deggel zu un abgeschloss, weil schunscht immer mol wirrer de Ää orrer de Onner schnuse gang wärn.

 

Sunndaags als hod die Momme dann e Vesuchsschdiggelsche erausgeriggd.....weil mär gar so gebeddeld hann – aach moin Babbe......Jo – Sellemols.....

 

Alla...bagge is jo kää Hexerei un macht aarisch viel Schbass – awwer Zeid muss mer defor hann......

 E Gudes Gelinge winscht die Paelzermad.....

 

 

Woihnachtsschbeck schun seit im Summer

Der macht mer seidem nix wie Kummer.....

 

Der hoggt feschd uff de Schengel un aach uffem Bauch.

Ich äjjer mich jo tierisch driwwer un denk, was ich so brauch

des iss des Killo Woihnachtsschbeck, des meest halt ääfach weg!

 

Hoschd Rechd gehärt, 's iss seid Auhuschd

un longsam wird mer schun bewuschd

Es näxschde Chrischdfeschd kummt beschdimmd

Un domit aach leggre Sache, wu mer gern vun nimmd

Gans, Gutselscher un Mazzipan,

aach Zimtschdern lachen mich schunn jetzerd an.

 

Was mach ich bloss mim alde Schbeck

Der is seid Monade so keck,

dass der allem trickse widderschdehd

un ääfach nimmie runner geht.

 

Hännd Ähr en Tipp "Schbeckwegimnu"

O wie gern häärt ich eich zu.

Am Beschde wär e Zauberword

**Här Schbeck mach dich vum Agger, schaff dich ford.**

 

Kumm mer awwer kääner, ich soll hungere,

es wär es Beschd

Nää, nää, sowas hall ich eh ned dorch,

des gäb mir aach de Reschd.

Ich lieb doch's Lewe, genüsslich, wääch un fraulich

bloss die Folsche wu des geniesse hod, die sinn raulich

 

Jetz hann ich geläs, dass mer Scbeck wegschmuse kann

Des wer ich glei mol ausprowiere dann

 

Die Formel wär "Ää Kuss gääche ää Gramm Schbeck"

Wonn ich jetzerd so rechne du, dann wär bis Woihnachde der alde weg.

 

Alla werd ab heid nor noch gekissd,

weil des gud geeche Endebrode und aach Gutsjer issd

Un weil des kisse so gons newebei noch Schbass mache dud

un's Gemiet rumwiehle

die neie Kalloriebombe, umwonnele dut in lauder Gliggsgefiehle

desdewäche muss e neggisch Zuggerschnut jetz bei

Glaabs nor, ab jetz un bis die Gutsjer all gefuddert sinn, gebt des e Wohnsinnskisserei.......

Schaaaaaaaaaaaaaaamatz **gg**

 Die Fried wird näxschde Mondaach 80 Johr...

Grad hoddse e nei Härgerät vebasst krieht un sich gefräät, weils e Kassemodell is un se nix dezubezahle muss.

Dunnerwerrer was sin die Kassemodelle doch so modern un aach schää osegugge.

Sie härt prima demit un's dellefoniere geht aach prächdisch.

 

Alla, hun mär uns gedengt, do kriehtse fer ährn Geburtsdaach e nei Dellefon.

So äns wuse in de Hossesack schdegge un mit erumtra kann, wuse de ganse Daach hinne newer ehrem Ruhesessel leie losse kann.

 's wär besser, weil...do brauch se ferse dellefoniere nemmie immer uffseschdeie un mär määsden nemmie Schdunnelang waade, bis die Frieda-Elisabeth an den Abberat kummt.

 

Gesaat, gedu....

Im Lade hadden die so e Senioredellefon, ned so forzelisch klään, mit exdra grosse Taschde, schää leischd un ned soviel Schnickschnack, des deht se eh nemmie kabiere.

Alla, hummer des kaafd.

Am Samschdaach hotse die erschd "Lehrschdun" krieht.

Gefräät hotse sich wie e klää Mad un war Feier un Flamm, fers glei ausseprowiere.

Gut dass ich mer sowas schun gedengt - un die Abberadur üwwer Nacht uffgelade hat.

 

Die Nummere vun ähre Freindinne ( wuse immer schännt *die kännden jo aa mol orufe, die hun mä Geld wie ich*)

De Dokder un die Ohredokdern, die Nochbern un ähr Kinner.

Alles hot ährn Enkel misse foi seiwerlich in e klää Bichelche uffschreiwe.

Des hotse hinne, newer ähren Schduhl uffs Dischelsche geleht un's Dellefon kummt dort debei.

Owends, des wääse, musse des Gescherr wirrer in die Ladegarasch schdelle.

Mär hann'er alles ausenannerklabuschdert un ich glaab, sie hots halwerschd geschnallt.

 

Am Sundaach – Geschdern – mär waren grad beim Kaffee Moijens, hot se ogeruf.

Haaaaaaaalllo, häärsche mich, hotse in de Härer geplärrt.

Ich hun vor Schreck beinah moi Safdeschdigg falle loss.

Ei allemol här ich dich.....

Es orufe hot also aach geklabbt nore...gehärt hot sie mich ned so rischdich.

 

Ei Momme, hun ich jetzt aach gekrisch – do ess newe an de seid so en klänne Knopp, dort musche druffdrigge. Sie hots gemach un saat...

Ei Dunnerkeil, jetz här ich dich jo wie wann'de newedro schdeje deetsch.

 

Ei Momme, des hunnisch der doch Geschder gezeijd – des is e exdra Knopp dassde ned immer doi Härgerät onnerschd oischdelle musch, wonn's rabbeld.

 

Jo määnt'se...jetz wu des saasch....

Ach waat nore, ich wers schunn uff die Reih krieh.

 

Moi Vadder hot immer gesaat – "mer lernt jo aach en Ochs drigge" säät'se noch.

 

Jojo – die Frieda-Elisabeth un's nei Dellefon....

 

 

Bis se achzisch is, isse fit wie en Addidas mit dem Gescherr....wedde.......

 

 

 

Jo un Geschder war's jetz soweit. Der große Daach war do.

De Parre kam so am Uhre zehne.

Dem un alle Annere wu graduliere kumm sin, hod'se ähre nei Dellefon schdolz gewiss.....

 

Um halwer zwelf hodder immer noch gehoggt. Här, ich hunn gedengt, der will bei're inziehje. - Bin emol in die Schdubb eniwwer un hunn gesaat

"Momme hosche ned Middagessehunger –Eijoh seet'se ich hunn jo schunn Beizeide Kaffee getrunk."

Des hodder dann geschnallt un hot sich vum Agger gemach. Puuuuuhhh......

 

Nomiddags dann, waren aach e paar Schulfreind do, vun denne wenische wu noch lewen

un nadierlich es ganz Geschwerdel – soll häße, die Kinner un die buggelich Vewandtschaft. **gg**

Es war en harmonische Daach fer die Frieda, - aach, orrer grad weils Dellefon odauernd gerabbelt hot un Sie prima dellefoniere kunnt.

 

Subber Sach – Die Fried uns nei Dellefon......

 

 

 

 

Ach Niggelaus verots mer mol, hosch du dann aach e Fraa?

Zum redde, schmuse un zum kuschle -

fer zärdlich dorch die Hoor se wuschle

 

Saach, kitzeld aach doin Bart bei jedem Kuß

So dass doi Fraa mol herzhafd lache muss

 

Ach Niggelaus verots mer mol, bisch du so rischdisch gligglich

Froh doi Gemüt, voll Gligg doi Herz

Un zärtlich doi Gedange,

kään leise Schmerz un nix bringt dich ins wange?

 

Niggelaus dann wünsch ich deer

Dass am brenne vun doim Herz die erschd Kerz Feier fängt

Un so, feschd un sicher doinen Schritt

dorch die Nacht un die Adventszeit lenkt.

 

Zum 1. Advent....Sonntag.... die erste Kerze brennt

Wünsch ich euch allen hier

Gedanken die zu Herzen gehn

Augen die warmes, wunderschönes sehn

Hände die ein liebes Gesicht berühren

Arme die sanfte Geborgenheit spüren

Ohren für Den, der um zuhören bat

Und Zeit für die Zeit, die gerade begonnen hat.

Allen Lesern wünsch ich herzlich
Eine sanfte und ruhige Adventszeit
~~paelzermad~~

 

 

Advent - Advent, ä Lichdsche brennt -

erschd Ääns, donn zwä, donn drei, donn vier -

donn schdehd des Chrischdkind vor der Dier.

Wann awwer donn des fünfde Lichdsche brennd -

donn hosche Woihnachde vepennd......

 

 

Baß uff! Des Meiers Ellfried haschde doch gekennt? Wäscht noch, die wu in de Dunnerschberjergass gewohnt hot, in dere ald Hitt.

Däne ehr Mudder war e geboreni Schwob un die Kusine vum Krämer Oddo, wu uffem Kerchhof als es Laab gekehrt hot. Un vun dem soin Dochdermann die Schweschder, - das is es Burschderfers ähr Kaddel. Un Sell hod sich ledschde Summer mid dem Wohners Frieda, ährer G'schwischder Känn ährm Hoiner geheirad.

Jetz isses uff de erschde Advent zu gang, es Geld war knapp un so wollden de Hoiner uns Kaddel sich e Chrischdbaam klemme.

De Hoiner, ned faul, nemmt sich en Grumbeersack un schdeggt die Sääch eninn" 's iss no Viere, de Ferschder hot Feieromend - Kumm Kaddel, mach hie ehs dungel werd"

Mid de Schdiwwel o, weils geräänt hat, sinn die zwää in de Wald maschierd.

"Her Hoiner, gum'mol der do, wär der nix...... Geh fort so e krummforzelisch Heck – mer lossen uns doch on de Woihnachde ned vunn dem gons G'schwerdel auskreische. Nää, den nemmär ned.....

Do vorre, der do, der geht bis faschd unner die Degg, wär jo schää, awwer den bringe mer ned aussem Wald enaus....

Alla, werrer nix....Kumm Kaddel, mache mer noch de Miehlweech enunner, do unne schdehn se dick uffenonner.

Gesaat, gedu......Des Bäämche wune gefall hot, war so en korze Meder long, schää grad gewachs un brääde Zweische...

"E Edeldann is des, saat de Hoiner.... E Edeldann, dass ich ned lach, du Dummbeidel....e Edeldann hod silwerisch digge Nodele, ned so dinne wie der Baam do.

Was wääsch dann du Großmaulisches – du wääsch hekschdens dass de Schwademaa, die dickschd Worschd iss un dass in doim Schorzebennel e Knibbel is, awwer sunschd wääsch du aa nix.....

Der werd genumm un Bassda....." Un die schääne Zwagge mit dene digge Goggele dro, die nemmemer mit fer in die Borremvas im Hausgang.....

 

Alla, 's Kaddel war ruisch un de Hoiner hot die Sää ausgepaggd - Ogesetzt un denne Baam abgesäät. In de Sack hodder ned gebasst, alla hodderne unner de Aam geklemmt un's Kaddel hod hinne gehowe.

So sinnse de Miehlweech wirrer enuff un on den Waldrand hie.

"Waat Kaddel, ich gugg ob känner guggd.

Die Luft iss sauwer, weirer geht’s......awwer Kaddel, wonn Änner kummd loschde de Baam in de Schosseegrawe falle, hosch gehäärt.

Och Hoiner, wer soll do dann noch kumme, es is jo ball dungel. Ich sieh jo schunn nimmie wo ich hiedabbe du."

Weirer is gang de Kreizweg enuff, de Hoiner im forsche Schritt vorreweg. Es Kaddel is kaum noochkumm.Uff Äämol knallt em Hoiner de Baamschdamm in die Wade.....

"Aua kreischder, warum hosche dann los geloss, du bleedie Dunsel, es kummt doch gar känner."

Dreht sich erum un sieht es Kaddel im Schosseegrawe leie – säächnass warse, weil der Grawe jo voll Rääwasser war.

Wie kummsch donn du jetzerd do eninn, froch'der un hald des Bäämche bombesicher feschd.

"Ei ich wääs jo aach ned, ich bin geschdolwerd, greint's Kaddel – kumm helf mer mol do raus"

"Do musche schunn selwer wirrer rauskrawwele, wonn ich des Bäämche jetz gehe loss, fallts jo in de Dreck......

"Seeleruisch hodder gewaad, bis'es Kaddel ausem Schosseegrawe gekrawweld war un nass wie e vesääfdie Katz do geschdann is.

Kumm, mach ford dass mer häämkummen, dass du mer bloss ned krank wersch un ich die gons Awet Dehääm dann allä schaffe kann. Näxschdmol baschde hald e bisje besser uff, wo de hieschlabbsch, gell.....

"Desdo Bäämche wird mer gedenge,

knerwelt's Kaddel de gonse Häämwech lang.......

Desdo Bäämche wird mer gedenge.......