Geschichde vunn Dehääm

 

Bei uns war de Sundaach jo immer was besunneres.

Sundaachs Moins hods Weißbrot geb un gudie Budder. E wachswääsches Ai un drei Sorde Mamelad, was bei uns jo Safd hässd..

Die ganz Woch, warn unser Schulbrode mit Margeretsches odder Reidschulfett, wie moin Babbe die Margarine genennd hot, geschmeerd.

Mir wars Worschd, Hauptsach ich hadd üwwerhaupt e Brod debei. Des war nämlich e begehrdes Tauschobjegd, weil die mähschde Kinner aus aame Fomilie warn un häkschens drugge Brod mit Latwersch orrer annern Schmär druff hadden.

Fer so mansches moiner Brode hunn ich nämlich ferdische Hausuffgawe gefuggerd J

 

Mir hunn jo jed Johr geschlacht un moi Momme hod gud Hausgehall mid dem Sach.

Budder hoddse selwer gemach, in de Budderleier, Safd gekochd vunn alle Obschd wus geb hod -  un Aijer hunn unser braune Belschier Riesehingel geleed.

Brot hummer drei Pund fer fuffzisch Penning krieht, weils Mehl vun unserm Kornagger, bei de Bägger Burschderfer kumm is.

Der hod Buch gefiehrd un solang es Mehl gelangd hod, hummer alle Woch e Dreipinder krieht un  Samschdaachs e Weißbrot.

Wars Mehl all, hodds Brot aach mähner gekoschd.

 

Alla wie gesaat – Friehschdigg Sundaachs Moijens, des war ebbes ganz besunneres. Dodefor is selbschd moin schunschd verrazzdes Brurerherz freiwillisch uffgeschdieh.

Am Sundaach Punkt achd, warn mir all geschdrischeld un geberschd am Disch.

Es war jo aach de Äänzich Moije, wu die Familie minanner am Disch esse kunnd.

De Babbe is die Woch iwwer mäschd so schbäd vun de Awed kumm, dass mir schun im Bedd warn un Moijens war'er schun wirrer ford, orrer grad im geh, wann die Momme uns geweggd hod.

Grad awwel beim friehschdigge muschd ich do dro denge, wie selbschdveschdännisch heidsedaachs so ebbes wie

gudie Budder, Schinge, Weißbrot un Safd  sowieso - un Schbeck un Aijer uffem Disch doch sinn.

Aach Kaffee hods Sellesmol nor Zichorie un"Lindes Bliemchekaffee" geb.

Alla, dodro kännd ich mich jo nimmie gewähne.

En Daach ohne e Tass/Kann J gescheide Kaffee, nää – kummd  ned in die Tutt. (hoffentlich nimmie, muss mer jo saa).

Zeit fer e gemiedlich Friehschdigg, des winschd aach Eich

die paelzermad

 

 

Die Nadur froot jo ned no Sundaach. Wanns Obschd reif iss musses abgemach un ingemach werre, wie grad jetz die Kersche. Die sin schwaz un knaggisch, grad reechd fer's Kerscheplotzer bagge.

 

Wann ich dro denk, bei uns Dehääm – mir hadden en Kerschebaam voller digger, schwazer Herzkersche direkt im Gaade hinner de Audogaraasch schdeh.

Drunner war e klää Bängelsche. Des had de Babbe aus dinne Dännscher geschroinerd.

Mä wie zwää Leid kunnden nid druff hogge, awwer's war e urgemiedlich Bängelsche.

Als kläänie Krodd hun ich dort immer mid moine Bobbe geschbeeld. Had moi Bobbescheesje unnerm Kerscheboom schdeh un unsern Waldi hod sich drin bräd gemach.

 

Wann die Kersche ogefang hun sich se färwe, bin ich efdersch mol uff des Bängelsche geschdieh un hun prowierd, wu ich drolange kann. Hod die Fried mich vewischd, hodds Schille geb.

Awwer dann, wannse richdisch reif warn hod Sundachs Moijens in de Frieh, de Babbe die Leeder ogeschdelld un is enuff geschdieh.

Debei hadder en Äämer un en Fleeschhoge. Mit dem hodder de Äämer an die Schprosse gehung. So kunnder mid alle zwää Hänn robbe.

Ich hun gewaad bisser rufd : Bobbesje, hall mol doi Scherzje uff.  :-) 

 - huns gemach un er hod mers Scherzje voll Kersche geschmiss.

 

Dodemit hun ich mich uffs Bängelsche vezoh un ugewäsch die Kersche gess. Mmhhhhhhh warn die legger.

Dortmols kunnd mers noch ugewäsch esse. 's waren jo noch wenisch Audos die Gass entlang und kaum en Fliescher, ned wie Heid.

 

Schbäder dann, ich war zwelf wie ich es erschdemol mid robbe gederfd hann. Uff'rer Leeder war ich nadierlich viel Friehjer schun, awwer Obschd robbe, des muschden mir Kinner jo aach erschd lerne. Die Baam warn hoch, die schmale Schbrosse un do owwe es Gleichgewichd se halle, des is gar ned so ääfach.

 

Am Liebschde war mir mid de Leeder enuff, en schääne Aschd gesuchd, wo mer die Kersche ball in die Gosch gegängd sin, druffgekraweeld, es Äämersche eijens wu drogehängd un losgang is.

Drunne hod die Momme sich de klääne Disch aus de Wäschkisch erausgehol un en Schduhl un hod schun mol ogfang se kärne.

En Kerschekärner hadden mir Sellemols noch ned. Die Momme had so e großie Hoornodel. Dodemid is des prima gang.

 

Aach schbäder, wie se dann vum Babbe so en Kärner kriehd hod, die hod mid nix annerem die Kersche gekärnd, als wie midd däre Hoornodel. Grad geschwor hodse druff un machds Heid noch so.

 

So schdigger drei Pund gekärnde Kersche hodds jo gebrauchd fer de Kerscheplotzer.

Alla – 's wars groß Kucheblech.

Die alde Weck warn ingewäschd, sin jezz ausgedriggd wor un in die groß Dägschissel kumm.

Debei is Zugger kumm, ned soviel, weils so Siesskersche warn. Fer die Groß Form warns so zwische zwää-un dreihunnerd Gramm. Zimt is drokumm, des schmeggd soooooo gud......mmhhhhh

Un finf Aijer. E gud Schdigg Budder hot aach ned fehle derfe un e Päggelsche Baggpulwer.

Die Kersche driwwergeschrähd, die Ärmel hochgekrembeld un mid zwää Hänn alles gud dorchenanner gemengd.

Die groß Form is mim Bensel ingebudderd - mid Weckmehl ausgeschrähd un der Plotzerdääg eninngefilld wor.

Solang wie der Kerscheplotzer dann gebagg hod, solang hädd ich vorm Owwedärsche hogge un uffgebasse känne. Den Geruch hunn ich bis Heid ned vegess.

 

Hodds den Kerscheplotzer zu frischer Gemiesesupp aussem Gaade geb, als Middachesse, dann sin die Niss eweggeloss wor.

Hoddsen awwer als Kuche fer zum Kaffee geb, dann is do noch e Gläsje Woibrand drokumm un gemahlene Haselniss.

Egal wie, der Plozzer war un is uuuuuhoimlich gud.

 

Kerscherobbe un Kerscheplotzer bagge,mach ich noch Heid fers Lewe gern.

Juni - un grad is jo widder soweit.....:-)

 

Wers Rezept prowiere will, kanns gern hann......

        Eich en schääne Sundaach un en Gude ;-)                  

  

Moi Paradies......

 

Am große Door enin, e Schdiggelsche ehinner un dann scherf abgeboo, in die Schloddeallee, dort bis ganz ans Enn. Do fangds oo ….*Moi Paradies*

 

Es kann mer noch so dreggisch geh, en Daach war aarisch oschdrengend, orrer ich hadd eijens schunschd e Ubill ......

Ich bie ab in die Schloddealle un schun vorre am Knick schdreifd sich des gonse ab wie middeme Äämer Wasser erunnergewäsch.

Es Deersche eninn un alles is vegess.

Fer mich is ab doo, e vollkumme annerie Welt.

Vorm Deerche schdehd Worzel. Die had ich im Wald gefunn, bei ääm vunn moine Schbaziergäng. Die Holzfäller nemmen jo es Schdammholz mid, awwer die Worzele lossen die Mähschdens leie, bis se mid holze ferdisch sinn, dann werren die vebrennd.

 

Die Sell, is wunnerschä un fer e Blummescherwel druff, wie gemach. Omends, wo nimmie so viel Leid unnerwegs sinn, bin ich middem Audo hiegefahr un hunn se oigelad. Moi Liwwer, war die schwer.

Die schdehd jezzer also vorrem *Paradies* - Druff hunn ich en geflochdne Weidekorb mit Verbene, Gleggelscher un Weihrauch drin. Der hängd jezz ball an dere Worzel erunner.

 

Es erschde was mich olachd, wannischs Deerche uffmach is die helzern Sunneblumm, glei rechts. Die butzt des Beetche un gebd emme Reesje e bisje Halt. Hiwwe un driwwe schdehn zwää Geggelcher, siehn aus wie echd, nore krähje kännen die ned.

 

Zwää Schritt üwwer die Wiss, do hod de Sebbel (Josef)  soi Dehääm. Der kummd aus Bayernland un iss en Zwerg. De Josef bewachd de Rase un de Trumbedebaam. Der hod schun die erschde Tudde ogesetzd un blieht emol gelb un des im Üwwerfluss.

 

Ich bin jo e bekennende Zwergeliebhaberin. Ned dass ich zisch defunn hätt, awwer ausserm Sebbel wohnt do aach noch de Schloofkopp.

Der hod immer ää Au zu un linst hinnerm Tulwebaam eraus. Hod e Scherzje o un de Biggel in de Hand, als wie wonner goddwääswas schaffe deed. Dodebei pennd'er de halwe Daach so dass mer'ne faschd schun razze heerd.. Ummene erum bliehd es Männertreu im schännschde bloo un üwwerm Schloofkopp, in de Äschd vumm Tulwebaam, hängen gefillde Pedunie. So langsam fangen die o se range, bisse emol so langs sin, dasse leis im Wind schaugelen.

 

Driwwe uffem Pladdeweech kummd mer dann ans Door zum Paradies.

En Rosebooche, wu awwer kää Rose dro wachsen, sondern e wunnerprächdische Waldreb. Geißblatt häßt mers. Drunner sin rechts un links klänne Beetcher ingefasst middeme Holzzainsche.

Des bewachd de Brummbär uff de Ääne Seid un de Hatschie uff de onner. De Hatschie hods ned ääfach grad. Er is aasch empfindlich. Vor soiner Nos wachsd grad e dick Ranungelsche. Bei jedem Windhauch kizzelds'ne an soiner Nos un de Hatschie muss niesse. Un des konner ned leire, was äm soi hochgezoones Au un die gekrauseld Schdern glei verode dud.

 

De Brumbär is en echde Seldefreehlich un machd immer e grummelisch Gesicht, wääs de Deiwel warum. Der Sell hod ooschainend immer schlechdie Laune. Muss so sinn weil, wu der soi Dehääm hod, do fressen ned mol die Schnegge was eweg.**gg**

 

Werschs ned glaawe, do kummen noch Welle dezu.

 

De Hämbel, de Griesgrom un de Guggich, die sin grad uff de Rääs in moi Paradies.

Hunn sowas leire geheerd, dasse in zwäänehalb Woche do lande dun.

 

E Plätzje fer die drei Neije finnd sich sicher, wie ich mich kenn......

Ääner kännd velleichd driwwe newischem Heisje inzieh.

Dort is unner de Rose noch e schääne Platz un wonn ich beim Koche aussem Finschder gugg, dann sieh ich denne.

Mol froo wer Rose maan, vun denne drei weil -

die Onnern woll'den dord ned wohne, weeche de Dorne un dem Geruch.

De ganze Daach nix anners rische, wie de Roseduft, näääääääää....ned mit uns, hann die gemozzd.

Dort unnerm orangene Riesemohn, do wär aach noch e schaddisch Plätzje, odder unnerm Hibiskus. Do kännder sich dann aach noch aussuche – will ich unnerm weiß mid rode Dubbe wohne, odder doch liewer unnerm hellblaue mid em rode Faade.

 

Im lange Beet, was de Rase vunnem Sitzplatz trennt, do kann kääner mä inziehje, do schbitzen die Pompom-Dahlie schun. Die brauchen den Platz all fer sich.

Un driwwe newerm Grill, dort unnerm Magnoliebaam, do wachsen jetz die Joschdabeere.

 

Velleichd will Ääner vun denne Zwerje jo aach e bisje geschützt wohne, ned grad so uffem Präsendierdeller hogge. Dann kanner unner die Baampeonie. Die blieht zwar nimmie, hod awwer schdernfermische Samedolde. Selde sowas intressandes gesieh.....

 

Hach joooo, is hald ääfach paradiesisch schää, do bei uns in de Palz. So schää, dass die Gadezwerje sogar vun Dänemark do her kummen, fer Summers do bei uns im *Paradies* se wohne.

Frää mich uff die Ragger......

 

 

 

Es Gredel – ach Gott, was hunn die dem Määre fer en Name geb.

Wo jeder zwedde Ooraunser mit "Gret, orrer Gredel" se du hot.

 

Du babbisch Gret, häßtes, wann sich Ääns dreggisch wie e Wuzzje gemachd hot un wonns bei dem Dehääm aussieht, wie bei Hembels unnerm Sofa, odder bei Jääbs owwenuff.

 

Iwwerzwerschie Gret, werd's geschännt, wonn sich's hebgedreht droschdelle dud.

 

Du bisch so schlau, alswie im Gredel vun Dummbach soin Bauchnawwel, so werd Ääns ogeblaffd, wanns so hell alswie e Päggelsche Dungel is.

 

Alla, es ess jezz egal, es häst halt Gredel un iss die Dochder vunnem Schwowe Schorsch soim Brurer un die "Gretvariatione" allminanner isses a.

Es kann jo nix defor.....gelle....

 

Als klää Määre wars e goldisch Knoddel, bisses verzeh war. Do isses aus de Schul kumm un die gons Bloos war inngelad uff die Kumfemation.

 

Dehääm waren die jo sellesmol uffeme Hof, ganz owwenuff iwwerm Alsenzdal.

Loinigerhof hod der sich genennd. Wunnerschääne Felder un Wisse drumerum, soweid mer gugge kunnd.

Dort hods gewohnd - 'S Gredel im Grüne"

 

Ich wääs noch, de Babbe had sich in de Firma exdra e Audo geländ, dass mär do enufffahre kunnden.

Was die do alles uffgefahr hann, es Dischblaad hod sich dorchgebo.

 

Moi Momme had uns zwä Dehääm schunn ingeleud, bloss ned soveel se esse.

 

Zum erschdemol in moim Lewe hunn ich dort Banane gesieh, die hunn ich ned gekännd un dass Kinner e ganzes Schnitzel kriehn, des hods bei uns Dehääm aach ned geb.

Die Fraa dort hod uns die Deller vollgescheppd un moi Bruder hod dorch de ganze Saal geplärrd " Mama, guggemol, die hod mer e ganses Schnitzel uff de Deller gedu, derf ich des esse"

Die Fried is rod wor, alswie e Tomad. Ach Goddachgodd.......

 

Des Middagesse war erum, die Schbülmäd hunn abgeromd

(jo, die hadden exdra Mäd fer die grob Awed gehadd), awwer ned nor an demme Daach, nää, immer - 's warn hald reiche Vewandte.

Mir Kinner durfden enaus spiele.

Es Gredel hod hald aach gons schää ogeb mid all Ährem Sach, was sie alles hunn un so.

Moi Bruder war, glaawisch e bisje neirisch.

Uff alle Fäll isser uff de Mischdhaufe gekrawweld, gons owwenuff, wo de Goggel sich alle Moije hieschdelld fer se krähje.

"Äätsch, des trausch duder awwer ned" rufder zu dem Gredel.

Des, ned faul, krawweld im foi Kläädsche mid de weiße Schdrimbelscher un denne foine Schuh uff de Mischdhaufe.

Jetz hod de Unser jo genau gewissd wasser machd, weiler jo immer bei's Herr Weisers geholf hod de Kuhschdall mischde un de Mischd uff de Haufe se fahre.

Der hod gewissd wumer gefahrlos schdehje kann.

Es Gredel awwer ned.

Des is denne Mischdhaufe veel so weit newe ogang un baufdich hods im Puhlloch gelä.

Ach du moi liwwer Gott, hod des geplärrd.

Gut dasses en Mann, der wo do aach inngelad gewess war, der hod des gehärd -  hod  wedder Vadder noch Mudder gekännd – hod sich mid soine foine Sundaachsausgehklamodde iwwer de Puhllochrand gehängd un hod des Gredel an de Ärm gegreff un erausgezoo.

Des was voller Puhl vun de Hoor bis zu de Schuhschbitze.

Moiner Lewedaach hunn ich sowas nimmie geroch (doch hald, grad widder, wie ich dorch Middelbrunn gefahr bin, des Kaff schdinkt wie Sellesmol, es Gredel).

 

Dem soi Mamme war am jäämere. Moi Känn, moi Känn -  un der schääne Daach is vesaut, weeche dem ugezoone, dormeliche Bangerd (dodemid hoddse moin Bruder gemäänd)

 

Die Määd hun misse inheize dass des Gredel hod känne gebad un geschrubbd werre.

Der Mann muschd aach annere Klääder oziehje geh. Der hod awwer ned soweid eweggewohnd un do wars ned soooo schlimm. Awwer.......

 

Moi Briedersche...ohauwahauwaha...... Der had an dem Daach, wie eischendlich immer soi Ledderhosse ogehadd.

E paar schbeggische hadder fer alle Daach un die bessemere fer Sunndaachs – jo un die hadder o.

Die Fried war sauer – die Fried war sowas vun sauer.....die hodden üwwers Knie geleed, die Ledderhosse schdramm gezoo un hoddem's Ärschje geduwaggeld.

Wie des zobbd, des känner eich jo denge. Der hodd gekresch wie en Ochs am Schbiess, die Fried hod ned loggergeloss, bis Ähre die Hand weh gedu hod.

 "Du Saubangerd, du useelicher, hoddsene geschännd – wääsch du dass des Gredel hädd känne dod soi, vesaufe hädds känne un veschdigge aach. Du dummer Bu, du dummer.

Kannsch vumme Gligg saa, dassem nix bassierd is.

Mär fahrn jezz Hääm un dord redden mer nommol gewaldisch üwwer die Sach."

 

Alla, es war so, dass unser Eldre sich do so veschrogg hann, dass moi Brierersche e gonsie Zeitlang kää zuggerlegge g'hadd hadd.

Die Momme hoddene gefrood warummer des gemach hod, er hod doch genau gewissd, dass des Gredel do ins Puhlloch falld.

Er war neirisch, weil des Gredel gar so ogeb hod.

 

Do hod uns die Momme gelernd, dasses noch veel mäh Leid gebd uff dere Weld, die wu mäh Besitz hunn alswie mär – dassmer desdeweeche awwer nimmand neirisch soi derf.

Ähr Kinner, hod se gesaat.....mär hun uns, sinn gesund, de Babbe hod Awed un mär hun unser Brot üwwer Naachd Dehääm. Des muss uns genung soi un des is aach viel mäh, alswie so manch onnere Leid hun.

 

Noch lang denooch is sich vezeeld wor "Ohr hod des Gredel sellesmol geschdunk"

Mich hods mords geärjerd, weil ich ned ä Schdigg vun all denne schäne Kuche un Torde esse gekännd hun.

 

Ich denk do immer dro, wann mich im Gaade Jemmand no dem Blimmelche froot, wo glei Vorrenin so schää blieht.

Des häßt nämlich aach "Gredel im Grüne"

(Jedenfalls, wääs iches so vun moiner Momme)

en liewe Gruß -

eier~~paelzermad~~