Geschichde vunn Dehääm

Üwwers Wocheend war ich do ufferer Klausurtaachung in de Südpalz.

Imme vier Schderne Hodel, midde in de Woiberje geleeche.

Allää die wunnerprächdisch Fahrd dorch die klänne malerische Woiderfscher is schun was fers Dräme. Iwwerall hängen die Rewe iwwer die Gässjer un Blumme ball an jedem Fenschder. Alle Gebodd siehd mer e uffenes Hofdor mid uffgebaude Schdännscher devor.

Do gebds Persching,  Äbbel, Qwetsche, Beere, Grumbeere, Salad, Gummere un alles was do jezzerd grad reif is, se kaafe.

Fer des alles richdisch osegugge muss mer ohalle un ausschdeije.

E Uzahl vun Mensche, Audos un sogar Busse drängeln sich dorch die enge Gässjer. Manchmol määnd mer grad - kää Schongs, do kumm ich nie im Lewe dorch, awwer uff wunnersamie Weis gehds dann doch.

Ogefang hod die Taachung Freidaachs Nomiddaachs. Z'erschd mol zwä-drei Schdunn was geschaffd, awwer dann en gemiedliche Omend middeme gude Esse un emme legger Woiche. 's es jo e bissi schbäd wor, bei nedder Unnerhaldung un e b'sunnerschd romandisches Flair uff dere groß Terass. Ich war die äänzichd Fraa unner lauder Männer.

Geschloof hun ich wie gebobbeld inneme Dobbelzimmer – Was määnche, ob ich allä war – alla, alles bin ich deer jo ned grad uff doi Neigiernos. **g**

 

Samschdaachs Moijens in de Frieh bin ich enunner, enaus vor die Dier.

Was fern Obligg.....

Rebschdegg soweid ich gugge kunnd. Trauwe blaue und griene, richdisch schääne digge Hängel – Die Sunn is grad uffgang, die Vechelscher hun aus de Hegge gepeff. Klääne Eidechse hunn sich uffem waame Schodder gesunnt. Blummebeede, odder besser gesaad Blummeflegge in voller Prachd, ingefassd mit Waggerschdää.

Garned weit eweg  schdehd e ehemolisch Kloschder, wu Heid aach e guudes Drebbsche gemach werd  - un vorrischmär de nahe Wald, owwenuff, dort lääfd e Sesselbohn uff die Burch. Die war ich mir Freidaachs schun ogugge.

 

So schää, so en Friede.....Ich kunnd mich gar ned satt gugge – wär gern geblibb...

Mär gebd sowas am friehe Moije aarisch viel, ich sauch des uff wie en Schwamm un geheer dann aach widder gern zum "Salz der Erde"

 

Des Friehschdigg no dem Genuss, war dobbeld gut.

Bis um ään Uhr hunn widder die Kepp geraachd, dann nommol e vier Schderne Esse, so mid allem Drum un Dro....un dann - ab Hääm.

's war ääfach schää........

 

Was machschen wann de e Schlang im Gaade siehsch?????? –

Ei ooschdelle, was'n sunschd. 

 

Nää, awwer jezz mol Schbass Beiseid – Ledschde Mondaach gehds Gaby enunner in de Gaade. 's will die Bohne robbe un Tomade, die wu rot leichden bis enuff ins Kichefenschder.

Wies do so de Gaadepaad lang leeft, siehds uffemol, wie sich driwwe beis Schwowe Gadedeerche was beweche dud.

Ach Gott, denkts noch so fer sich, was waren des awwel – gehd uff des Deerche zu un schnerrt direkt serick.

Fauchd doch do e diggie-feddie un gar ned kläänie Schlang es Gaby wierisch o.

Die leid do uffem Beddon un sunnt sich, wolld jo wahrschoins ned geschderd werrn.

 

Es Gaby war gelähmd vor Schreck. E paar Minudde esses schdeggeschdeif do geschdann, de Mund uff fer se kreische, awwer es kummd kää Word üwwer soi Libbe.

Es hodd die Schlang ogeguggd wie hipnodisierd un no Luft geschnappd.

 

Ach du Scheiwekleischder, wu kummd die dann hää - un wassem in dem Aacheblick so alles dorch de Kopp geschoss is.

 

Uff äääämol renndes los un kreischd "Friedel, ans Schwowe Gaadedierche is e Schlang"

"Ei wen kännden ich do orufe – die Bollezei, die werrn wisse, was do se mache is".

 Gesaat, geduu......

So ugefähr e halwie Schdunn schbäder klingeld en Mann un e Fraa an de Dier.

"Ei mir kummen vum Dierschutzveroi aus Marem – ihr hädden do e Schlang"

Jo, un was fer äänie, saats Gaby und fiehrd die zwä an des Schwowe Gaadedierche.

 

"Ja, wo is die dann jezz, do hoddse gelää – achgoggachgodd, wann die jezz in unserm Gaade is" seed's Gaby ganz uffgereechd.

 

Der Mann hod en lange Schdegge debei un schdocherd iwwerall in de Bisch un Planze erum. Z'erschd ins Schwowe Gaade, dann bei Ähne driwwe. Die Tomadeschdeck, die Bohne, die Rhabarwerblädder – iwwerall schdeggder soin Schdegge eninn un schdocherd do erum.

 *Nix*  Die Schlang is nimmie do.

Ei Fraa, saat der Mann zum Gaby – sie hädden die Schlang feschdhalle misse bis mir kummen.

"Ich glaab Sie hunnse ned all am Seijer, Ich die Schlang feschdhalle, ich loss mich doch ned beisse".

"Näää, seet der Mann, hädden Se mol bloss e Sack driwwer geschmess, odder en Äämer drüwwergeschdilbd. Des hädd schun gelangd."

 

"So finnen mir die jo nimmie, das hodd do kää Wert mäh -  mir gehen un die Rechnung schiggen mir Ähne zu"

's Gaby war baff gepläddeld wie bazzisch dass der war un had gar kää Worde.

 

Am annern Daach hod der Veroi bei meine Momme ogeruf un dere den ganze Schamass aach vezeehld. Die, glei bei mir ogeruf, weilse des jo nimmie so gud veschdeje kann un ned gewissd hot – was mache.

Ich war der velleichd sauer, was der Veroi sich innbild.

Kummen aaschschbäder mol o un männen, die Schlang waad bloss uff die. Dann noch velaude se losse, die Gaby hädd geloo un'se veäbbeld - Un mid dem Kram moi Momme, e Fraa vun achzich Johr un ned gesund, am Dellefon se belächdische.

Ei  ich waad nore uff die Rechnung – dann is awwer Pole uff un Russland zu.....

 

Dasses Gaby ned geloo hodd, wäss ich, weils seid dem Daa nimmie in de Gaade gehd – vor lauder angschd die Schlang kännd doch noch do eijenswu sinn un es beisse.

 

"Was machschen wann de e Schlang im Gaade siehsch?????? –

Ei ooschdelle, was'n sunschd".

 

Alla bei dere Art vun Schlang losse mer des velleichd doch besser sinn, odder.......

Sundaach, korz vor zehne  - Zeit fer in die Kerch.
's Kaddel grießd "Gemoin Herr Parre", nickt no Rechts un Links un hockt sich glei in de erschd Bamk vorre anne

De Parre preddischd vun Sell un Jemen, vun Sodom un dem Annere aach  - Lieder werren gesung - un noch im Paule Ruddolf soi Dechdersche gedaafd.

Dann is die Kerch aus un nore die wu noch beichde gehen, die bleiwen hogge.
's Kaddel hoggd aach.
's hoggd un hoggd noch immer wie längschd de Ledschde außem Beichdschduhl widder erauskumm is.
Do siehd's de Parre hogge un froot "Ei Kaddel, du hoggsch jo immer noch do, willsche aach beichde odder hosche Kummer"

Nää saat's Kaddel, "ich waad nore bis Sie de Klingelbeidel ausleeren.

"Waaaaaaaaaaaas", guggd de Parre gons entrüschd,
"wie käämischen dezu vor deer de Klingelbeidel ausseleere – was gehden dich des o, wie veel Geld do sammekumm is"

"Ach Herr Parre, ei des will ich jo garned wisse, des dud mich jo gaaaaaarned inderessiere"
awwer moi Kall, dä hod an soine beschde Schaffhosse de Knobb velor-
un ich wolld hald mol gugge, ob in dem Klingelbeidel velleichd ebbes bassendes debei wär"  :-)))))))

© paelzermad 2007

Dort owwe uff de Owwerhääd, glei hinnerm Schneirer Kurt soim Gaade, is mer abgebo enuff  in die Siedlung.

Ofangs schdehn jo schääne Äfamilieheisjer, awwer je weider mer enuff kumm is, umso abendeierlicher esses worr. Do had die Schdadt e paar Baragge gebaud un lauder aame Leid eningehoggd, die wu kää Awed hadden.

Dort hot's aach  gewohnt, es Freilers Roswidda.Ritzerode Hoor hods gehadd, feierrod, loggisch und wallend bis uff de Buggel - un Summerschbrosse, jessas, do war kää freier Platz mä,  im ganz Gesicht ned. 

Leider hods des Sell ned so mid de Sauwerkäd gehadd. Middem Wäschlumbe hods uffem Kriechsfuss geschdann un en Kamm, mid dem wars aach ned grad per Du.

E Hoorberschd, sowas hod mer Dortmols noch ned gehadd. Gemoschderd hod sichs als, wies Kaddel am Sundaach. 

Schbäder, viel schbäder erschd hunn ich kabierd, dass des Roswidda gar nix anners fer oseziehje had. Kä so schäne Kläädscher wie mir Mäd vunn de Unnerhäd, kä so schäne Scherzjer mid Rüschebennel droun selwerd gehegelde weisse Schdrimbelscher.

Dem soi Momme had wahrschoins kä Geld üwwerisch  fer Woll se kaafe orrer  Schdoff.

Geschäämd hun ich mich schbäder, wie ich des emol kabierd had, aarisch – awwer erschd mol hun ich midgemach, wann die Annern des Roswidda an de Hoor gezoo un gehänseld hun.

Alle Daa bevor die Schulglogg gebämbeld hot, war des Määre denne  Ofeindunge vunn soine Mitschüler ausgesetzt. Ich wääs noch, wies emol uffem Schulhomaiersche gesess un gegroind hot.

De Lehrer Ruff hod de ärgschde Üwweltäder am Ohr genumm un üwwer de Hof mit in de Schulsaal gezerrd. Ohauwahauwaha....Do war was gebodd.

Allminanner hämmer Schdrofarwed krieht un die Mamme es  bei de Direx beschdelld wor. 

Dehääm hoddse sich higesetzd un mär dann erklärd warum des Freilers so aame Leid sin un dass mer so wieschd nid soi derf zu Aameleidskinner. 

Moije will ich, dass du doi Lewwerworschdebrot im Roswidda gebsch. Ich will sieh dass du was kabierd hosch -  un weh du machsch des ned. So hoddse gesaat, moi Momme.....

Jo, die war im Kriesch Owwerfeldwewel beim Rode Kreiz un wannse denne Ton druff g'hadd hadd, do war mer besser berot, wammer geheerd hod. 

Am näxschde Moije - Ich hun hie un här üwwerleet.....was, wann ich dem Roswidda die Hand un moi Brot geb un die Annere siehn das. Ich bin doch unnedorch fers Lewedaach.Awwer wann ich's ned mach –  ned mach, was die Momme gesaat hod.....Also -  es Minneschde is beschdimmd Schduwwearreschd, kää Fernseh un ned midde Freind Nomiddaachs draus rumhänge.

Kää Fedderball schbeele un aach ned mid de ald Zinkbadebidd die Ombach enunner schibbere.

Alla, ich hunn e Weilche zugeguggd, wie die Annere des Roswidda widder gepiesakt hun, hun mer en Ruck gebb, bin eniwwer beis un hunnem moi Lewwerworschdebrot higehall.

Du Roswidda, wollemer mol dausche. Ich hunn immer so Worschdebrot debei un ess des aischendlich gar ned so gere, saa ich zu'rer.

Moi Bauch hog glei wierisch geknorrd, weil des jo geloo war. Uff Lewwer un Bludworschdebrot war ich nämlich säächnarrisch. 

Es Roswidda wolld erschd ned, weils jo wuschd, dass ich aach zu der "Bande" geheerd han, die wu's immer ärjern. Gedengd hots, dass bei dem Brode dausche, beschdimmd nore widder was wieschdes eraus kummd.

Kumm Roswidda, schlaa in - un loss uns Freundinne sin, saa ich un hunnem die Hand hiegehall.Es guggd mer in die Aue, e gansie Weil.

Ich denk, des glaabd mer nie.....doch uff äämol, so gans langsam schdreggdes soi Batschhand evor un e Lächele laafd üwwer soi Gesichd.

Do hods bei mir Peng gemach un ich wuschd, dass die Momme Reschd g'hadd hadd. 

's Roswidda hod mir soi Safdebrod gebb un ich hun sogar mol nin gebiss  :-)

Seid dem Daach hod sich Känner mäh annem vegreff. Sie hunns in Ruh geloss un irschendwann hodds aach ääfach dezugeheerd un alles war Schnee vun Geschdern.

Es hod vun uns aach Klääder krieht un annern Sache, hod gelernd wiemer sich sauwer hald un wissener was.

Es Roswidda war e wunnerhübsches Mädsche un viele Johre, bis die Zeit uns getrennt hot, e Freundin wumer sich felsefeschd uff velosse kunnd. 

Ich wissd Heid mol gern, was aussem worre is, wus lebd un wiesem gehd....