Geschichde vunn Dehääm

 

Des muss ich eich jo jezzerd grad emol vezehle.

 

Hadden mir doch do in de ledschde Woch Besuch vunn "owwenaus" do hunne bei uns in de Palz. Aarisch liewe Leid.

 

Hann die vunn owwedrauß doch noch nie Trauwe direkt vum Schdock weg gess -  glei gaaned Rolle voll Trauwe gesieh - un wie die abgelad werrn.

De Treschder laaft es Ferderband enuff un de Trauwesaft in Fässer, unne im Keller.

Mir kennen jo des alles, vum Reewe schneide o, bis hie zum Moschd un "Neije" prowiere.

 

Der hod iwwerischens dammisch legger geschmeggd zu Handkäs un Mussik.

Aus de Vorrerpalz war e goldisch Pääsche aa debei.. Die hadden die gans Bagaasch dodezu inngelaad.

Er had eijens fer denne Daach, Handkäs ingeleet in Riesling. Zwiwwele geschnidd, Gewerz un Essisch samt Eel , alles debei gehadd.

Soim Soins had gequellde dezu, uffeme Gaskocher gedämpd.

"Neije" hodds aussem Kanischder, direkt in die Schobbeglässer se tringe geb. Awwer kää so e Schrichbimbulibockforzelorem ;-) , nääääää, e  guuuudes Dreppsche wars......

 

Des war in Muschbach, bei de Meggenemwer Winzer drin.

 

Ohr hadden die zwää sich e Aawed gemach, fer Leid, wuse neddemol gekännd hann.

Ei häär, do hädd moim Vadder soi Dochder sich grad dro gewähne känne. E digges "Dangeschää"

 

Hogge dud mer urgemiedlich un genieße kommer "Herzwasbegehrschde" vum Moschd, Neije un Bizzler, üwwer Flamkuche, Zwiwwelkuche, Woiknorze un Worschd bis hie zu de Trauweschmär.

 

Muschd hald, wannde fahre muschd, e bisje uffbasse weil, der Neije kann äm ganz schä es Härrn venewwele.

 

Daags druff waren mir allminanner dann ingelad beime werglich liewe Monn vun siwwenesiwwezich.

Der had en Budderkuche gemach, selwer, wuhlgemergd mit Mandle owwedruff – sooooo look, sooooo leicht, – Hut ab, do kammer noch was lerne.

En Quetschekuche, mimme Hefedääg zum nerrerknie –  ei do kännd sich e monschie Hausfraa e Schdiggelsche devunn absäwele.

 

De Disch war schää gerichd, grad wie wonns "Lisbeth" persäänlich vebeikumme ded.

Vezeehlschers vunn Drowwe un Drunne, oomass. Kaffee debei geschlawwerd un de leggere Kuche vebuzzd.

*Wie bei Käänichs*, des beschreibd denne schääne Nomiddag.

 

Jo Dunnerschdaags wollden mir jo z'erschd uff die Gaadeschau, awwer des is viel se laafe un leirer warn fussmässisch ned all so gud benanner.

Alla hummer des sinn geloss. Schdatt desse warn mir Omends uffem Bremerhof un hunn dort was gemach? – klar *esse*

No all dem veele Flam-Schbeck- un Zwiwelkuche muschds aa mol widder e gud Schiggelsche Flääsch sinn mit Pommes un Salad.

 

De erschde un de Ledschde Daa vun dem Besuch, war ich jo ned debei, awwer soll schää gewessd sinn, middem Wohnmobil so e bisje dorch unsern Palz se gondele.

Iwwer Johanniskreiz, vebei an de "Weltachs" midde drin im Pälzer Wald.

 

Alla, - 's war mol ebbes anneres fer die Großschdädder - un die wu nore's Wasser kenne duud.

Ich kenn dodefor moin Pälzer Wald un will aa mol widder enuff ons Wasser – wann nimmie Desjohr, awwer bald  ;-)

 

Schää wars..... :-)

Ä Kichegedichd

 

Die Kich soo schnuggelich un uffgeraamd – iss wovunn jedi Hausfra draamd.

Probbesauwer schdehd dann alles do, vum Gescherrschrank bis zu de Kichewoo.

 

Doch is die Momme mol in Kur – herrschd ball es Chaos  - un des pur.

Weil wann de Hausmann dud rechiere, die Ordnung duder ruiniere

 

Kää Ohnung vunner Mikrowell – nixdesdodrotz, eninn un zu – es gehd jo schnell

Laafd ebbes iwwer un gebd Babb – machd nix, beim näxschde Koche platzt des ab.

 

Kummd die Mamme dann serick – un fräät sich uff Ähr beschdes Schdick

Die deier Kich, die schääne, was muss die dann zum Schreccke säähne.

 

Es Gescherr- määschd Scherwele un Schdigge - im Kicheschrank filld des die Ligge.

So zwische Zugger un Kakau – do war noch Platz, des bassd genau.

 

Die Tepp un Panne voller Dreck – vunn kaldem Fett un aldem Schbeck.

Die Rechd vum Esse klewen in de Egge – uff de Fliese braune Flegge.

 

Die gud Fraa triffd faschd de Schlag – de Hausarzt kummd glei am Dunnerschdaag

Un schdelld die Diagnose nur – Die Fraa, die muss soford in Kur!

 

So schliessd sich aach do de Kreis des Lewens

raam nie ned uff, es iss vegewens

loss nor alles wie bei Hembels owwenuff – des rächd sich sunchd - veloss dich druff. ;-)

 

Geschribb hodds eijenswu Ääner - Nor wers war, wääs Kääner 

umgedichd hunn ich, bassend zu de Pälser Kich.... ;-)

 

Allweil kummen'se aus alle Richdunge, mid Audo, Fahrrad, Bus und Bahne

un tringen denne gude neije Woi.

als Unnerlaach gebds Grumbeersupp, uffgemozzd mid Sahne

wie kännds aach annerschd soi.

 

Derweil muschd schlitzohrisch sinn, willsch aach en gude Platz vewische

die Selle dränglen nämlich iwwerall eninn.

De Berll flie't uffen freie Platz un land gekonnd uff ääm vun denne Dische

Bauff, schunn hoggsche midde drin

 

In Woilaun werd vezeeld, gesung un mid Musik geschungeld

Feez, Weck, Worschd un Woi.

So gehd's frehlich, munder weider, bis mer sich kennt un bisses dungeld.

Wie kännds aach onnerschd soi.

 

Wär so e Woifeschd mol erlebd hodd, dem gefallds un der kummd ned allää, wanner widderkimmd

Schliesslich sinn mir do in de Pfalz Dehääm, wu's bassd un ewe alles schdimmd.

 

Proschd Gorschel – 's kummd en b'sunnerschd Foine

Vun denne neije Pälzer Woine J

Saa mir en Satz mit sr, awwer saa jezz nix vekehrdes.

Genau – "'sräänd"...... un wie.

Des is zum Gäsbock melge. Do frääd mer sich uff so e bisje Urlaub un was is, -  'sräänd"

Grad wie wanns äm Ääner ned gänne ded.

Oor, ich wääs aa schunn wer des ess.

Des ess beschdimmd die dusselich Trulla, wu in Mannem hinner mär gehoggd hod.

Jo, beschdimmd, die esses, weil – die hod so neirisch geguggd, wie ich do vezeehlsches gemach hann, vun weeche Urlaub un drei Woche bloss noch tralalala.

 

Ooch hänn sie's gud, sääd die, ich krie kääner. Mir hunn soviel Ärwed, do kann de Chef ned uff mich vezichde.

Jo saad ich, moi Chef is froh wann ich emol fer e paar Daach die Deer drauss bin un die Gosch hall.

Joo, gehford määnd die, des glaawisch jezz awwer ned.

Klor, kännense des glaawe -  mä muss nore  wisse wie mers Hunnsche fierhd dasses ned uff's Schdriggelsche scheißd.

 

Zwää Woche bevor ich Urlaub hann will, babbel ich dem e Ohr ab un wirrer dro, immer wanner die Deer erinn kimmd.

Des hald en Schoggelgaul aus Oascheholz ned aus – un ich krieh Urlaub......

Die hod mich ogeguggd, wie e Hingel wanns blitzt.

Fraa, lach ich, machense die Gosch zu, ehb dasses Herz kald werd.

 

 

Moi liewer Scholli – Geschdern im Gaade.... 

Vier große Quetschekuche, zwää defunn mit Riwwele un zwää ohne -  un so schdigger zwonsich Lidder Grumbeersupp, hänn die vebuzzd, wie nix.

Ei beinoh hädden die geguggd wu noch määner hääkummd.. 

Ääni fun de Fraue, is aach schunn üwwer de fuffzisch, awwer e rassisch Fraa un gerdeschlank Elvira hässt'se.

Ich hun geguggd wie e Audo. Ei des hod jo drei Deller Supp eweg gemach un vier Schdigger Quetschekuche.

Soi Monn hod nore mirrem Kopp geschiddeld un mir hann uns gewunnerd wu des Perseenche des alles hieschaufele dud.

Wie's dann endlich ferdich war, is soi Mann bei's an de Disch – hodds iwwer de Kopp geschdräächeld un ganz zärdlich zum gesaat.

"Schatz, soll ich der noch e paar Aijer bagge, ned, dass'de ned satt wersch. ;-)  :-)  ;-)  

Mir hunn uns ball die Bux veschdrulld, vor lauder lache :-)