Geschichde vunn Dehääm

Vekaafsuffene Sunndach un was war ich mer kaafe "Schuh" :-)  - ähr hunns erfassd.

 

Dunnerkeil, is der do was los in Lautre, obwohl's  Binnfärm räänt.

Erschd muschd ich mer jo mol Knede hole un dann ab enuff ins Induschdriegebied.

So hääsd des bei uns, drauss vor de Schdadt wu ausser Schuh- un Mewelläde aach noch viele annere Geschäfde sinn.

Moi Kolleesch hadd dodevor so Personalschoi midgebruing. Domid gebds uff Jeed Paar Schuh 20%

 

Des Schuhcender is ball üwwergeloff, awwer des machd faschd gar nix.

Moi Monn hod glei emol so e Prowierschdiehlche mit Beschlaach beleet, so - des war mol schunn sicher.

Ich hunn de Geldbeidel gesicherd un dann is losgang mid prowiere.

 

Schdänder, solang mer gugge kann, voll mid lauder Pariser Schiggelcher, ääner schänner alswie de Onner- un ich schdeh do mid moine Dunnerschberjer Fies  ;-)

 

Der schwazze do, uih....sogar en Lackschuh, chic....oprowierd - bassd ned. Entwerrer is der Schuh veel so eng orrer Heid sinn moi Fies e bisje digger. Kummd sicher vunn der hoggerei die zwää Daa uff dere Taachung do.

 

So eng - kumm ned eninn - veel so deijer - kää gescheide Sohle, aaschgladd - wannse ned so bribrabrinselich wärn - Jööööö, bei änunzwanzisch hunn ich uffgeheerd se zähle.

Die rodbraune do, die wärn jo was fer uff moi neije Hosse - Häär, die bassen - ab ins Kerbsche mid.

 

So, kämmer dann geh, sehd moi Monn, Gottseidong, do isses aarisch voll.

Waad noch e klää bisje, ich muss do nommol was gugge un fer die Momme brauch ich noch e paar Schlabbe.

Die Schlabbe-echde Romiga un gar ned deijer - werrn schun basse, ab ins Kerbsche.

 

Hallo - Hallo Sie, des is awwer moi Kerbsche was sie do grad gekrazzd nunn. Gewizzeldunnerkeil - Kännd Jeder kumme, im Annere soi miehseelisch sesammegesuchde Schuh rausschmeise, nore dasser e leer Kerbsche hod - Ja wo simmer donn.

Die gebds Kerbsche häär un machd sich vum Agger :-) 

 

Ach du moi liwwer, des sinn jo gar ned moi Schuh, die selb Färb, awwer veel so klää.

Desdo Kerbsche schdellen mir mol brav un sauwer do ins Eck, 'tschuldischung un nix fer uugut, gell  :-)

 

Ach Freileinche, hunn sie aach noch was schwazzes in 50 - 's wär fer moim Vadder, soi Dochder, de Bu ;-) ......

 

Kämmer donn geh... Ich schlaa drei Kreize wann mir do jezz geh kännen. Des Schdiehlsche hännse mer nämlich gebadderd un ich kann nimmie schdeh - seehd moi Monn....

 

Alla, egal wie aach immer....Mir sinn midde FriedaElissabeth ähre Schlabbe un vier Paar Schuh enaus un hunn üwwer 50 Euro geschbard......toll gell  :-)

De Babbelbawwed soi Dochder, bei däre schdimmd jo aach der Schbruch:

"De Abbel falld ned weit vum Beerebaam"

 

Geschder hunn ichse gesieh, vor de Mezz middem Krischdmann Hoiner soiner Fraa – es Ellis, vezeele.

Määschd ned wisse, wen sie werrer dochgehecheld hunn, jerenfalls hod des Sell soi Innkaafsdaach misse abschdelle, dasses hod känne mid Hänn un Fies balaawere.

 

Ich bin bei die Gemiesefraa, hunn Tomaade, Trauwe un en Koppsalad gehol – die hunn balaawerd.

 

Ich bin eniwwer bei de Schuhmacher, hunn im klää Ernschdche soi Schdiwwele abgehol. Die hunn misse nei besohld werre, eb dasses Sauwedder kummd - die hunn balaawerd.

 

Ich bin bei de Bägger Engemann eninn, dort wars Weißbrod fer de Sunndaag beschdelld, hunn noch e "Schwazzes" midgenumm, die ald Burchderfern hod e bisje vezeelt mit mer,  bin enaus - die hunn balaawerd

 

Ich bin in die Mezz eninn "'nDach" gesaat beim vebei gehje, die hunn mich neddemol gesieh.

's war bummervoll, ich hunn gewaad, hunn moi Fleesch un Worschd gekaaf, bin enaus  -die hunn immer noch balaawerd.

 

Du moiner Seel, denk ich fer mich, wie kommer nore so ellelang Vezeehlscher halle.

 

Ich kumm ums Eck, do schdehd es Babbelbawwed  bei de Schmidden vor däre ährm  Fenschder.

Gemoije Lina rufen die zwä mer  freindlich schunn vunn weirem zu.

Du, wääsche schunn's Neischde, de ald Schbächle is geschdorb uns Moniga, was jo soi Enggelsche iss, des hald Heid trotzdem soi Hochzich, denk deremol do anne.

 

Nä, gehford, no do heerd sich doch alles uff, saa ich un schdell moi schwerie Dasch mol e *Aablick* ab....

 

Aischendlich wolld ich jo Grumbeerpannekuche un Abbelbrei mache – nore war's mer dodefor jo dann Geschder e bisje knapp.

Alla de Hannes essd die aach noch am näxschde Samschdaach......

 

 

Okdower is – Geschdern war ich gugge, die Grumbeer missen raus., saat de Hannes Moijens am Kaffeedisch.

Ach du moi liwwer, jezz schunn,

schunsch esses doch zerschd gee Monatsenn, määnts Lena.

Ich bin grad midde im Beereschmär koche, es iss jo aach noch veel so waam drauß, waad noch zwä-drei Daa.

Nix – moije frieh um finfe rabbeld de Wecker, donn gehds enaus uff de Grumbeeragger.

Mer machen erschd mol des halwe Daachwerg.

Des annere sinn jo Schbädgrumbeere, die kännen noch e bisje schdeh.

Die Leid wissen Bescheid.

Schdigger zehne sinns,  richd dich in.

Um Uhre neine machemer Paus, do will ich de Kaffee fer die Leid, frisch Brot, Hausmacher un Latwärch draus hunn. Die Leid hänn Hunger.

 

"Jezz horsch der mol do anne - so e Hosselatztrummler –

hodder schun werrer angschd, mer kräächden die Grumbbere ned frieh genung in die Scheier – so en Knoddelkärchler, e richdicher Knewwel hald"

knodderds Lena vor sich onne.

Muss ich deer do jezz uff die Naachd nochs G'scherr richde,

die Kanne schbiele, die Bixe mid de Worschd

un minneschdens drei Gläser Latwärch zammeschdelle.

Zwä große Gläser Gummere debei, die essen die Leid immer gern.

Ach hald, schdobb, beinah hädd ichs jo vegess.

Fer de Kloine Filp e Schisselsche mid frischem Rahm.

Der schmeerdene so gern uff soi Latwärchbrot. Dodefor lossd der jedie Worschd schdeh.

 

Wann ich so an Vorsjohr denk, die hunn'der ganz schä dick geschmärd.

Es Rämers Katrina hodd de Latwärch so dick druffgeschmeerd, dass ichs gefroot hunn, obs Uffschdellerscher brauch.

Ich häddem aus de Hasselrude am Waldrand schnell e paar geschnizzd**g**

Alla, beim Latwärchkoche hodds jo geholf,

awwer desdewä brauch sichs ned beim Grumbeer raffe dorchsekaue bis uff de Borrem vumm Henkelmann, des Sell.

 

Zwä- drei Kännscher Neije werr ich aa noch midnemme un Glässer.

Auskreische hunn mär uns noch nie geloss un fer ummeschunschd hod bei uns aa noch kääner schaffe misse, sinnierd es Lena so beim schaffe.

Un im Hannes soi Peifsche un de Duwwak, do frääder sich.

 

Moijens - 's is grad am gro werre.....

Fuffzeh Weirekärb werrn uff de Pluggskerch gelad, die Zentnersäck un e paar Maldersäck fer in de Paus sich druffsehogge.

Die Leid wu raffe helfen, kummen so no un no uff de Hof.

De Filp fahrd de Trakdor, es Bettsche fahrd glei mit.

De Hannes schbannd de Braune in un los gehds, enaus uff de Agger.

 

So die sinn ford, jetz mach ich mich an de Kaffee un des Fünfpinder muss jo aach noch geschnitt werre.

Es Lena schneid den Brotlaib in de Midde dorch, weil die Schdigger aach so noch riesisch werrn.

Dann nemmds' die ään Hälfd vor de Bauch, setzt es Messer o un sääweld die Scheiwe akuraadsche erunner. Äänie so dick wie die Anner.

Des muss so soi, schunnschd kann de Hannes en Dunnerkeilse fahre losse, wanns Brot vekruzzd is.

Es Burgards Fiene helfd alles in die Kerb veschdaue, enaus ins Audo traa, dann fahrn die zwää aach uff de Agger, drowwe am lange Grawe.

 

De Filp hod schunn ball alle Reihje ausgemach un die Leid sinn am raffe.

Alle Gebodd schdehd en volle Grumbeersack newer de Reih.

's kummd aach vor, dass Welle vehackt sinn, orrer so klää. Die kummen bei die Saugrumbeere extra uff en Haufe.

Die Fraue raffen in ährne Schorz un sordiern dann in die Kerb. Die Männer kibben die schwere Kerb in die Säck. Hand in Hand werd do geschaffd.

 

Es erschde fandg leis o "ach moi Kreiz", es zwädde määnd "'s kinnd Kaffee gewwe" wie grad de Hannes rufd. "Paus ähr Leid"

Eilends werrn die Maldersäck ausgeleet, dieKerb ebei geschlebbd un die Kaffeekanne.

 

Ach Lena, doi Brot – sowas Gudes un de Latwärch – e Gedichd.

Hannes, du hosch ääfach es Beschd Maad vunn da Haad vewischd.

Jo, bagge un koche kanns Lena – alles was Rechd iss.

Eier Worschd is aach was foines, schlacht eich noch de Besande Karl....

 

Es schännschde an some Daach, des sinn die Pause, riefd vunn hinne es Katrina, wu's mit de voll Gosch am kaue iss.

Ich frää mich schunn druff, wann die Schbädgrumbeere ausgemach werrn, do kochds Lena beschdimmd werrer en Kessel Grumbeersupp mit Knoddele (dicke Schweinswürste) drin

 

Do Hannes, ich hunn der aach doi Peifsche mitgebrung, kumm setz dich här.

Ach Lena, ich wäß was ich an der hunn, sääd'er un dädscheldem's Knie.

 

No de Paus wird de Reschd Grumbeer geraffd, inngesackt un Hääm gefahr.

 

So, die erschde Grumbeere sinn aus un drin, die Leid hunn all ährn Korb voll als Helferlohn un sinn sefridde. War's ned gud gedu Lena. In drei Woche gehds weirer........

Jo Hannes, hasch jo Reschd.

 

Jo - alla dann, määnd die Paelzermad