Geschichde vunn Dehääm

 

An allminanner die, wu mir fer 2007 die beschde Wünsch
geschickt hadden –

des hot üwwerhaubd nix gebrung –

will saa, des hod jo ums veregge nix genitzd.

Desdeweeche lossen die deire Winsch fer des neie Johr

am Beschde sinn - un schiggen fer 2008, entwedder Geld,

Benzingudschoi,  odder e paar Fläschjer  Rotwoi,

awwer kään Raddegiggel, 

gelle.... Danke !

  
 
In diesem Sinne...

"Eich e Gudes Neijes" !

wünscht die paelzermad

So ugefähr um fünf geht bei uns es Bäämsche o
's Chrischkinnsche kummd jed Johr zu dääre Zeit
E Jeder kaum solang noch waade ko
Hoffendlich isses ball soweid
De Babbe wichst die Schuh noch schnell
Die Momme machd Ähr Hoor, dud alles richde
De Klää driggt proweweis schunn mo die Schell
Die Maad lernd noch ää-zwee Gedichde
E Tass Kaffe noch vorher un Milch aach fer die Kinner.
Dann, die Deer geht uff un oohr wie schää - Woihnachde is dodehinner....

Es werd gefrääd, gelacht, gesung

"Frohe Weihnacht"
wünsch ich vun Herze, de Weltbevölkerung J

 

 

 Üwwermoije iss soweid..... Es Chrischkinnche kummt. 

Määschd so geje fünf Uhr häärd mer uffemol e Woihnachtslied – leis gehd e  Gleggelsche bimbam, bimbam......

Aus alle Schduwwe kummense, schdreggen vorwitzisch die Noas ums Eck.

Iss soweid, froot de Bu – iss soweit, froot die Tande, esses soweid, alla dann kumm, gehmer, sääd die Momme un drickt die Deerschleng vun de Wohnschdubb nunner. 

Oooooooohr wie schää.Es Bäämsche is wunnerprächdisch rausgebuzzd, die Kerzjer schdrahlen, die Kuchele glänzen, es Lamedda glizzerd -  des hod de Babbe ganz allää gemach.

Drummerum leijen en Haufe Päggelscher. Große un klänne – Ääns schänner, wies Anner - ingewiggeld in foi Babier, vezierd mit Schlöppscher, Bambelscher un klääne Dannezwagge.

Jo, do schdehnse jezzerd allminanner. Die Famillje un en Dääl vunn de Buggelisch Vewannschaft, erausgebuzzd wie's Kaddel am Feierdaa un waaden was bassierd.  

Mol gugge ob ich noch sauwer uff däre Fleed schbeele kann. Oh du Freehliche...des werd noch geh....

Alla, es kratzt e bisje an de Nerve, awwer äämol im Johr...do musche dorsch**J** 

Beim Fleedele sieh ich uff alle Gesichder, fett geschribb – Griwwel-Griwwel-üwwerleh*Well Päggelsche werdden wuhl moins sinn*

Ha, - wann ich die all jezz e bisje Trieze wollt, deed ich jo noch "Vum Himmel hoch, do kumm ich hää" schbeele. Soll ich.......

E Bligg ins Gesicht vunn unserm Bu ~waach dich ned~~ lachen dem soi Aue.

Vor lauder giggele du ich de ledschde Ton vehaa un "Oh du Freehliche" heerd uff middeme schrille Kreischer.......oups....Klatsche dud jo mo widder Kääner J 

In der Zeit hot de Babbe die Woiglääsjer oigeschenkt, hebt soins un winschd e Jedem

 

 

So, jezzer kann die Bescheererei losgeh.

Es erschd Päggelsche is wie in jedem Johr, fer unser Paulche. Der klää Ragger fangd mo glei o des aussenanner se nemme.

Wies weider gang ess, vezähl ich eich dann üwwerüwwermoije, gelle - weil jezz muss ich erschd noch e bissje uff dere Fleed iewe...J

 

Woihnachdsgeschenge.....

 

Fer die Momme

Was fer die Kich, prakdisch musses sinn

In soim soiner Kich bassd immer noch was ninn

 

Fer de Babbe

Was häämache musses un derf ned viel koschde

un kää Schdorzblech, des dud roschde

 

Fer Ähn

E Geldbeidel velleicht, uff alle Fäll aa Sogge

E Flächje Woi, gud awwer ned so drogge

 

Fer die Tant

E Buch, egal - Hauptsach was ze lese

Die Auswahl is noch nie so groß gewese

 

Fer de Bu

Hosse aach un Hemmer kammer kaafe

Meesd mer dofor bloss ned sooo weid laafe.

 

Fer Es

E Schdreisje geele Rose un e Pafengfläschje

Des machd sich gud im neie Lerrerdäschje

 

Hach is der des e Schdress mi all denne Geschenge

Moi Kopp, der kann schunn nix mäh Anners denge

 

Un sicher wie es Amen in de Kärch - gepiff, getrummeld un berauschd

Korz no de Feierdaa, werd alles werrer umgedauschd

 

Na dann...... :-)

© paelzermad