Geschichde vunn Dehääm

              

 

Jezz isses widder soweit – de Friehling is do,

Die Vechel peifen Moins äm’s schänschde Liedsche, die Eichhännschä machen noochschbringerles vunn Baam zu Baam, die Amschdle schdreiden sich um die Abbelschale drauss uff de Wiss,

die Ruugsdauwe ärjern se dritt de Gägerd und ä kreischd dass äm’s Budderbrot beinoh aus de Hand falld.

On de Woischdross alt wie nei bliehn die Mandelbääm,  die Rewe treiwen aus, de „Neije“ wachsd.

Ab enaus in Wald, Feld un Flur gehds  a widder un die Laune hebd sich mid jedem Blimmelche, jedem griene Schdengelche was mä ausem Borrem kumme sieht.

Im Gaade werd geschafft wasses Zeig hald un fer Oschdere alles hä gerichd.

Nexschd Woch dann, gehds mimm Bollerwäälsche ab in de Wald Moos un Haselrude hole, fer’s Oschderneschd se baue.

B’sunnerschd schää musses Desjohr werre fer de klää Schmobbes. Bis de Oschderhas kummd isser knapp zwää’ehalb un wääs jezz schunn wä de Oschderhaas is un was’ä machd ;-)

 

Es iss so - Die Vorfrääd un die Sunn lossen äm’s Herz uffgeh wie e Hefedäälsche

Zeit

eilt,

weilt,

teilt und

heilt……

 

En schääne Sunnda, voller Vorfrääd wünscht Eich

 

e ~~paelzermad~~

 

Wanns uff Ende März zugeht,

so um denne Dreh erum, erinner ich mich widder an „Dehääm“

 

Moijens, die Balgondeer weit uffgemach,

die Ägger längs de Frangeschdross enuff geguggd und gedenkt:  ääfach nore wunnerschää.

Rechts hinne uff de Wisse am Kreizweg längs, Bettsäächer soweit mä gugge kunnd,

hänn geleicht mid ährer geele Farb, e geel, so schdrahlend wies nor die Nadur evorbringe kann, dasses äm ums Herz ganz waam worr ess.
Bettsächer  wa bei Mensch un Dier gleichermaase beliebt.

Ob Ald, ob Jung, käm vunn uns was soviel, en Korb se nemme un e Messersche un ab enaus zum Bettsäächer schdeche.

Mir hadden jo immer Hingel, Hase un e paa Ende und im Friehjohr wann die Junge gschluppd waa’n, waa des e frehlich Gegagger un Geschnadder, wamm’ä o’kumm is mit frischem Bettsäächer.

Un erschd die Aijer wu’mä dann ingesammeld hodd, was hadden die en schääne geele Dodder.

Die Häsjer durfden aus ähre Hasekaschde aa eraus un hänn mid de Hingel um die Wett gefress.

Un in de Kich drinn hodd die Mamme de ganz junge Bettsäächer, awwer nor die Blädder bevor dä blieht, gut gewäsch un fer Salat gemach.

Wa’s am Samschdaa, hodds mächd Salzgrumbeer un Hausmacher dezu gebb.

Freidaags wann’s Fischaudo kam, waa zum Bettsäächersalad, Kabeljau un Buddergrumbeer uffem Disch – un anschunschde hodd die Mamme aa Aijerpannekuche dezu geback.

Des waa im Babbe soi liebschdes Esse – ausser velleicht noch Filleppscher….do wa’rer aa säächnarrisch druff un zu dä Zeit kunnd’mä Aijerpisch un Filleppscher (Feldsalat) jo aa noch schdeche geh.

Do waan die Ägger noch ned mid Gift un alle meeschlichem Ukrautvenichder geschbrizzd.

Dä wildgewachsene Filleppscher direkt vum Feld, hodd äfach besser geschmeggd.

Es buzze waa zwaa elendischie Aawet, awwer Filleppschersalat mit Zwiwwel un Griewe, des wa a ebbes ganz feines.

Bettsäächer odder Aijerpusch, wie’mä denne „Löwenzahn“ ;-) Dehääm uff de Hääd nennt,

is bei uns e MUSS, ne imme lauwaame “Dressing” se serviere.

Dodezu werd Heitsedaags (wu’s jo selde noch Griewe gebbd)

gewerfelde Bauchschbeck in Öl ausgeloss bisser knuschbrisch iss, e bisje Mehl drüwwer geschdaabd, mit Wasser un Essisch no Geschmack abgeleschd. Pfeffer, Salz, Maggi dezu und des  Ganse sämisch uffkoche.

Lauwaam üwwer die junge Bettsäächerblädder  giesse… e Gedicht!!
Prowiers ruhisch e’mol aus.

Omends gess, wersche dann schunn wisse, wieso mir BETTSÄÄCHER dezu saan ;-)

Aijerpusch nennd’märn aa weil die Blieht midde in dem Pusch erschdens aussieht wie en Eidodder un zweddens

die Eidodder a kräfdisch färbd, is dä Aijerpusch erschdemol vum Hingel gefress J

Wachse dud Bettsäächer jo’s ganse Johr, awwer schbäder naus, wann die Plänzjer älder sin un richdisch in ewe dem wunnerschääne geel bliehn,

werrn die Blädder aarisch bidder un sinn nemmie so se geniesse. Alde Planze sinn dann nor noch Ukraut un aa nix mä fer se fiddere.

Vunn de Bliede hann mir Kinner uns Kränz gebunn un uff die Hoor geschdeggd.

http://de.colourbox.com/preview/1742906-343583-nachdenklich-kleines-madchen-in-einem-lowenzahn-kranz.jpg

un noch schbäder naus im Johr, wann’ä am vebliehje waa, hänn mir ganz vorsichdisch die Schdengel abgeblickd un uns gejeseidisch die Schermscher üwwer gebloos un schunn wa de Aijerpusch/Bettsäächer a noch e „Pusteblume“ ;-)

Desdewee zum geniesse jezz im Friehjohr, ab enaus mid Korb un Messersche –

geh’sche mid :-)

 

 

 

 

 

•  

 Ei Guschd kumm mol här, des musche gesieh hann.
Guggemol ins Nochbers Gaade.
Die hänn doch en Knall..... 's iss noch vier Woche bis Oschdre un aaschkalt de Moije.
Do schdehd der Dabbschädel hemdsärmelich draus un knibbeld Plasdigaijer on de Gehannstrauweschdrauch –
un soi "Qwetschebärwel" im bloddärmeliche Bliesje, sääd'em wu hie 'rer se hänge soll.
E Bild fer die Gedder :-)

Horsch nor, wie's ne dirrichierd un dä Hosseschisser hod ned 'sHerz uffsemugge.
„Do häng noch äns hie Kunrad -  un do, dort iwwe fehlt noch e blaues.
Ei hosche noch e geeles, des bassd an den Zweich noch dro“

.....Ich lach mich kabudd, jezz hunn sich de Bärwel ähre Zoddele im Geäschd vefang.
Häärsche'se kreische......

Ei Gewizzeldunnerkeil, hallsche ball die Gosch Bawwet...ich will Fussball gugge.
Wonn dich des Nochbers ga so aarisch intressieren, geh doch eniwwer helfe.
Bisch jo bloss neirisch, weil unser Aijer noch ned draus hängen.

Awwer des saa ich dä – kumm'mä bloss Heid ned o mit denne Ferz....’s iss Sunnda.
So un jezz buzz die Platt.....

Jo, is jo gut alder Knerweler... grummel,grummel......
.....dass’des wääsch.... Ich will unserie sowieso an de Tulwebaam gehängd hunn, der is viel hähscher und mer siehd'ne schunn vunn weidem.
Jo is  klaa….....un wä soll fer jedes Ei die Lääder enuff mache, ich velleicht…..
Ich glaab du hosch de Schuss ned geheerd.
Gut - dann mach ich des Moije selwer, im korze Reggelsche, was glaabschen wie schnell ich Hilf krieh vunn all uns’re Nochber drumerum. :-)

Gruß Dehääm