Geschichde vunn Dehääm

 

Es wa jed Johr die Danzveoschdaldung un wä laafe kunnd mussd hie.

Hie zum Kedda, des wa’s Weissers Dochder.

Wie ähre Vadder geschdorb waa, hadd’s Kedda die Wertschaft üwwernumm - ‚s waa jo lerrisch un los un die Wertschaft wa die änzichd uff de Hääd.

Die Kedda wa e sogenennder „Üwwerschdänner“ also üwwerisch geblibb un nemmie gons so jung. Geschaffd hodds wie en Kerl un wonn’s als kä Klääd o’gehadd hätt, mä hädd nie gerood, dass des e Fraa iss.

Als Wertsfraa, so wie’mä sich die vorschdelld waa’s nix - un so hodd dort nore de Schdammdisch reschelmässisch gehoggd, die Kadler un ab un zu die Oihoimische, wann’s Geld fer „beis Kedda“ gelangd hodd.

O’geschribb hodds nämlich nix, des geschäftsdichdische, des hadds vunn soim Vadder gelernt.

On  Fassenacht hodds de Freunde Roiner un soi Combo beschdellt, dass die die Musik machen.

De große Saal hann mir Junge geschmiggd, die Bar schää schummerisch imme Eggelsche drauss im Gang, hinne newer de Kellertrepp ingericht.

So hodd känne, wä schnussele geh wolld, korz ums Eck veschwinne.

Mää wie ämol hodds Kedda no some Fassnachtsomend aa e Schnapsleich uff därer Kellertrepp gefunn, eruffer geschleppt, in de Schubbkärsch vefracht  un Hääm kutschiert.

Klor wa’s Kedda jo, ‚s hodd nie ned Wen verood.

Bis die Fassnachtszeit erum wa, waan do in därer Wertschaft so Schdigger acht Danzomende.

Wanns nor fer Erwachsene waa, durfden mär jo ned hie.

Ich waa erschd sechzeh, awwer schnuuse bin ich midd de Onnern aa gong, wu moi Leit gemäänd hann, mir sinn brav Dehääm im Bett. ;-)

De Babbe kunnd danze wie e Lumb am Schdegge un die „Dame“ hänn beim Schlange geschdann, so dass die Momme schunn alsmo e bisje geeifert hodd.

Awwer sie wa e schäänie Fraa, hochgewachs un e Figiersche wie e Dännsche aussem Hääder Wald- sie hodd nie uffem Bänkelsche hogge gemissd.

De Klaache Franz wa säächnarrisch uff’se un de ald Weid hodd aarisch gern midderer gedanzd.

De Oddo, wa zwa klääner wie sie, awwer ins Danzkärtsche hodder sich aach immer in getra.

Gelacht hodd’se do wie e jungi Mad – wunnerschää o’segugge - un de Babbe hodd’se veliebd o’geschdrahld.

Jo un dann kam do so en Omend fer uns jung Gemies.

Ich bin gang als „Keenischin der Nacht“ ich wäses noch wie Heit.

In nächtelanger Aawet hadd die Momme mä des Koschdüm aus schwazzem Tüll geschneidert un lauder goldene Monde un Schderne druff genähd.

Des wa soooooooo schää un was noch viel schääner wa – kää onner Mädsche hadd so e Koschdüm. Dodezu hodd a en klääne Schleier fers Gesicht geheerd, wu an de Ohre ingehung wor is.

‚s Gesicht hadd mä die Momme mid ährm Sach geschminkt un lange, falsche Wimbre dro geklebd.

E Kett aus de rechdlische Mond un Schderne fer um de Hals un fers Handgelenk- dort noch de Pombadurbeidel dro un ferdisch wa ich.

Groß wa ich jo aa un Figur hadd ich längschd, ned wie die derre Reche vunn de Owwerhääd,  wu de Wind dorch die Rippe bloose kunnd un mä’s peife geheerd hodd.

Gug selwer wie’de aussiesch Klännes un desdewee - Bis zehne derfsche bleiwe, dann kummsche awwer Hääm  - un zwa so wie’de annegang bisch, klaa?  - So hodd moi Momme mich unnerwiss.

Ich hunn gekämpfd wie e Leeb’ dass ich wennigschdens bis elfe bleiwe derf, so wie moi Bruder, weiler e Johr älder waa. Gud, wanner uff dich uffbassd, wa die Momme donn inveschdann.

Dass ich uff dich uffbasse du, dodefun kannsche dräme, määnd moin Bruder dann draus uff de Gas. Ich blomier mich doch ned un kumm do Vorre o mid moiner Schwesder im Schlepp - saad’s un gebbd Fersegeld.

Un ich muschd mid moim schääne Koschdüm jo langsam geh.

Jezz waa’n jo „Borsch“ seit e paa Woche aa e Thema fer mich, seit ich denne blondgelockde aus Kriesfeld kennegelernd hadd, dä wu beim Babbe soine Firma Laschdwaa gefah hodd.

Ich hunn gehoffd, dass dä Sell zum Danze kummd, veschbroch hadders.

Un dann wa do noch de Weiser Honnes.

Dass dä mich gern sieht wuschd ich schunn lang.

Immer wann ich die Schdross längs kumm bin, wu dä soi Äcker hadd, hodder de Trakdor ausgemach un is hä kumm. ‚s waa jo en schääne Borsch, awwer ä wa hald bloss e Bauer un ich wolld kää Bauersfraa werre – im Himmellewe ned.

De Saal wa brechend voll un de Freunde Roiner hodd sich so richdisch ins Zeig geschmiss.

Die Schdimmung wa schunn ausgeloss un schwupps greifd mich ääner un schlengerd mich üwwer die Danzfläch.

Midde im Danze werd abgeklatschd un ich land in annern Ärm. Irschendwann wa ich so drurlich, dass ich mich emo korz vepuuschde wolld un in de kiehle Hausgang geflicht’ bin. Grad heb ich moin Schleijer fer die Nas se buzze, do wischberds mä ins Ohr. Hallo geheimnisvollie Prinzessin, derf ich wisse, wä sich hinner dem Schleier verberje dud.

Des wa de Weiser Hans.

Ohne ebbes se saa hann ich de Kopp geschiddeld un midd de Aue geklimberd. Kumm trink e Gläsje mid mär, lächeld’ä mich o un  driggd mär e Sektglas in die Hand.

En Schluck hann ich getrunk ….. Dä Omend, die Musik, dä Zauwer, ich wääs ned wasses wa- ich hunnem e Kuss uff de Bagge gebb.

De Honnes guggd mich o, zieht mich bei un gebbd mär de erschde Kuss in moim faschd Erwachsene Lewe.

Korz hald’ä mich eweg guggd mä in die Aue, schiebt mich ums Eck an die Kellertrepp un heerd so schnell mit Küsse nimmie uff.  Himmel, hadd dä des druff äm wääche Knie se mache un – ‚s wa bassierd, ich wa veliebt.

So mid Händschehalle un vedrämde Aue sinn mir serick in de Saal un wollden widder danze. Do reisst mich Ääner erumm un rozzd de Honnes o. Loss die Finger vun dem Mäde, des is moins.

O jessas, de Kriesfeller un beschiggerd wa dä aa schunn gans schää.

Bassemoluff sääd de Honnes, mir zwää gehen jezz emo vor die Dier un do erklär ich deer de Unnerschied zwische moins un doins.

Wierer widder kumm is, hodder nix geredd, hodd mich vum Schduhl hochgezo un uff die Danzfläch.

Dassdes wääsch Klännes, du geheersch moi un glei Moije saa ich des a doine Leit.

O du moi liwwer…..

un dodemit iss die Fassenacht dann erschd richdisch losgang weil – de Hans wa älder wie ich un wa Bauer un moin Babbe erschdemol fuchsdeiwelswild :-)

Awwer schää wa’s.

 

 

 

‚s hott grad widder geräänd...

De Weg schdeil, matschisch – kaum dass mer ne laafe kann.

Äämol bleibt mer sogar de Schuck schdecke im uffgewääschde Waldborrem.

Awwer, des is mer egal, ich merks ned emol.

Die Lichdung, u’beriehrde Waldborrem.

Vum Weech aus kann ich des Neschdsche ned sieh. Kää Schbure, ausser vum Reh

Nää, denk ich traurisch – do war Kääner.

 

Owwe uffen Rech, der klääne Hiehl, es Haslenussbäämche schdehd direkt dehinner. Gewachs isses widder e ganses Schdick, seid ledschdem Johr. Dodefor gebaut aus Hasselnuss-Schdeggelscher un mit Mooskisse zugedeggd,es is moi Oschderneschd. Vor lange Johre 'mol, hunn ichs gebaut un seitdem alle Johr widder denoo geguggd.

Siehd so aus, als obs noch ganz wär. Vorsichdisch schdreif ich die Blädder vumm Moosdach erunner.

Moi Gedange sinn am fliehje....Hodder's vegess. Ach wie gern deet ich's wisse.

Midderer klääne Dannerut fech ich des Neschd jezz ganz frei un guck eninn

un moi Herz macht en Satz....

Glei newischem Inngang hockt en klääne Haas, middeme rode Bännelsche um de Hals unneme Gleggelche dro.

Drin leit e nass gebläddschdie Ros, samtrot – Die kald Widderung hod die so schää gehall, wie frisch geschnitt, beinoh wie u’vegänglich.

Sie is ufferer Kaad feschdgemach, beklebt mid lauder goldische Oschderbildcher un in de Mitt schdehd mit markander Schrift "Frohe Oschdre" geschribb.

Schdillie, diefie Frääd....... wie aarisch, des kann ich Nimmand saa.

 

E ganz Johr war widder erumgang un es is, als ob mir alle Bääd aach in demdo Johr, nore fer denne Aacheblick gelebt hann.

 

Ganz hinne im Neschd entdeck ich e greeseres Schmuckaij aus Blech. So Welle hadd ich in de Geschäfde gesieh, wunnerschää vezierd.

Ich habs uffgemach. Lauder bunt ingewiggelde klääne Schoggeladeaijer sin eraus gekullerd un e Brief – odder besser gesaat, e Briefsche. Weil, des war ganz klää sesammegefalt un mit Wachs vesiecheld.

Des was do drin geschribb schdehd, saad mir, dass desdo Oschderneschdsche - des lieb geworrene Ritual, aach dem Mann immer noch genauso viel bedeid, wie mir.

 

Erinnerung - e bisje traurisch un aach arisch schää... Oschdre....Hoffnung…..

 

Mer braucht im Lewe die „Erinnerung“

un Ebbes wu mer dro glaabd, wu mä wääss, mä kann sich im Notfall feschd druff velosse –

en Horizont wo mer druff zugeh kann un wo for mer lebt.......gelle.....

 

Herzlich grüßt eich die palzermad J

 

Kaum hunn e paa Sunneschdrahle de Borrem e bisje waam gemach, gehds widder los. Rumgraawe, Beede sauwer mache, uffbasse dassmer ned die Schneegleggelscher, .•:*¨`*:•..•:*¨`*:•..•:*¨`*:•. FRÜHLINGSERWACHEN .•:*¨`*:•..•:*¨`*:•..•:*¨`*:•. _________________ _________________8$$$$ _____________8$$$$_s????s ___________8$$___s????????s_______ s $$ _________8$$____????????????_____s_ s $$$$ ____d§§_$$______????????????______s_s$$$$ __d§§b__$$______????????????___$$$$$ $$$ _§§b____$$______????s__s????_____$$$$$$ d§§____8$$_______s??s ??s__________$$ §§b___$$8______________b§§ §§____$$j____________d§§b________8$$$$ §§b___$$o_________§§§§b______8$$$$????ss §§§§__$$h________d§§b______8$$_s????????s §§§§__$$a_______§§§§_____8$$__???????????? §§§§b_$$n______d§§§§___8$$____???????????? d§§§§_$$n_____§§§§b__8$$______???????????? _§§§§b$$a_____§§§§__$$________????s__s???? __d§§§§$$8___d§§b__8$$_________s??s ??s ___§§§§b_$$__§§§§_8$$ ____d§§§§$$__§§§§_$$______8$$$$ _____§§§§$$8_§§§§8$$____8$$_s????s ______d§§§§$b_§§§_$$__8$$_s????????s _______§§§§$$_§§§_$$_$$__???????????? _______§§§§$$b§d__$$_$$__???????????? ________d§§§§$$§§_$$_$$__???????????? _________§§§§$$§§$$__$$__????s__s???? __________d§§$$§§$$_8$$___s??s ??s ___________§§§§$§§$$$$_________d§§§§§§b ___________§§§§$§§$$$$_____d§§§§§§§§§§§§b ____________d§§$§§$$$$___d§§§§§§b______b§§b _____________§§$§§$$$$_d§§§§b____________b§§ _____________§§$§§$$8_§§§§b ______________d$§§$$8_§§b _______________$§§§§§§§b ________________$$§_§§§§§ ________________$$§_§§§b .•:*¨`*:•..•:*¨`*:•..•:*¨`*:•. die Tulwe un die Oschderglogge vewischd. Üwwerall e paa Hännvoll Dinger druffgeschmiss, Rindemulch drüwwer, dasses Ukraut sich ned so brääd mache kann un feddisch is de Zauwer Apropo Zauwer.... Vunn de Zauwernuss, un vunn de Korkeziehjerweide, do waan schunn Werschdscher dro, hunn ich mär e paa Zwagge abgepezd, in die groß Borremwaas geschdelld un Oschderbuzz dro uffgehung. Vunn Dehääm hunn ich jo noch die große Gänseaijer. Die hummer Sellemols uff de Pulwermiehl de Gäns unnerm Hinnere eraus abgeklaut  ausgebloos, schää ogemald mid bunde Farwe un an de Kazzleschdrauss gehung. Nooch de Oschdre werren die in Watt gepaggd un in Dose gut veschloss widder uffgehob fers nexschde Johr. So hodd des moi Oma schunn gemach, moi Momme un so machs aach ich. Moi Gänseaijer sinn jezz schunn dreiedreissisch Johr alt un immer noch wie nei 's äänzischd was mich Desdojohr e bisje dauerd - ich hunn kää Kazzle vunn "Dehääm" Fer hiesefahre un am Ambachweiher Welle ze schneide, waa bis jezz kää Zeit. Naja, wanns nore widder langt fer en digge Schdrauss Maiblumme dort se robbe, awwer bis Dohie iss noch e bisje. Jezz kummd erschdemol die Oschdre  PLATZ DAAA!!! Möcht hier mal durch hoppeln........... _, ’__’~,_______________,,,,_ /______’’~-,,_________,-’____’-,~~-, |__________¯’~-,_____,’__/____’,__’-, ’,_______________’-,__|__/_______,’ _’~-,_______________|_|_________/ ___¯’’’’~~~~~~~’______|,,,_______/ _____________’-,___’_~.~’.’-,____/ ______________/’____OO_’~--~~’ _____________-’-___,-~¯¯~-,____’-, ___________,-’______’~-,,,-~’_____’, __________/___________,_,-_____/ __________’,_____,_;’___|__/____,’ ___________’-,_____’’’~-~"~~"_,~’ ____________’~--,,____’~~’_,-’ ________________|’’____~’,-, _______________/___,_____’~-~""~-, ______________/___,,--’~--,,_,,-__)__) _____________/____-’_______’~,~’"" ____________/_~’_________)_,,_ ___________|_____________}__""~, ___________,__________,,,--~’¯__¯’~, ____________’~-,,,,,,________~-,_’-, ________________’~-,,________,),--" ......(¯`°v°´¯) …....(_.^._)...(¯`°v°´¯)...... .und einen lieben Gruß da lassen ....(¯`°v°´¯) . ......(_.^._) BITTESCHÖÖÖN !!!

  

Fünundreissisch Johr dabben mir jezz Minanner dorch's Lewe. 

Jo, gut – ned jeden Schritt, awwer zeminneschd hot immer Jeder gewisst, wu soi Dehääm is un wurer hie geheerd.

Gelacht hummer veel minanner – gegroind – jo, do warn aach schwere Zeide wu äm die Aache Wasser geb hann. 

Wann ich mich nore dro erinner, wie de Moi als Metzjer nimmie hot schaffe gekännt un es Gligg hat, uff die Boh se kumme.

Sellesmol war'er grad fünundreissisch un die Boh hod, was Älder war, nemmie ingeschdelld.

Alla war's grad soi ledschdie Schaas.

Mir hadden (es sei'm Heid noch gedankt) en gude Fierschbrecher un so hodd de Moi die Aawet dann aach krieht. 

Ään große Nochdäl hadd'se g'hadd. Es erschde Johr hodd'er nore wenisch Geld vediend un muschd immer wochelang ford uff Schwääser-schulunge un all sowas. Muschd lerne bissem de Kopp geraachd hot un Priefunge mache.

Es war fer en fünundreissisch jährische jo aach ned grad ääfach, all des Neie noch se lerne – un määh alswie Äämol, warer druff un dro uffsegewwe.

Was määnsche..... paggen mir des – so hunn mir uns oft gefroot. 

Mir muschden uns ganz schää no de Deck schdregge.

Reiche Eldere wo uns unner die Ääm hädden greife känne, hamm mir alle Bääde ned gehadd.

De Hawwersack hodd vedammt hoch gehung, awwer mir hunn aach des gepackd. 

Fünundreissisch Johr – en weide Weg.  

Ingegrab in die Haut un aach dief in die Seel, is jed äänzelnie Minudd.

- All die schääne Zeide, es Lache – all die schwere Zeide, die Träne

Aach des is gang – Minanner. .....

Jezz die ruhischere Johre mit schdiller Frääd, dasses "Ihn" un "Mich" noch gebd. 

Minanner gehd vun viel, ewe faschd Alles.

 ... gelle!

Määnt die palzermad

Es schneet...

De Weg schdeil, matschisch – kaum dass mer ne laafe kann.

Äämol bleibt mer sogar de Schuck schdecke im uffgewääschde Waldborrem. Awwer, des is mer egal, ich merks ned emol.

Die Lichdung, e uberiehrdie, geschlossenie Schneedeck.                                      Vum Weech aus kann ich des Neschdsche ned sieh. Kää Schbure im Schnee, ausser vun Reh Nä, denk ich traurisch – do war Kääner.

Owwe uffen Rech, der klääne Hiehl, es Haslenussbäämche schdehd direkt dehinner. Des is moi Oschderneschd. Siehd so aus, als obs noch ganz wär. Vorsichdisch schdreif ich de Schnee vumm Moosdach erunner.

Moi Gedange sinn am fliehje....Hodder's vegess, alles gelöschd. Ach wie gern deet ich's wisse.

Midderer klääne Dannerut fech ich des Neschd jezz ganz frei un guck eninn.     Glei newischem Inngang hockt en klääne Haas, middeme rode Bännelsche um de Hals unneme Gleggelche dro.

Drin leit e schdeif gefrorenie Ros, samtrot – De Froschd hod die so schää gehall, wie frisch geschnitt, beinoh wie uvegänglich. Sie is ufferer Kaad feschdgemach, beklebt mid lauder goldische Oschderbildcher un in de Mitt schdehd mit markander Schrift "Frohe Oschdre" geschribb.

Schdillie, diefie Frääd....... wie aarisch, des kann ich Nimmand saa.

E ganz Johr war widder erumgang un es is, als ob mir alle zwää aach in demdo Johr,nore fer denne Aacheblick gelebt hann.

Ganz hinne im Neschd entdeck ich e greeseres Schmuckaij aus Blech.                  So Welle hadd ich in de Geschäfde gesieh, wunnerschää vezierd.                           Ich habs uffgemach.

Lauder bunt ingewiggelde klääne Schoggeladeaijer sin eraus gekullerd un e Brief – odder besser gesaat, e Briefsche. Weil, des war ganz klää sesammegefalt un mit Wachs vesiegelt.

Des was do drin geschribb schdehd, saat mir, dass desdo Oschderneschdsche, des lieb geworrene Ritual – dem Mann genauso viel gewwe dut, wie mir.

E bisje traurisch un aach arisch schää... Oschdre....

Mer braucht im Lewe ewe Ebbes wu mer sich feschd druff velosse kann – en Horizont wo mer druff zugeh kann un wo for mer lebt.......gelle.....

En herzliche Gruß schickt eich 

die palzermad

 

Kafreidaach is Heit, es Wedder bassd debei.

Rääne duds, schneeje un kalt is aach.

Awwer egal – ich geh Heid Nomiddach enaus in de Wald moi Oschderneschd in Ordnung bringe.

Es Dach muss jed Johr nei gerichd werre un frisch Moos muss druff. Inne werds aach widder frisch mid Moos  ausgeschlaa, weil de Oschderhaas nore in gemiedliche Neschder was eninn leet.

Warum ich des mach un warum im Wald ???

Des war so:

Vor schdigger zeh Johr war ich um dich Oschdrezeit aach im Wald unnerwegs.

Ich bin määschd weid weg vunn Trambelpädcher, will saa – ich maan ned andauernd wem "Gun Dach" saa misse. So aach an dem Daach.

 

Die Schdross Richdung Hungerbrunne - un dort rechts ab eninn in de Wald. Glei werrer links en Berch enuff hunn ich moi Rad gedrickt.

Der Weech war ganz vefahr vunn de Waldarweider. Kään Schbaziergänger leeft so en Weech un dann noch de Berch enuff, freiwillich. Ich war also dort Allä (hunn ich zuminneschd gedenkd)

 

Wie ich halwer drowwe war, muschd ich doch ganz schää schnaufe. Des Rad dorch dene Babberatsch se schiewe, hot gekoschd.

Ich hunn mich e bisje umgeguggd un sie newisch mer dene Resch, voll bewachs middem wunnerschäänschde Lockemoos, wu ich jeh gesieh g'hadd hadd.

 

Do demit em Bu e Oschderneschd baue, des werd prächdich, denk ich so fer mich un fang o ganz vorsichdich die Moospladde absehewe, dasse ned vereissen. Des Moos is so schää, im Nu hunn ich moi Kerbsche uffem Rad voll gepackt.

Ich bau mir direkt do aach e Neschd, fer mich ganz allä, denk ich mer. Mol sieh ob ichs noch kann.

E schdiggelche de Rech enuff schdehn junge Hasselnusshecke. Die kammer noch schää bieje un dodemit es Dach baue. Ich krawwel denne Rech enuff un bin erschd mol baff.

 

Do hodd's e wunnerschä, sunnischie Lichdung. Richdisch romandisch mit klääne Dänncher un frisch ausgetriwwene Buchesetzling. In de Näh hot en alde Baamschdamm gelee. Ich, ned faul, hunn den in miehseelicher Klääarwet an de Kopp vun dere Lichdung gerollt un mich druff gesetzt.

 

Rechts die Danne, links de Laabwald, vor mir e kläänie Birk un noch mäh vunn dem wunnerschääne Lockemoos. Ach Gott wie schää's do is.....

Ich geniess die Schdille vumm Wald, nore unnerbroch vum Peife vunn denne Vechelcher un vum raschele wann klää Gediers dorchs Unnerholz schlubbd.

De Himmel vumme blau, des kammer faschd gar ned beschreiwe. Doher kumm ich jetzt efder un do bau ich mer jetzt moi Oschderneschd.

Gedenkt, gedu......

 

Siwwezeh Haselsgerte hunn ich gebroch un die junge Blättscher abgestreifd.

Ää langes gebooche, Rechts un Links dief in de Borrem geschdeckt, fer der Vorreringang un Ä kerzeres fer hinne, weil des Dach jo schräch no hinne ablaafe muss, damit's aach e Höhl gebd.

So, un jetz dezwische noch Fünfe gebo un aach dief in de Bodde gegrab - un de Ofang vunn dem Gewölwe is gemach.

Jetzt kummd die härdschd Aawet.

 

Zeh bis zwelf lange Haselweide missen längs dorch die Booche geflochde werre. Des Ganze muss so aussieh, wie en falsch erumgedrehde Korb.

Wie des geschafft war, hunn ich mich erschd mol widder uff de Baamschdamm gesetzt fer ausseruhe.

Was se tringe hat ich in moim Radkorb mid debei.

No'me Weilche bin ich uffgeschdann, weil ich gemäänt hunn, ich hätt was geheerd.

Erumgeguggd-  nix war.....

 

Dass ich des idyllische Bild vunn dere wunnerschääne Lichdung ned kabutt mach, hunn ich mir Moos, ganz hinne vum Rand gehol, fer des Dach ze decke vunn moim Neschd.

Jezz noch inne Welles eninn un de Inngang e bisje abgedeckt – Hach is des schäänes Oschderneschd, grad so wie mir des als Kind moin Babbe beigebrung hot.

An dem Middach war ich dort bis nooch de Fünfe.

Wie die Sunn weg gang is, bin ich de Berch widder enunner, uffs Rad un Hääm.

 

Dienschdaachs no Oschdre, ich hadd Urlaub, bin ich widder hie. Mol gugge, denk ich so unnerwegs, ob die Willsei mir des Neschd aach ned ingeriss hann.

Juchuuuuuuu, es hod noch geschdann, genauso wie ich's gebaut hat.

Ich hunn moi Rad abgeschdellt un bin bei "moi" Baamschdamm hie, fer mich druff se setze. Do sieh ich uffemol was aus dem Neschd luxse.

Nää odder, denk ich...... Do war doch tatsächlich inneme Plasdicksäggelche en klääne Haas, un e Prallinee Ei - un newe dro hot e Ros gelää mid Schleierkreidsche. Des Schdengelsche vunn dere Ros war inneme Plastikröhrche voll Wasser geschdeckt.

Debei war aach e Briefkuvert,  zugeklebd.

Gefühle vunn "ach du moi liwwer, wer war dann des, ob des vegifd is, nimmand wääs doch nix vunn dem Neschd, ob mich do wer beowacht hot,- bis hie zu narrisch Frääd" is alles dorch mich dorch maschiert.

Ich war so platt, ich muschd mich erschd mol setze.

Wie ich des Kuvert uff gemach hann, ei mir hunn ja die Finger geziddert.

*Liebe Unbekannte, nie in meinem Leben habe ich so was wunderbar romantisches beobachtet, wie dich  beim Bau dieses Osternestes. Auch kannte ich diese Bautechnik nicht – danke dafür, werde es gleich ausprobieren bei Nestbau für meine Beiden Kinder.

Mit der Rose möchte ich mich bedanken für diesen zauberhaften Nachmittag und dem Zauber deiner Nähe in diesem Zauberwald.

Bitte halte daran fest, bewahre dir und mir diesen Augenblick solange es geht.

Bis zum nächsten Jahr – "Ich" total verzaubert......*

 

Geles habb ich denne Brief, ich kanns nimmie zähle un seit dem bau ich des Neschd in jedem Johr widder nei uff.

Manschesmol isses nore verammesiert, manchmol is aach gar nix mäh defunn do, awwer wos schdeje muss, des  sääd mir e Hasselnuss, die wu Sellemols dort ogewachs is - un Heit schunn längschd e prächdisch Bäämche.

 

So, un jezz geh ich mol widder enaus in de Wald nom Neschdsche gugge, schliesslich is am Sunndaach Oschdre J

 wünscht eich die paelzermad

Vekaafsuffene Sunndach un was war ich mer kaafe "Schuh" :-)  - ähr hunns erfassd.

 

Dunnerkeil, is der do was los in Lautre, obwohl's  Binnfärm räänt.

Erschd muschd ich mer jo mol Knede hole un dann ab enuff ins Induschdriegebied.

So hääsd des bei uns, drauss vor de Schdadt wu ausser Schuh- un Mewelläde aach noch viele annere Geschäfde sinn.

Moi Kolleesch hadd dodevor so Personalschoi midgebruing. Domid gebds uff Jeed Paar Schuh 20%

 

Des Schuhcender is ball üwwergeloff, awwer des machd faschd gar nix.

Moi Monn hod glei emol so e Prowierschdiehlche mit Beschlaach beleet, so - des war mol schunn sicher.

Ich hunn de Geldbeidel gesicherd un dann is losgang mid prowiere.

 

Schdänder, solang mer gugge kann, voll mid lauder Pariser Schiggelcher, ääner schänner alswie de Onner- un ich schdeh do mid moine Dunnerschberjer Fies  ;-)

 

Der schwazze do, uih....sogar en Lackschuh, chic....oprowierd - bassd ned. Entwerrer is der Schuh veel so eng orrer Heid sinn moi Fies e bisje digger. Kummd sicher vunn der hoggerei die zwää Daa uff dere Taachung do.

 

So eng - kumm ned eninn - veel so deijer - kää gescheide Sohle, aaschgladd - wannse ned so bribrabrinselich wärn - Jööööö, bei änunzwanzisch hunn ich uffgeheerd se zähle.

Die rodbraune do, die wärn jo was fer uff moi neije Hosse - Häär, die bassen - ab ins Kerbsche mid.

 

So, kämmer dann geh, sehd moi Monn, Gottseidong, do isses aarisch voll.

Waad noch e klää bisje, ich muss do nommol was gugge un fer die Momme brauch ich noch e paar Schlabbe.

Die Schlabbe-echde Romiga un gar ned deijer - werrn schun basse, ab ins Kerbsche.

 

Hallo - Hallo Sie, des is awwer moi Kerbsche was sie do grad gekrazzd nunn. Gewizzeldunnerkeil - Kännd Jeder kumme, im Annere soi miehseelisch sesammegesuchde Schuh rausschmeise, nore dasser e leer Kerbsche hod - Ja wo simmer donn.

Die gebds Kerbsche häär un machd sich vum Agger :-) 

 

Ach du moi liwwer, des sinn jo gar ned moi Schuh, die selb Färb, awwer veel so klää.

Desdo Kerbsche schdellen mir mol brav un sauwer do ins Eck, 'tschuldischung un nix fer uugut, gell  :-)

 

Ach Freileinche, hunn sie aach noch was schwazzes in 50 - 's wär fer moim Vadder, soi Dochder, de Bu ;-) ......

 

Kämmer donn geh... Ich schlaa drei Kreize wann mir do jezz geh kännen. Des Schdiehlsche hännse mer nämlich gebadderd un ich kann nimmie schdeh - seehd moi Monn....

 

Alla, egal wie aach immer....Mir sinn midde FriedaElissabeth ähre Schlabbe un vier Paar Schuh enaus un hunn üwwer 50 Euro geschbard......toll gell  :-)

Dort owwe uff de Owwerhääd, glei hinnerm Schneirer Kurt soim Gaade, is mer abgebo enuff  in die Siedlung.

Ofangs schdehn jo schääne Äfamilieheisjer, awwer je weider mer enuff kumm is, umso abendeierlicher esses worr. Do had die Schdadt e paar Baragge gebaud un lauder aame Leid eningehoggd, die wu kää Awed hadden.

Dort hot's aach  gewohnt, es Freilers Roswidda.Ritzerode Hoor hods gehadd, feierrod, loggisch und wallend bis uff de Buggel - un Summerschbrosse, jessas, do war kää freier Platz mä,  im ganz Gesicht ned. 

Leider hods des Sell ned so mid de Sauwerkäd gehadd. Middem Wäschlumbe hods uffem Kriechsfuss geschdann un en Kamm, mid dem wars aach ned grad per Du.

E Hoorberschd, sowas hod mer Dortmols noch ned gehadd. Gemoschderd hod sichs als, wies Kaddel am Sundaach. 

Schbäder, viel schbäder erschd hunn ich kabierd, dass des Roswidda gar nix anners fer oseziehje had. Kä so schäne Kläädscher wie mir Mäd vunn de Unnerhäd, kä so schäne Scherzjer mid Rüschebennel droun selwerd gehegelde weisse Schdrimbelscher.

Dem soi Momme had wahrschoins kä Geld üwwerisch  fer Woll se kaafe orrer  Schdoff.

Geschäämd hun ich mich schbäder, wie ich des emol kabierd had, aarisch – awwer erschd mol hun ich midgemach, wann die Annern des Roswidda an de Hoor gezoo un gehänseld hun.

Alle Daa bevor die Schulglogg gebämbeld hot, war des Määre denne  Ofeindunge vunn soine Mitschüler ausgesetzt. Ich wääs noch, wies emol uffem Schulhomaiersche gesess un gegroind hot.

De Lehrer Ruff hod de ärgschde Üwweltäder am Ohr genumm un üwwer de Hof mit in de Schulsaal gezerrd. Ohauwahauwaha....Do war was gebodd.

Allminanner hämmer Schdrofarwed krieht un die Mamme es  bei de Direx beschdelld wor. 

Dehääm hoddse sich higesetzd un mär dann erklärd warum des Freilers so aame Leid sin un dass mer so wieschd nid soi derf zu Aameleidskinner. 

Moije will ich, dass du doi Lewwerworschdebrot im Roswidda gebsch. Ich will sieh dass du was kabierd hosch -  un weh du machsch des ned. So hoddse gesaat, moi Momme.....

Jo, die war im Kriesch Owwerfeldwewel beim Rode Kreiz un wannse denne Ton druff g'hadd hadd, do war mer besser berot, wammer geheerd hod. 

Am näxschde Moije - Ich hun hie un här üwwerleet.....was, wann ich dem Roswidda die Hand un moi Brot geb un die Annere siehn das. Ich bin doch unnedorch fers Lewedaach.Awwer wann ich's ned mach –  ned mach, was die Momme gesaat hod.....Also -  es Minneschde is beschdimmd Schduwwearreschd, kää Fernseh un ned midde Freind Nomiddaachs draus rumhänge.

Kää Fedderball schbeele un aach ned mid de ald Zinkbadebidd die Ombach enunner schibbere.

Alla, ich hunn e Weilche zugeguggd, wie die Annere des Roswidda widder gepiesakt hun, hun mer en Ruck gebb, bin eniwwer beis un hunnem moi Lewwerworschdebrot higehall.

Du Roswidda, wollemer mol dausche. Ich hunn immer so Worschdebrot debei un ess des aischendlich gar ned so gere, saa ich zu'rer.

Moi Bauch hog glei wierisch geknorrd, weil des jo geloo war. Uff Lewwer un Bludworschdebrot war ich nämlich säächnarrisch. 

Es Roswidda wolld erschd ned, weils jo wuschd, dass ich aach zu der "Bande" geheerd han, die wu's immer ärjern. Gedengd hots, dass bei dem Brode dausche, beschdimmd nore widder was wieschdes eraus kummd.

Kumm Roswidda, schlaa in - un loss uns Freundinne sin, saa ich un hunnem die Hand hiegehall.Es guggd mer in die Aue, e gansie Weil.

Ich denk, des glaabd mer nie.....doch uff äämol, so gans langsam schdreggdes soi Batschhand evor un e Lächele laafd üwwer soi Gesichd.

Do hods bei mir Peng gemach un ich wuschd, dass die Momme Reschd g'hadd hadd. 

's Roswidda hod mir soi Safdebrod gebb un ich hun sogar mol nin gebiss  :-)

Seid dem Daach hod sich Känner mäh annem vegreff. Sie hunns in Ruh geloss un irschendwann hodds aach ääfach dezugeheerd un alles war Schnee vun Geschdern.

Es hod vun uns aach Klääder krieht un annern Sache, hod gelernd wiemer sich sauwer hald un wissener was.

Es Roswidda war e wunnerhübsches Mädsche un viele Johre, bis die Zeit uns getrennt hot, e Freundin wumer sich felsefeschd uff velosse kunnd. 

Ich wissd Heid mol gern, was aussem worre is, wus lebd un wiesem gehd....

      

     

 

 

Näxchde Mittwoch isser widder, de erschde Auhuschd.

 

In dere Naachd, äänundreisichde Juli uff de erschde Auhuschd, um acht Minudde no zwelf, is moi Babbe geschdorb.

Finf Johr sinns jezerd, dass mich Omends um zeh die Momme ogeruf hod.

Kumm, ich glaab es ess soweid – kumm, loss mich nore ned allä.

Middags devor waren mir noch beim gewess.

Do hodder im Schdibbsche gelää, uffem Kannabee.

De Nochbersmonn haddene Moijens aussem Bedd gehob un uf soi geliebdes Kannabe geleed.

Er war schun aarisch schwach.

Wanner was gesat hot, muschd ich mim Ohr ganz nah an sein Mund, dass ichs veschdehje kunnd.

Geje Omend sinn mir dann nochemol widder häm gefahr.

Ich wuschd ned, dasser sich veabschied had, mit dem wasser mer Middachs ins Ohr geflisderd hot.

Häddischs gewissd, wär ich nie no Lautre serick gefahr.

Naachts dann, bis mir dann korz no zwelfe widder drauss okumm sinn, wars zu schbäd.

Moin Babbe is geschdorb, wie ich die Dier uffgeschloss hunn.

Ich hab mich zum ans Bett gesetzt, ganz allä-un mich uff moi Art vunnem veabschied.

Middags hadder mer noch gesaat, dasser gligglich is, noch die paar Woche Dehäm geahdd se hawwe.

Er war so froh dasser Dehäm soi kund, mid de Momme,

 so froh dass ich ne geesche de Wille, vum Owwerarzt, aussem Krangehaus ääfach mitgenumm hann.

Nimmand kannem mä helfe, hadds gehäss, dann kann moi Babbe aach Dehäm sinn, solangs ewe dauerd.

Die häddene gern behall un ährne Vesuche annem weidergemach.

Er wolld ssoooo gern Hääm

Ich bin hie, hannene Ogezo, ne innen Rollschduhl gesetzd un'nene enaus ans Audo gefahr.

Zwä Pflescher hann geholf de Babbe do eninn se schaffe.

Sie dun Rechd, hann die gesaat, un die Schweschder hod gemänt

"Des is ned se schaffe, so krank wie der Mann is".

Ach-Es war mer egal, ich hädd moin Babbe ums veregge ned im Krangehaus geloss.

Se lewedaach vegess ich ned die schdrahlende Aue, wierer widder soi Haus, soi Dehäm gesieh hod.

Mir hann en Kicheschduhl gehol, de Babbe drufgesetzd un'ne so ins Haus getraa.

Was kam, war e schwerie Zeit, fer moi Momme un aach fer uns,

awwer des war nix geesche des Gligg, wasmer moim Babbe noch schenge kunden.

Ich vemiss ne aarisch un ich wäss, ich deed alles genau werrer so mache.

 

*Vor fünf Johr isser gegange, uff e Reise ohne Wiederkehr

En schdille Schmerz häld mich gefange, ich vermissene so sehr

Es hässd jo Zeit häld all die Wunde

Ich han die Zeid jedoch noch ned gefunde*

 "Wäre ich ein antiker Mensch, würde ich ihn, wie im Epos, mit der Kraft meiner Liebe, über den Totenfluß  zurückholen aus dem Totenreich,

aber diese Kraft besitze ich nicht und so muss ich lernen loszulassen, wenn es auch nochimmer so weh tut."

 

*Ge Moije* gnä Frau, rufts aus de Kich.

Do machd de Chef es Friehschdigg, do werd de Kaffee vebroch (schmeckt wie Tee) un de Toschd (no alla - wär'ne e bissi dungel hunn will)

O hauwahauwaha

Ich mach mich dabber erschd mol ab unner die Dusch.

Ääfach herrlich.... hääs dusche ess doch was foines un dodebei noch e schää Liedsche geträllerd.

Allerdings kummd do glei e:

"Eeeej Süßes - hall die Gosch, do gebds Leid, die deeden gern noch schloofe"  :-)

Hobbela, des war moin Ableecher.

Ei an den hun ich jo garnimmie gedengd, weil der aarisch selde Dehääm schlofd.

Schunn bleed, wommer ned so mache konn, wiemer will, gelle....

 

Ingewiggeld in e Kuschelhandduch gehds an de Friehschdiggsdisch.

Die Sunn schoind tatsach direkt midde druff –

un – ei, ich bin schbrachlos.

Do leid doch e nei Dischdegg druff.... un nix vebrennde Toschd,

näääää – frisches Weißbrod un moi häßgeliebdes Kernerbrod leid aach im Kerbsche.

E Schdreißje Blumme aussem Gaade zierd die Mammeladegläsjer in de Midd.

Die Budder hod e Muschder ingeritzt

(frech, deed ich jezz denge*middem Kamm*) ;-)

 

Die schää-gedrexelde Holzaijerbecher, hodder aach erausgekruschd.

Un jezz kummd der Hammer iwwerhaubd -

De erschd Schlugg Kaffee....... e Gedicht.

 

Ei ich bin platt, wie norer Rund mimm Bicheleise.

So viel Mieh hod moi besser Dääl sich geb.

Do muss jezz erschd emol en digge Schmatzer eniwwergeschoob werre.

**Schaaaaaaaamatz!!!!

Wer saad's dann - Wunner  bassieren immer noch, aach no 34 gemoinsome Johr.

 

Wann nor immer Sundaach wär......

 

Gebore imme klääne Ort, mit Milchkanne un Mischdhaufe

Vun klääuff de Landgeruch mid Muddermilch schunn ingesoo

Gelernd midde Nadur se lewe un mid Buwe raufe

Als jungie Fraa dann  in die Weld enaus un fordgezoo.

 

Gemergd- ich deed in ääner Schadt veschdigge

's fehld de gud Geruch, de Wald un die Nadur

Was dud mer des es Herz abdrigge

Ich will bloß noch ab, uff's Land, in moi Dehääm, redur

 

Heid' lew ich, wenisch Schdadt, viel Land un aach e bisje Fluß,

Die Luft, es Land, de Wald – ääfach en Genuß.

 

Ich glaab, wer uffen Land gebor, un so e Lewe hat

Der lebd se lewe ned, soiner Lebdaach inn'rer Schdad J

En liewe Gruß schickt Eich die

paelzermad

 

 

 

So, die Fäden sinn seid Geschder endlich raus.

Der "Schnibbelfrizze hod ääfach vorre an de Hand denne Knibbel gegreff, hinne am Am denne Knibbel abgeschnett, gesaat "hallense mol die Lufd o" un dann hod der denne Farem dorch de halwe Am gezo.

Juppiieeeeehhh - ich hunn alle Engel jämere geheerd, awwer kroddetapfer kään Mucks gemach....

Jezz is Beweschungstraining alle zwedde Daa. Des Erschde hod bees gezobbd, awwer muss wohl so sinn.

Die hunn mir vezeeld dass der Schmerz noloßt, nore wann, des saat mir mo widder Kääner.

Uff Jeden Fall hunn ich geplärrd wie en Hawwerleeb, bei dem erschde Training, so dass de Massör mir erschdemol en Kaffee schbendierd hot un Schogeladekekse.

Ei här, des kam grad serächd, ich had Hunger wies Hingel vorm Hasefudder.

E Bällche soll ich mer kaafe, lauwam Wasser mache un des Bällche do drin knede.

Es gehd aach middeme Päggelche Linse. Die muss mer in de Microwell wam mache un dann mit de Hand do drin knede. Ich probier ääfach alles aus weil - ich will werrer Krafd in die Hand krieh, was greife känne.

Des muss geh un wann ich heil wie en Schloßhund un Rotz un Wasser groine du.

Toll fin ich jo, dass ich kään Gips hann muss, im Geschedäl.... De Chirurg saat, ich soll a bloss kää Bin drumerumwiggele, ääfach die Brich so häle losse un immer werrer gugge wieweid ich de Am drehje kann un die Finger beweche.

Wie saad schun de Dogder Busse" E bisje waggele musse"...... **gg**

Neimorischer Krom, awwer.... es dauchd was....alla des muss ich jo saa.

Kreiz-egal, kää Kranged dauchd werglich ebbes.

Ich vemiss audofahre, moi Rad un alles was grad ned gehje dud.

Wommer hald so e bleed Hingel is un ned uffbassd wumer onnelaafd, muss mer hald a waade lerne, bis alles gehäld is -  un  geduldisch wie en runselische Abbel sinn...gelle....

Alla dann, bis nexschdesmol.....

 

 

Heit mol nit in platt, weil's er jo aach ned so geschriwwe hat.

Heit Moije – ich fahr moi Mobbed hoch, machs Poschdfach uff un wumms....

Es trifft mich mit voller Wucht. Ich fang o ze lese.

Sanft, lind, macht Wärm' sich in mir breit un ich vegess um mich erum die Zeit.

Tauch eninn, in die Welt, vun * Ihm* geschribb –

Alles was do steht vemisst – un froo mich -

was is dodefor geblibb ~~~

 

" Gefühl eines wunderbaren Mannes in samtenen Worten entdeckt"

 

Das Fühlen von Liebe

Das Haar von dir erreicht mich wie der Frühlingsflieder

Ein warmer Stein ist deine Hand

In deinem Kuß legt sich die Stille nieder

und das Gefühl bekommt ein königlich Gewand

Was hier im Irren in der Zeit

so ruhelos da fort mir glitt,

findet zurück in deinen Armen weit

und nimmt mein Herz nach Haus mir mit

Ich seh so gern in deine Augen,

die ruhelos und friedlich sind

Am Sinn des Lebens fest sich saugen,

was aus mir flieht war taub und blind

Ich hör so gerne wie du leise sprichst,

wenn sich im Neonlicht dein Mund bewegt

Mit schönen Worten du das Schweigen brichst

und Sinnlichkeit sich um uns legt

Ich spühr so gerne deine Wangen

Dein Atem haucht ins Ohr mir ein

und kein Moment da trauert, um das Vergangen

Der Liebe Schöpfung ewig Sein

Vergessen ist das Ideal,

was ich im eignen Wahn doch nie gefunden

Vergessen die perfekte Qual,

hinabgespült die alten Wunden

Wer will denn wissen was einst war,

gar immer wieder reiten auf den toten Pferden

Es ist nicht wichtig ob die Zukunft klar

Bewässern trocknes Land für neue Herden

Es hat uns nicht verführt

zu sein im Schein der Triebe

Es hat uns tief berührt-

Welch Frieden diese Liebe

 

"" Zukunft"" was ist das - und.... *ist das*......

Danke für diesen zärtlich-wunderbaren Augenblick, sagt leis die Paelzermad

 

 

 

 

 

Puuuhhhhh...endlich Freiddach.....

"Ach was sinn des Affe, die wu am *Frei*daach sogar jezerd noch feschd schaffe"

Also mir däät jo schunn de Hinnern jugge, nothin e bisje uff die Roll ze geh, es bisje naus, was onneres siehje.
Vielleicht sogar wohie, wumer e bisje lache kann.

Bin werklich grad am üwwerleeche.
Do es nore e klää Problem.
Bei uns hääst's immer
*Freidaachs gehn nore die Bettsäächer aus* un zu denne will ich jo ned grad geheere ;-)

Awwer es kännt mer jo grad egal sinn -
do in de Kammgarn spielt e prima Band....
kännt mer mol widder e bisje mimm Äschje waggele un e bisje flärde :-)

des däät de Seel grad gut.
So e gud Tröbbsche im Glas fungele losse, en nedde Typ hinnerm Bobbes mitschungele losse,

gudi Mussik hääre un ääfach die Welt mol fer paar Schdunne drauslosse.

Jo des mach ich....

un ausserdem....all die wu dord sinn, des sinn jo dann schliesslich aach "Bettsäächer"  ;-)

Was määnchen du...

gehsche mid......

kumm gehmer....

 

 

 

 

Schää wars "Alde", schwer aach un schuld dro an so manchem grauem Hoor

 Wann isch iwwerlee was alles so bassierd is in denne dreihunnerdfümfunsechzisch Daa

ich redd jo gar ned mol vunn dem, was in de Weld so war  

Nä ich mään so ganz allääns fer mich  

Gefrät hann ich mich üwwer viele klääne Sache, e schää geel Reesje, wu ich geschenkt hunn krieht -

unser Paulche, dassem werrer besser geht

moiner Familie, dasse sich vunn Schlääsch erholt, 's is schunn gut dass mer nie vorher wääs, wies werre sollt  

E langvetraudie Schdimm am Dellefon, hot de Weech ins Herz im Nu gefunn nie vergess, nor dief in mich eweggeschloss harrisch die schunn  

Schää gewess sinn die vier Johreszeide, jed so versich hat ebbes ze veschenge

Ich du gere an die wunnerschääne Gaadeschdunne denge

Jed frei Minudd war ich do draus am wergele un maaije mid de Nochbersleid

Wie oft hot ääns iwwer de Zaun geruf, donn un donn is des un des, du wääch Bescheid  

Gligglich war ich aach in schääne Schdunne, awwer die kammer zähle

So manchie dodefunn hann ich mir misse schdehle  

Alsemol Nomiddaachs hunn ich mich ääfach in moi Wächelche gesitzt

un bin de Berch enunner, dorch die Vorrerpalz geflitzt 

 Irchendwo en Waldschbaziergang, e Blimmelche am Wechrand,

e Tass Kaffee, e Lächele nur

Fer mich warn solche Schdunne Erholung, grad no de schdressich Aawet – "Glück un PUR"  

Gegreint hann ich aa, häämlich draus im Wald bei meine Diere ledschd, wie mer gemäänt hänn, dass mer die Aawet kännt veliere 

  Trotzdem, orrer grad se Läd ver Zorn, guggisch neigierisch niwwer in des Neije

Bin bereit se kämpfe un du mich irschendwie doch aach druff freije.  

 "Un aussem Chaos hot e Schdimm geschproch

's kinnt schlimmer sinn, kumm lächel doch  

ich lächel - noch"  

Eich all ein "Gude Rutsch" ins Neije  

Ich hoff, ähr kännt eich aach druff freije.......

*uff's Neije ...... Johr*

 

 

 Am Samschdaag –

Ich kumm ans Audo, klemmt hinnerm Scheiwewischer e wunnerschäänie langschdielischie gelwie Ros. En gons leichde rore Rand ausserum had se aa.

Ich hunn die abgemach, mich in moi Audo gesetzt, moi Herz hod gerasd, moi Gedange Borzelbäm geschlaa.

Wielang hunn ich gesess un die wunnerschää Ros ogeguggd.

Wer die do hiegeschdeggt hot..... 's konn jo bloss Jemand soi wu wääs, wie gern ich geele Rose hann.

Es kunnt aach nore Jemand soi wu wääs wo ich wohn, wo moi Audo schdeht.

Eischendlich kämen dodefor ned Allsoviel in Frooch, hunn ich so fer mich gedengd...

Ään Beschdimmder-----awwer nee, des konnisch mer ned vorschdelle. 

Ich hunn mer de Kopp vebroch, awwer genitzt hots mer jo nix.

E zwädd Meeschlichkeit ded mer noch innfalle, awwer des konn jo garned soi.

Der iss jo viel so weid eweg un des is long, long her.... 

Im Audo dann, uffem Weg bei moi Momme is mir des Alles widder ingefall..... 

Jetz is des jo schunn Johre hä, wu ich emol e schnuggelich Kerlche so e bisje bussiert hann. Noja, 's war schunn es bisje mäh alswie nore Geplängel. E bisje Jinger wie ich warer, aarisch lieb, aach veheirat un vedammt allä. 

Sellmols wolld'er dass ich alles hieschmeiss, middem eniwwer mach in die neije Bundeslänner. Nää, erschdens deet ich moin Fomilie jo nie allää losse un zwäddens wär mer des viel zu weid fort gewääs. 

Do is'mer Johre veheirat, die Luft is raus -  un Daach fer Daach draus unner de Leid. Sowas bassiert halt mol, kommer wenisch bis gaar nix degeeche du. Hauptsach mer wääs soi Grenze lein un vegesst die ned. 

E halbjohr isses immer hie un här gang, üwwers Dellefon und de Pzeeh. Gesieh hun mir uns dreimol hiwwe un zwäämol driwwe. Es war immer mäh Diefgang mit im Schbiel un bevors so richdisch weh dut wolld ichs liewer auslaafe losse. 

Gebiddeld un gebeddelt hodder, awwer ich kunnt ewe ned annerschd. So hod's e ledschdes Treffe geb mit Träne – Er war de erschde Mann wu ich greine gesieh hann un genau in dem Moment hunn ich mich erschd rischdisch inne veliebt. 

Hädders gewisst, er hätt nie im Lewe logger geloss. So awwer hodder moi Gründe ogenumm un gesaat  - dasser mich irschendwo dief in sich drin schunn veschdehd -  mich awwer schwere Herzens gehe losst, weils moi Wunsch is unweil'er mich so aarisch gern hod. 

Obs werglich do noch moi Wunsch war, dodrüwwer wolld ich am Beschde dortmols ned nodenge. Ich hab mimm Kopp un ned mimm Herz entschiede, hab mich umgedreht un bin gang. 

Ich wääs noch, moi alder Chef had uns sellen Nomiddag inne Kaffee oigelad.Ich bin hie, awwer was do gered wor is, orrer was in dem Kaffee war, des hab ich garned worhgenumm.........

Zwää Monad schbäder hodder soiner Fraa gesaat wie ugligglich er in ährer Beziehung is un dasser liewer alää lewe will, alswie so weidermache. Heid sin'se geschied.

Er hod in soiner Firma e äfach Frääsche aussem Birro kennegelernd un lebt jetzerd midde'rer beinonner.

Lieb vunn soiner Seid isses ned, awwer sie gebd'em die Wärm wurer in soiner Ehe, all die siwwezeh Johr vemisst hot un des is aarisch viel – saat'er. Ich glaab'sem. 

Wu moi Herz is, des wääs Sie un sie is schunn froh fer all des was ich ihr gewwe kann – saat'er aa, wann mir so ab un zu mol am Dellefon redden.

Ich hannem Sellemols veschbreche misse, dass mir uns ab un zu mol orufen un wann ich ihn brauch, dass ich des aach saa un ned hinnerm Berch hall....

Gebrauchd häddichen schunn so manchmol, gesaat hunnichs nie. Er hod widder en Platz im Lewe gefunn un ich kumm serechd. 

Geschdern Owend iss e MMS kumm. Dodruff hot mer zwää Audo newernanner schdeh gesieh, drunne uffem Parkplatz.

Moins un Soins, die Nummer war deitlich se erkenne. Moi Herz hodd ään Momend ausgesetzt....

Uff de ää Seid isses e usachbar schäänes Gefiehl, se wisse.....

Uff de onner Seid bluden alde Wunde....

Aach ich vegess niemols denne Woihnachtsmerk in Dreschde – es erschde Adventwocheenn.....Sellemols......

 

 

Jetzt isses glei halb drei und ich hock do in moiner Hitt ganz allää.
Drauß die Sunn, wäes aach ned wasse will. Mol scheintse un mol kännt mer määne dasses glei pitschd.

Die Ganze Moije hann ich geschafft wie en Brunnebutzer.
Hanns ledschde Gemies aussem Gaade abgebrieht und ferdisch gemach fer die Kiehltruh, hann siwwezeh Schobbe Quittegelee gekochd, un de ledschde Entsafder schdeht jetzt uffem Herd.

Dezwische hann ich noch Grumbeerpannekuche geback.
Die Abbeschdiggscher fer dodezu hann ich jo Geschdern glei mitgekochd, wie ich die Äbbel fer denne Abbel/Schdreiselkuche geschält hann.

Moi Kreiz schbier ich nimmie, froch mich sowieso seit Daache, ob des iwwerhaupt moins iss.

Monchmol denk ich mer jo aach - wie äefach dasses die Fraue hann, die sich alles kaafe gehn.
Mit Tärkekoffer de Aldi schdürme .....noja, moi Sach is des ned.

Ich bins hald noch so gelernd vunn Dehääm, des is äefach drin.

Awwer äens wääs ich - des Quiddegelee is jetzt des ledschde, donn hann ich nämlich sowas vunn gar kää Luschd mäe.....

un Kisch abwäsche...ich glaab des loss ich am Mondaach ääens vunn moine Mäd mache
 
Ich richd mer moi Kuschelsessel mit ~alles drumrum~  was ich fer nimmie uffzuschdeije brauch 
un dann bloss noch Fies hoch un mol sowas fers Herz im Fernseh gugge. Dodebei e Gläsje sanfde "Rode" geniesse un die Seel so richdisch bambele losse.
Ich hann mer soviel Filme uffgenumm, kann se jo iwwer Summer awwer kaum gugge.
Desweche iss schää dasses Herbschd is.

Endlich Zeit fer mich un alles was ich so gere hann
Soll bloss jetzt känner schelle un was vunn mer welle. :-)

Gruß an all die geblachde Hausfraue dies aach ned besser wissen.

Wie hääst der schänne Schbruch:

**Warum donn äefach, wanns aach umschdändlich geht**

Awwer was macht mer ned alles fer die Gosch un die Familie....gelle

Bleibt jo immer noch de Sunndaach

mänt die Paelzermad

 

 

                                       

Jessas war des schää uff däre Insel Borkum.

 's iss zwar wohl vedammt weit, ball zeh Schdunn mit de Eisebahn se fahre, awwer des "AHA-Gefiehl" wommer dort aussem Zuch schdeit un des Wasser, die Fähr un denne Katamaran sieht.

Ins Heisje, die Fahrkard kaaft un ab uffs Schiff. Des fahrt nämlich zwää Schdunn bis uff die Insel un mer derf ganz drowwe uffem Promenadedeck sitze un sich alles ogugge. Beim Kat derf mer des net.

Die Sunn hot gescheint un glei druff isses losgang.

Huiiiiiiiii hot äm do de Wind an de Hoor geroppt un äm faschd umgepuuschd.

Ich hunn des awwer jo gewisst un hat jo dämentschprechend schunn en Jagge o, mit Kabuzz un Kraache fer zusemache. So hot des en mords Schpass gemacht.

Enausfahre, noch e guud Schdick am Feschdland entlang un dann ganz enaus uff die uffene See.

Kudder warn do beim Fischfange un die Leid hunn gewunge.

Schwimmende Roschdlauwe, wu mer sich gedengt hot, wie die bloss zesammehallen un ned absaufen..... Un Schiffe mit Flagge vunn "gottwääswuhär"..Hach Gott, war des schää.

E paarmol hot der Hawwe jo ganz schää geschoggelt, ohauwahauwaha..... Do hots e paar ganz schää dorchgeschiddelt un die hänn ogefang ze reiere, (also iwwer die Reeling die Fisch se fiddere) *gg*

Hallo, bassen uff dass ner ned geesche de Wind schbuggen, weil.......hunn do zwää Matrose geruf, un sich debei ääns gegrinst.

Die Paelzermad will jo ned ogewwe, awwer ich bin absolut seefeschd, des hot sich in junge Johre schunn erausgeschdelld, un iss Heid noch so. Awwer ehrlich gesaat, wammer Onnere reiere sieht, des kann äm dann schunn hewe, alla guggd mer besser wuannerschd hie.**g**

 

No zwää Schdunn, war fer die ame Wärm, des jo dann aach ausgeschdann.

Die Fähr hot im Borkumer Hafe feschdgemach un die Menschemass hot sich mit dere Riesemeng an Koffer un Bagage vum Schiff enunnergewelljert un in die Klää Bahn eninngeschafft.

Mit dere simmer dann zwansich Minudde dorch die Prärie geruggelt, bis eninn in die Schadt, an de Bohnhof.

Uff dere Zuggeltour hot's jo glei jedie Meng Nadur pur se siehe geb.

Die Sanddornhegge warn e Pracht, voller oranchener Beere hunn die gehängt. Schbäder hunn ich dann gesieh dass die ganz Insel werrer voll defunn is, un hunn aach alle Daag e paar defunn gess. Sollen die jo aarisch gesund sinn, viel Vitamin C un so.... Nore ä Nodääl hadden die. Die warn so sauer, richdisch härb, die hunn äm glatt ess Hemm in de Bobbes gezoo...**gg**

Na gud, awwer erschdemol wärrer serick an de Bohnhof in Borkum.

 

Dort hot sich des ganse Menschkneijel uffgeleest in Wohlgefalle, Jeder is in e anneri Gass un hot soi Quadier gesuchd.

Alla, ich war aach gans schää geschaffd – hunn moi Schdubb bezoo, bin erschd mol schää hääs dusche gang, des hot die Lewensgeischder werrer ebissie geweggt.

Die Schdubb war urgemiedlich, sogar en Kuschelsessel un en klänne Fernseh hat ich gans fer mich allä.... un -  **herzhuppsfräd** wie wann die's gewisst hädden, dass ich geel so gäre hann – die Bettwäsch war e wunnerschännes geel mit oranchefarwene Sunneblumme. Ich hunn mich gefräd wie e klännes Mädche.

De Koffer war glei ausgepackt un moi Klamodde im Schrank.

Ich hats jo net weit, also nix wie enaus un enuff an de Schdrand, im "Blanke Hans" **GunDach** gesaat.

Jessas war des e wunnerschääner Oblick, die Sunn is ball druff langsam unner gang un moi Herz als mä uff, grad wie e Hefedäälche.

Lang kunnt ich an dem Owend awwer nemmie mache, ich war platt wie e Flunder un bin net'mol mä was esse gang, glei in die Heia un hunn geschloff wie geschoggelt, bis Frieh um siwwe.

Beim Friehschdick hunn ich dann faschd uverschämt zugelangt.....Jööö....ob ich mich dort nochmol siehe losse kann...wer wääs **gg**

Awwer des war mär egal, weil....wann die Paelzermad Hunger hot kennt se net mol mä ähre Geschwischder un schunn gar net die Geschwischderkänn.....**g**

 

Endlich satt, bin ich dann schräsch eniwwer bei de "Drohtesel", so hot der Fahrradlade gehääs. Dort hunnich mer glei fer die gans Zeit uff de Insel e Rad gelähnd.

26 Ömme hunn ich dodefor gelöhnt, awwer ohne Rad issmer werglich uffgeschmiss uff sorer Insel. Alla, hunn ich gedengt, was solls un bin losgebrummt.

Glei e paar Schdunn am Schdick uff dem Drohtesel, dezwische korz Fisch esse gang un werrer weider bis schbäd Nomiddags.

Nemmie dro gedengt was des fer Folche hawwe kann un dann Omends..... ohauwahauwaha.... Der Bobbes war nimmie moiner…. un Muschgelkader hot des aach geb, zwar ned soooooooo schlimm, weil schlau wie ich jo doch dann noch war, hunn ich mär glei noch Magnesium uffgelöst un e Glas voll getrunk.

Fer die näxschd Fahrt war ich jerenfalls besser "gepolschderd" – des kännener awwer glawe....

 

Fahrde hann ich alle Daach gemach, an alle Ende fun de Insel war ich - un des war Daachweis ziemlich weid enaus, die Insel is jo gans schä groß.

Oohr, ich hunn ettlische Kilomeder geschrubbt uff dem Dreigangesel, awwer toll wars un was ich alles gesieh hann –

Dorch denne ähre "Wald" bin ich aach gefahr.

An viele Bäämcher hunn Daafele geschdann mit de Name un Erklärunge.

Jessas warn des klänne Bämcher, nit so wie im Pälzerwald. Ich glab, wann so en Insulaner ämol unsern Pälzerwald siehe kännt, der wär glatt erschlaache vunn denne hohe Bääm.

Nie im Lewe hunn ich so klänne Abbelbääm gesieh, wie dort.

Ään Baam war voller klänner Äbbelcher gehängt, richdisch iwwervoll, awwer die warn grad wie Mirabelle so groß. Ich bin vum Fahrrad abgeschdieh un hunn den Baam beschdaund -  wunnerprächdisch ozegugge...nää, sowas schäänes awwer aach.

En klänne Teich mit Seerose un Ende druff – iss mer vum Rad geschdieh, sinn die glei ogewaggelt kumm bis an die Fiess un wollden was se fuddere.

Awwer e großes Schild am Rand hot genau des grad vebott, alla hunn iches aach sinn geloss.

 

Immer wann "auflaufendes" Wasser war bin ich enuffer an de Schdrand, die Schlabbe vunn de Fies, die Hosse bis zu de Knie enuff un ab eninn in die Brieh.

Viel Leit hunn des gemachd un Manche hun echd ulkisch debei ausgesieh, wiese so die Bää ball bis ans Kinn gehowe hänn, wie de Schdorch im Salad -  un uffgebasst, dass die Hosse jo net nass wärrn.

Do is e safdisch Well kum un baufdich, warnse doch nass.

Kneipp hätt als soi helle Fräd an uns gehatt.....

Draus die Muschelfelder warn bei rinnkummend Wasser e wahrie Fundgrub un die Leit hänn gesammelt was die See härgeb hot.

Die Möwe sinn dezwische hie un her schdolsiert un hunn sich sattgefress.

Wommer do nit uffgebasst hot, uffemol hot mer midde in de See geschdanne un's is Zeit wor dass mer Fersegeld geb hot und weider serick gange is, weil mer schunscht bade gong wär, awwe ufreiwillisch.....

Iwwer die Muschelfelder, dorch en Priel hot mer enaus zu de Seehundbank laafe känne.

E Haufe Diere hunn sich dort gesunnt, ich hunn jo aach mol vesucht mitsezähle, awwer bei iwwer hunnert hunn ichs dann sinngeloss - wunnerschää denne zusegugge.

Schdunnelang hätt ich dort bleiwe känne, awwer wann dann Flut war, war de Rickweech dreimol so lang wie bei Ebbe un des war dann doch vedammt weit.

 

Hui....awwer am ledschde Samschdaach,

do hot de "Hans" uns mol gezeit wasser kann.

Freidags Nachts isses schunn losgang.

Mer hot de Wind peife geheert, dass mer gemänt hot, draus uffem Dach deeten rollische Katze kreiche. Des hot sich werglich iwwel ogeheert.

Un Moijens dann..... ohauwahauwaha....

Beim Friehschdick aussem Fenschder kunnt mers siehe, wie de Schdurm iwwer die Schdat gefeeschd iss. Die Leid warn immer noch debei ehr bisje Kram se sichere.

Blummetöpp sinn erumgefloche un diverses Annere was net ogepinnt war, aach.

Ich bin dann trotzdem enaus, weil mich Nadurgewalde unheimlich fesselen. Bis zum Ofang vunn de Schdrandschdross bin ich jo aach gans gut kumm, aaawer dann kunnt mer alläns nimmie weider gehe.

Schä war wie wildfremde Leit sich gescheseidisch oigehängt hunn un so e Kett gebild. In Schrächlache hann mir uns dann dem Schdurm entgeesche geschdellt un Schritt fer Schritt die owwere Promenade erreicht.

"Welch ein Anblick "

Der "Blanke Hans" war gans schää wierisch.

Mit **Windschdärk zwelf** (hot uns schbäder en Einheimische verzäält) hot der die Welle an die Uferpromenad gedrosch un Liecheschdiehl mit enausgeriss.

Die Männer sinn in die Gischd geschdieh un hunn vesucht feschdsezurre, was noch ging, hunn Schdrandkärb hochgezerrd un wer kunnt hot mitgeholfe.

Die Fähr vunn Eemshafe eriwwer wollts jo ubedingt prowiere un hot zwä Schdunne lang vesucht im Hafe feschdsemache. Was die Leid angschd hatten uff dem Pott...ojeh....

Des hot mer schpäder jo alles geheert.

Un doch – do midde drin se schdehe, des se erlewe....die Gemeinsamkeit, die do ohne groß se frooche, entschdeht – des is Erlebnis PUR.....

E paar Schdunne schbäder hätt mer määne känne, dass do nie was war.

Die Schiffe kunnden endlich innlaafe un die Leit wu de ganse Daach schunn driwwe in Emde hann waade misse, die kunnden endlich uff die Insel kumme.

Die warn all ferdisch wies Riebsche.

 

Jo, un so sin die zeh Daach vegang wie fortgefloche.

Freidaach de dreizehde war moi ledschder Daach uff de Insel.

 

Ich will jo kää Werwung fer Borkum mache, awwer seit dreiunzwanzich Johr ziehts mich vunn Zeit zu Zeit immer werrer do enuff un an die Nordsee sowieso.

 

Die Lieb dodezu hunn ich wohl vunn moim Babbe geerbt.

Dem soi große Leidenschaft war die See. Er war jo bei de Marine un ach e zeitlang uffeme Uboot. Nore die Lieb zu moiner Momme war greeser, schunscht wär der nie zu'rer "Landratt" worre, nochem Kriech.

Immer wann ich uff so me Schiff schdeh, die Salzluft rieche kann un die raue See, dann wääs ich was moi Babbe soi Lewelang insgeheim vemisst hot un....ich kanns veschdeh.

 

Die Einheimische do owwe nennen Borkum jo  ähre "Alcatraz " jetzt wo so langsam de Winder werrer kummt.

Ich hunn mich Geschdern uff dem Kat serick no Emden gefroot, wo die zeh Daach bloss abgebliwwe sin, wieso der schää Urlaub schun widder erumm is.

 

So hot Jeder soi Problemcher – De Ää macht Urlaub wo de Anner lewe muss un sieht nor die schää Seit - un der Anner deet vielleicht jo gere mol Urlaub mache wo ich leb, wer wääs…..

 

Ich wääs awwer ääns gans beschdimmd –

Moi Pälzerwald mäschd ich ned misse, awwer irschendwann muss aach des Wasser werrer sinn, un seis nore werrer fer e paar Daag, so wie ewe.....

Die Paelzermad winkt nochemol dem "Blanke Hans" un ruft

"wonn ich kann, kumm ich werrer".

Alla Dann……

 

Ohänge will ich noch en bsunners liewe Gruß an die nedde Leid aussem Hämwärtszuch....

Die Muddi mit dänne zwä aarisch liewe Mäd - un des nedde Ehepaar, wu unser Palz faschd so liebt wie ich.

Vielleicht lesen die jo moi Geschischd...wer wääs.....

 Jetzt war ich doch beim Danny uff de Seite und hann des mit der Handschrift deite aach emol gemacht.

Was dodebei üwwer die Paelzermad so rauskumm is,des lesener do

Die Deutung der Handschrift brachte folgendes Ergebnis:

Die Schreiberin ist selbstbewusst und bereit,
ihre Stärken auch anderen zu zeigen.
Sie ist locker und großzügig.

Ihr ist sehr wichtig, nach außen etwas darzustellen.

Die Schreiberin ist ein impulsiver, unsteter, vielseitiger und unkonventioneller Typ.
Es fällt ihr nicht leicht, sich anzupassen.

Sie ist von sich überzeugt und hat eine eigene Meinung.
Sie lässt sich von anderen nicht so leicht beeinflussen,
auch nicht von einem "Das gehört sich aber so."

Sie ist sehr sinnlich, warmherzig, gemütlich und phantasievoll.
Im Großen und Ganzen wirkt sie gelassen bis uninteressiert,
wenn sie aber von einer Sache überzeugt ist, überrascht sie
ihre Umwelt durch ihr überschwängliches und begeisterungsfähiges Auftreten.

Sie ist lebhaft und kontaktfreudig.
Mit viel Verständnis für die Belange anderer.

Die Schreiberin ist ein sehr gefühlsbestimmter Mensch.
Oft werden Entscheidungen gefühlsmäßig gefällt, obwohl bei
rein rationeller Überlegung eine andere Entscheidung die richtige wäre.

Sie besitzt einen schöpferischen Schwung.
Originelle Ideen zu finden, fällt ihr leicht.

Die Schreiberin ist anderen Menschen gegenüber immer offen und aufgeschlossen.
Der Umgang mit Menschen macht ihr Spaß,
der ideale Arbeitsplatz ist da, wo sie mit anderen Menschen zu tun hat.

Die Schreiberin ist sehr stark um Gerechtigkeit bemüht.
Sie versucht stets, sich für andere einzusetzen.

Die Schreiberin wirkt oft etwas nervös und wenig entspannt.Des iss jo kää Wunner bei somme Schdress de liewe lange Daag,

awwer ich bin jo gepläddelt dass faschd alles schdimmd

"Mer kännt jo grad määne, dich kennen mich"


Diese Deutung wurde auf den Seiten von www.graphologies.de erstellt.

 

 

 

Wärschs net glaawe, awwer die Pälzisch fahrt tatsächlich nuff ons Wasser.

Jo, se denkt sich halt, Wald hann ich jo iwwerisch genuch, jetzt muss Wasser hää....  ‹ (*_*) ›

Die Seel muss jo aach emol e bisje bambele un de Kopp freibloose losse, iss aach net vekehrd.

 

Ich bin jo nore mol geschbannt, weil die Nord- un Oschtseeler verzäält hann, dass all die Schdrandkärb eweggeramt worre wärn.

Ei do kinnt mär sich jo nemmie setze.

Awwer eischendlich glawisch des aach net, e paar wärrn die schunn noch schdeh geloss hunn.

 

Was mer innpagge soll is jo aach so e Sach, ebbes fer warm, ebbes fer kalt un schunn war de Koffer probbevoll.

Üwwerhaupt de Koffer..... der is jo schunn unnerwechens, un jetzert vezählen die jo iwwerall, die Bahn däät schdreike.

Ei doch hoffentlich erschd wann die moi Koffer do owwe iwwers Wasser geschippert hunn, un ich donn aach dort okumm bin.

Net dass ich dann dort hock un hunn kää Hemm un kää Hosse fer on de Bobbes se zieh. Des ded jo grad noch fehle.

Donn kännen die jo zeh Daag schdreike, des ess mer donn aa Worschd.

 

Ach was muss mer doch alles besorche, richde, iwwerleesche un im Hinnerköppche hawwe, eh mer sich do fer e paar Daag verabtschüße kann......

 

Geschdern war ich jo aach noch Keschde sammele im Neischdadter Wald, weil, bis ich werrer häm kumm werds jo känni mää gewwe, un moi Momme esst doch fers Lewe gern des Keschdegemies.

Alla wärr ich die hald Moije aach noch koche, un vielleicht finn ich jo aach "wen" fer zum schäle helfe... mogugge.. ‹{●_●}›

Neije Woi hann ich uffem Hämwech jo aa wellen mitgenumm – Weiße un Rore....moiliwwer, moiliwwer, der zieht däer awwer die Schlabbe aus, des konnischder flüschdere.

Ich hann zwää Gläsjer gepitscht Geschdernowend, uff äämol machts bumms un flachgeleet hots mich. Der hot gonz schää Zunner uff de Bix gehatt, ei dunnerkeil.....

Gottseidank hots kään Hoorschbitzekatharr gewwe, was jo beweist dasser net gepanscht war.....gelle....

Awwer geschloof hunn ich dodenoo wie im Hannegret soi Bawwettche, net im Bett erumgeborzelt, wie schunscht alsmol.

 

 

Heit Moije dann hot der Rore noch gelangt fer zwä wunnerschäne Rotwoikränz. Der Kuche schmeckt jo dodemit erschd richdisch gut un änner kriet jo aach die Momme.

De Latwerch is gekocht, de Abbelsaft jo aa, die Quitte kännen hänge bis ich werrerkumm, alla konns losgeh...

 

Juchuuuuuu die "Pälzersch" fahrt in Urlaub !

 Awwer dassnermichnedvergessedunbisichwerrerkumm

Alla schüß **gg**