Geschichde vunn Dehääm

 

 

Also ebbes iss mä die Daache uffgefall.

Die Feierdaa sinn noch ned rum un jedes Johr Dehääm das selwe Gespräch: „Dunnerkeil - Ich hann schun widder  zugenumm“ üwwer Woihnachde unn no Silveschder kannsche mich rolle. 

Jo, die Daa werd hald gudd gess - unn vor allem geschnäägd.

Die viele Blätzjer, de gude Kuche, die Schoggelaad, des Mazzipan unn wie des sieß Zeich all heesd.

Wanns vor ähm schdehd, wer kann dann schunn nää saa. 

Unn nohm Friehstick denkd mer anns guude Middachesse – was werd’sen koche, die Mad.

Dann an de Kaffee - un beim Kaffee frohd dann de erschde, ei was gebds dann beim Naachdesse.  

Unn de Daah druff des selwe Schbeelsche werrer.  

No de Woihnachde hääsds, was gebds an Silveschder. „Machsche mol e bisje Nurlsalad, ich hätt grad mol Luschd druff“

Unn Ofang Neijohr määne mir dann, die Wooh wär kabudd.

Moi Mann jäämerd am määschde, weil die Hosse nemmie zueghn.

Ich lamendier jo  aach, awwer nedd so aarich – moi Hosse hunn jo en Gummizuuch :-) 

Jo - unn dann gehds bei die Ernährungsberodern.

Die kaut äm dann e Ohr - saad, des wärn nedd die Punde zwische deFeierdaache, das wärn die Punde  zwische Silveschder unn Woihnachde.

Kää Ahnung hod die Frää... Orrer…..

Am Enn had die Sell velleicht noch rechd ;-) unn mir guggen dumm aus de Wäsch.

 Also, schiewen mir nix meh uff die Feierdaa.

Awwer wohie midd de Punde? – wo schiewen mir die jezz anne :-):-) 

In dem Sinn  -  eich all

 en "Gude Rutsch"

 un bleiwen mir *gewooche* gell :-)  ;-)  :-)

 eujer ~~paelzermad~~ 

 

 

An allminanner die, wu mir fer 2007 die beschde Wünsch
geschickt hadden –

des hot üwwerhaubd nix gebrung –

will saa, des hod jo ums veregge nix genitzd.

Desdeweeche lossen die deire Winsch fer des neie Johr

am Beschde sinn - un schiggen fer 2008, entwedder Geld,

Benzingudschoi,  odder e paar Fläschjer  Rotwoi,

awwer kään Raddegiggel, 

gelle.... Danke !

  
 
In diesem Sinne...

"Eich e Gudes Neijes" !

wünscht die paelzermad

 

Woihnachdsgeschenge.....

 

Fer die Momme

Was fer die Kich, prakdisch musses sinn

In soim soiner Kich bassd immer noch was ninn

 

Fer de Babbe

Was häämache musses un derf ned viel koschde

un kää Schdorzblech, des dud roschde

 

Fer Ähn

E Geldbeidel velleicht, uff alle Fäll aa Sogge

E Flächje Woi, gud awwer ned so drogge

 

Fer die Tant

E Buch, egal - Hauptsach was ze lese

Die Auswahl is noch nie so groß gewese

 

Fer de Bu

Hosse aach un Hemmer kammer kaafe

Meesd mer dofor bloss ned sooo weid laafe.

 

Fer Es

E Schdreisje geele Rose un e Pafengfläschje

Des machd sich gud im neie Lerrerdäschje

 

Hach is der des e Schdress mi all denne Geschenge

Moi Kopp, der kann schunn nix mäh Anners denge

 

Un sicher wie es Amen in de Kärch - gepiff, getrummeld un berauschd

Korz no de Feierdaa, werd alles werrer umgedauschd

 

Na dann...... :-)

© paelzermad

De Babbelbawwed soi Dochder, bei däre schdimmd jo aach der Schbruch:

"De Abbel falld ned weit vum Beerebaam"

 

Geschder hunn ichse gesieh, vor de Mezz middem Krischdmann Hoiner soiner Fraa – es Ellis, vezeele.

Määschd ned wisse, wen sie werrer dochgehecheld hunn, jerenfalls hod des Sell soi Innkaafsdaach misse abschdelle, dasses hod känne mid Hänn un Fies balaawere.

 

Ich bin bei die Gemiesefraa, hunn Tomaade, Trauwe un en Koppsalad gehol – die hunn balaawerd.

 

Ich bin eniwwer bei de Schuhmacher, hunn im klää Ernschdche soi Schdiwwele abgehol. Die hunn misse nei besohld werre, eb dasses Sauwedder kummd - die hunn balaawerd.

 

Ich bin bei de Bägger Engemann eninn, dort wars Weißbrod fer de Sunndaag beschdelld, hunn noch e "Schwazzes" midgenumm, die ald Burchderfern hod e bisje vezeelt mit mer,  bin enaus - die hunn balaawerd

 

Ich bin in die Mezz eninn "'nDach" gesaat beim vebei gehje, die hunn mich neddemol gesieh.

's war bummervoll, ich hunn gewaad, hunn moi Fleesch un Worschd gekaaf, bin enaus  -die hunn immer noch balaawerd.

 

Du moiner Seel, denk ich fer mich, wie kommer nore so ellelang Vezeehlscher halle.

 

Ich kumm ums Eck, do schdehd es Babbelbawwed  bei de Schmidden vor däre ährm  Fenschder.

Gemoije Lina rufen die zwä mer  freindlich schunn vunn weirem zu.

Du, wääsche schunn's Neischde, de ald Schbächle is geschdorb uns Moniga, was jo soi Enggelsche iss, des hald Heid trotzdem soi Hochzich, denk deremol do anne.

 

Nä, gehford, no do heerd sich doch alles uff, saa ich un schdell moi schwerie Dasch mol e *Aablick* ab....

 

Aischendlich wolld ich jo Grumbeerpannekuche un Abbelbrei mache – nore war's mer dodefor jo dann Geschder e bisje knapp.

Alla de Hannes essd die aach noch am näxschde Samschdaach......

Ä Kichegedichd

 

Die Kich soo schnuggelich un uffgeraamd – iss wovunn jedi Hausfra draamd.

Probbesauwer schdehd dann alles do, vum Gescherrschrank bis zu de Kichewoo.

 

Doch is die Momme mol in Kur – herrschd ball es Chaos  - un des pur.

Weil wann de Hausmann dud rechiere, die Ordnung duder ruiniere

 

Kää Ohnung vunner Mikrowell – nixdesdodrotz, eninn un zu – es gehd jo schnell

Laafd ebbes iwwer un gebd Babb – machd nix, beim näxschde Koche platzt des ab.

 

Kummd die Mamme dann serick – un fräät sich uff Ähr beschdes Schdick

Die deier Kich, die schääne, was muss die dann zum Schreccke säähne.

 

Es Gescherr- määschd Scherwele un Schdigge - im Kicheschrank filld des die Ligge.

So zwische Zugger un Kakau – do war noch Platz, des bassd genau.

 

Die Tepp un Panne voller Dreck – vunn kaldem Fett un aldem Schbeck.

Die Rechd vum Esse klewen in de Egge – uff de Fliese braune Flegge.

 

Die gud Fraa triffd faschd de Schlag – de Hausarzt kummd glei am Dunnerschdaag

Un schdelld die Diagnose nur – Die Fraa, die muss soford in Kur!

 

So schliessd sich aach do de Kreis des Lewens

raam nie ned uff, es iss vegewens

loss nor alles wie bei Hembels owwenuff – des rächd sich sunchd - veloss dich druff. ;-)

 

Geschribb hodds eijenswu Ääner - Nor wers war, wääs Kääner 

umgedichd hunn ich, bassend zu de Pälser Kich.... ;-)

Saa mir en Satz mit sr, awwer saa jezz nix vekehrdes.

Genau – "'sräänd"...... un wie.

Des is zum Gäsbock melge. Do frääd mer sich uff so e bisje Urlaub un was is, -  'sräänd"

Grad wie wanns äm Ääner ned gänne ded.

Oor, ich wääs aa schunn wer des ess.

Des ess beschdimmd die dusselich Trulla, wu in Mannem hinner mär gehoggd hod.

Jo, beschdimmd, die esses, weil – die hod so neirisch geguggd, wie ich do vezeehlsches gemach hann, vun weeche Urlaub un drei Woche bloss noch tralalala.

 

Ooch hänn sie's gud, sääd die, ich krie kääner. Mir hunn soviel Ärwed, do kann de Chef ned uff mich vezichde.

Jo saad ich, moi Chef is froh wann ich emol fer e paar Daach die Deer drauss bin un die Gosch hall.

Joo, gehford määnd die, des glaawisch jezz awwer ned.

Klor, kännense des glaawe -  mä muss nore  wisse wie mers Hunnsche fierhd dasses ned uff's Schdriggelsche scheißd.

 

Zwää Woche bevor ich Urlaub hann will, babbel ich dem e Ohr ab un wirrer dro, immer wanner die Deer erinn kimmd.

Des hald en Schoggelgaul aus Oascheholz ned aus – un ich krieh Urlaub......

Die hod mich ogeguggd, wie e Hingel wanns blitzt.

Fraa, lach ich, machense die Gosch zu, ehb dasses Herz kald werd.

Sundaach, korz vor zehne  - Zeit fer in die Kerch.
's Kaddel grießd "Gemoin Herr Parre", nickt no Rechts un Links un hockt sich glei in de erschd Bamk vorre anne

De Parre preddischd vun Sell un Jemen, vun Sodom un dem Annere aach  - Lieder werren gesung - un noch im Paule Ruddolf soi Dechdersche gedaafd.

Dann is die Kerch aus un nore die wu noch beichde gehen, die bleiwen hogge.
's Kaddel hoggd aach.
's hoggd un hoggd noch immer wie längschd de Ledschde außem Beichdschduhl widder erauskumm is.
Do siehd's de Parre hogge un froot "Ei Kaddel, du hoggsch jo immer noch do, willsche aach beichde odder hosche Kummer"

Nää saat's Kaddel, "ich waad nore bis Sie de Klingelbeidel ausleeren.

"Waaaaaaaaaaaas", guggd de Parre gons entrüschd,
"wie käämischen dezu vor deer de Klingelbeidel ausseleere – was gehden dich des o, wie veel Geld do sammekumm is"

"Ach Herr Parre, ei des will ich jo garned wisse, des dud mich jo gaaaaaarned inderessiere"
awwer moi Kall, dä hod an soine beschde Schaffhosse de Knobb velor-
un ich wolld hald mol gugge, ob in dem Klingelbeidel velleichd ebbes bassendes debei wär"  :-)))))))

© paelzermad 2007

 

 <<< Borsch vun Dehääm

Wann Fraue vun de Schdrosse fliehn

Un Männer dorch Wald, Feld un Kneiwe ziehn

 Es Bier im Bollerwaache schebberd

Die Kerls devor, als wär'n se debbert

 Ääner zieht un Ääner säuft

Egal, wann nore Bier un Waache läuft

 Dun mid ährm Gegröhle Hund un Katz veschregge

un brunsen uschenierd in alle Egge

 Sie zieh mit Schdegge, Hut und grad wie Jeder mag

Dann wääs ich – Heid is Vadderdag

Uff die Bääm, die Kampftrinker sinn Unnerwegs...

Die Paelzermad winscht all denne Vädder - no gud, ach denne, die's mol werre wollen

vun ausse drugge - vun inne Nass

un Heid, viel Schbass uff dere Gass

 

Bu, denk dro..... 

Egal ob du aus Hesse schdammsch-

Vunn Schweinsem orrer Wermutshause,

 ausem Saarland, orrer iwwerm Rhoi,

vunn Kläkallbach, orrer Schneggehause-

 ääns is wichdich, des muss soi..... 

Die Mundartschprosch im Hämatland

Wu uns die Alde iwerliefert hannd 

Häärt sich soooo schä o beim singe

Konn beim redde grob aach klinge 

Beim Schdreide werds erschd g'scheerd

Iwwerhaubd wann's schdreng genumme werd 

Dann widder schmeischeld se sich oi

So zard, so lieb, so foi 

Mundartschprosch, häämelich, vetraut se lese

Nie solld mer, wu mer hää is, je vegesse.

 

Knuddelgruß fer eich un

Schbass drauß an dem herrlich Wocheenn.....

 

 

Am hellischde Sundaach - ned nor dass die Erzliener uns Sunneschoi veschbroch hann....un, wo isser???? - nix is demit..... :-(
Nää, hänn die uns aach noch e gonsi Schdunn abgezwaggd.

Muschdemer heid friehjer Frieschdigg mache weil's jo schunschd middem Middagesse so schbäd werre deed un jetz leid mer des Ei mit Schinge, Käs uns Safdeschmär, im Maa wie e Baggschdää   ;-)

Des do fangd jo werrer gud o - grad wie so en rischdische Fortschmeiß-Daa, grad zum Sich-raulisch-fiehle.

Die Kreenung wär, ich gängd jetz noch in die Kerch un deet a dem Erzliener zuhorsche. Was solls, de Daach es eh vesaut, konnisch aa beede geh  :-X

Unser Vadder im Himmel
Dei Nåme soll heilisch sin,
Doi Keeni(s)chsherrschaft soll komme, 
Was du willsch, soll bassiere 
uf de Erd genauso wie im Himmel.
Geb uns heit es Brot, was mer de Daach brauche,
un vergeb uns unser Schuld 
genauso wie mir denne vergewwe, wo an uns schuldisch worr sin. 
Un fiehr uns net in Versuchung, 
rett uns awwer vum Beese. 
Dir geheert jo die Herrschaft
 un die Kraft 
und die Herrli(s)chkeet
 bis in alli Ewischkeet. 
Amen.
Ob des was helft, do bin ich geschbannd wie en Flizzeboo :-)  ;-)  :-)

(nix gesche gleiwische Leid, nore...ich glab den Schamass ned)

Nix genaues wääs mer jo ned -
was ich genau wääs is,  - dass de Schwademaa die diggschd Worschd is ;-);-);-)

Egal was kummt, was aach bassierd
mer muss bloss gugge, wie'mers Hundsche fiehrd :-)

In dem Sinn, viel Schbass uff de Gass

~~paelzermad~~

 

 

 

 

 

 

Moijens beim uffwache schbierder so en Ofluch vun Kopweh, schwizze duder un alle Knoche dunem weh.

Er üwwerleet korz obber velleicht Omends vorher besoff war, nää...en Kader konn des eischendlisch ned sinn.

Er fangt o sich selwer aarisch lääd se du un vekriecht sich greinerlich unner soine Zudeck.

Trotz soim dusseliche Kopp dengd'er grad noch dro, sich uff de Aawet krank semelle -

Schelppt sich ans Dellefon un seet mit jaamerischer Schdimm "Ich konn Heit uumeeschlich kumme, mer geht’s jo sooooooooo dreggisch"

De Pillekaschde im Bad duder dorchenannerwiehle, mol gugge wass'er schlugge kännt, was die "Schmerze" linnerd. - Find awwer nix alswie Abfiehr- un Vadamintabledde un die Antibabypille vun soiner Fraa.

Alla rufder soi Fra. Hääär…… horschemol, hun mir kää ää Gribbetablett Dehääm, neddemol e Aschberin find mer in dem Sauschdall do,wommer mol was brauch kommer nix greife, grondelt er for sich hie.

Die iss awwer nimmie Dehääm, die is schaffe.

In soim Elend un soiner allergreeschde Not, rufder soi Momme o.

 

"Häär Momme, mär geht’s jo so misserawel, ich glaab ich muss schderwe....

Ich bin gons allää Dehääm....

Konnsche ned vebeikumme un dich e bisje um mich kimmere un geh mer aa glei was inkaafe un ach Gott, bring mer nore was aus de Abbedeg mit.

Desdo iwwerlew ich ned"

 

Die Momme is innerer Schdun do, säät'se.....

 

Er holt so Mobbed (Laptop) in die Schlofschdubb.

Gott sei Donk is wenigschdens de Akku gelad....hoggt sich in soi Bett un daddelt wasses Zeich hält...bisser härt die Hausdär gehje.

Schnell veschdeggeld'er des Mobbed unner de Deck un schpield es Leire Chrischdi.

Ach Gott Bu, hosche Halsweh, "Oohr Momme". hosche Fiewer, loss mo gugge "oohr Momme"duhn der aa die Knoche weh, "Oohr Momme"...... siech awwer gar ned so schlecht aus "Oohr Momme".

Ich mach der glei mol e Sippche, des konnsche schlugge un Tee koch ich der aa.

Die Momme bleibt e paar Schdunn, umsorchd ährn Ablescher, fresst soi launisch Gedöns, buzt es Bajesje, schellt iwwer ährnie Schwiescherdochder, weil's groddeschlecht is, dass die ährne Monn in dem Zuschdand allääns Dehääm lisst

un kochd noch glei vor fer Moije.

Soball wie die die Deer draus is, hold der soi Mobbed wirrer unneraus, jaggert weirer un zobbd sich dorch's Indernet.

Jetz hodder jo alles - un Zeid bis die Ogetraude häämkimmt, hodder aa.

Des werd en rischdisch urgemiedliche Daach.

Omends lissd'er sich nochemol bemuddere vun soine Fraa.

Mer werds ned glaawe, der iwwerlebt's......

un die Wohnung is sauwer noch dezu, ohne dasser en Finger hot misse krumm mache.

Jo,jo....gewisst wie mers Hunnsche fiehre muss, dass'es ned uff's Schdriggelsche knoddeld...gelle....

Huuscht....huuscht.....Haaaaaaaaaaaaatschi

 

 

 

 

 

Desdo ess jo werglich e schlimmie Woch....

Rosemoondaach,

Fassnachts(Veilche)dienschdaach,

Aschermittwoch,

Griedunnerschdaach,

Karfreidaach,

un die Wochess jo noch lang ned erum.....

Was dun im Fasching Leid sich z'ammeraufe, de Hauptgrund is nadeerlich grööle/saufe.

Die Fra geht als Marieche zu de Funkeprobe, gutgelaund in hexschdgewaachder Garderobe

un selbschd dich hald nix Dehääm im Haus, zum Elferrat ziehts dich enaus.

Schbeckprowe mache un die Mädcher büzze, Mann des vebiede däät an selle Daa nix nüzze.

Sogar doin Chef gebt dir uff äämol's forsch die Hand, sieht der doch doin blankgebutzde Orde "Hosseband"

Gelacht, geschungelt un gedanzd werd bisses Zeit werd fer e Dusch, weil beim danze un beim kisse du gud riche musch.

So geht des dorch die ganze Daa - mit Schbass un Krämpfe,

dusch wacker dorch, bis Aschermittwoch kämpfe.

Mit ääm Schlagg is alles donn vebei, die Schungel, gröhl- un kisserei un fers erschde wars des mit "juchei"

Jetz kummt vum Johr die eher drugge Hälfte, kannsch nor Ääns,

dich fräje uff de nexschde 11.11.

Alla dann, bis nexschdesmol.......

 

 

 

 

De gude Mann fiehrt e reschelmäsich Lewe

De gude Mann lebd in de Reschel mäsisch

 

So werd was aussem – un wonner nix werd, werrer hald Werd....**gg**

 

Kaum uff de bugg'lich Weld, musser redde, sitze, laafe lerne, der klää Krutze

Aus soine Winnele grad eraus, in de Kinnergaade ninn geschdeggd

Soin Hinnern konner jez allä abbuzze.

 

Dorch die Schul sich grad so dorchgeaijerd, um die Zeid iss ned werklich schad.

Kaum dort eraus, soller zeiche wasser kann - schunn werd gedienerd, in Olivekluft zum Dienschd am Schdaad

Jez isser ferddisch - en rischd'sche Mann, so wie e Fraa ne gerne hat.

  

Dann serick in soi privades, fangt die Sach erschd rischdisch o, die Soije sinn noch klää.

Awed suche, Trottwar kehre, Audo buzze, nore ned üwwernemme, det nix nuze.

Brav Mill, Wasser, Lichd un Schdeier zahle, ämol im Johr in Urlaub fahre – 

So e Lewe, ess des ned schää.....

 

Leichd horrers ned, e Fraa se finne, wu lieb un ehrlich ess - middem aa e Heisje baut

Dodebei noch e Familie grünne weil, schliesslich isser dann jo aa getraut

Endlich schdeht man(n) midde drin im Lewe, guggt uff Audo, Fraa un soi Dehääm

De Kinner ab un zu e Penning schdegge, un dodebei noch schbare geh'n.

Ach was horrers doch so schää

 

Omends guggder Daachesschau – Rabbatz konner dobei ned veknuse

Mondaachs isser frieh dehääm, dud mid de Fraa e bisje schmuse

Dienschdaachs gehder Kaade, jeden Middwoch  do is Schbord

Donnerschdags gugg'der e Sääfeober un am Freidach kummd en Mord

Samschdaachs geht’s e Woische tringe, Sunndaachs en die Kerch, donn helfder amol koche

Numiddachs mit de Brut enaus, nuff uff de Dunnersbersch.

So gehds mid de genaalde, im Trab dorch all die Woche

 

E Lewe wie in Saus un Braus – Daachin...Daachaus

Saach, is des ned schää……

Orrer fehld do doch noch e bissi was......was määnschen Du ???

 

 

 

Bu denk dro.....Mad, du aa..... 

Die Mundartschprosch im Hämatland

Wu uns die Alde iwerliefert hannd

Häärt sich soooo schä o beim singe

Konn beim redde grob aach klinge

Beim Schtreide werds erschd g'scheerd

Iwwerhaubd wann's schdreng genumme werd

Dann widder schmeischeld se sich oi

So zard, so lieb, so foi

Mundartschprosch, häämelich, vetraut se lese

Nie solld mer, wu mer hää is, je vegesse.

määnt die paelzermad ....

Woihnachtsschbeck schun seit im Summer

Der macht mer seidem nix wie Kummer.....

 

Der hoggt feschd uff de Schengel un aach uffem Bauch.

Ich äjjer mich jo tierisch driwwer un denk, was ich so brauch

des iss des Killo Woihnachtsschbeck, des meest halt ääfach weg!

 

Hoschd Rechd gehärt, 's iss seid Auhuschd

un longsam wird mer schun bewuschd

Es näxschde Chrischdfeschd kummt beschdimmd

Un domit aach leggre Sache, wu mer gern vun nimmd

Gans, Gutselscher un Mazzipan,

aach Zimtschdern lachen mich schunn jetzerd an.

 

Was mach ich bloss mim alde Schbeck

Der is seid Monade so keck,

dass der allem trickse widderschdehd

un ääfach nimmie runner geht.

 

Hännd Ähr en Tipp "Schbeckwegimnu"

O wie gern häärt ich eich zu.

Am Beschde wär e Zauberword

**Här Schbeck mach dich vum Agger, schaff dich ford.**

 

Kumm mer awwer kääner, ich soll hungere,

es wär es Beschd

Nää, nää, sowas hall ich eh ned dorch,

des gäb mir aach de Reschd.

Ich lieb doch's Lewe, genüsslich, wääch un fraulich

bloss die Folsche wu des geniesse hod, die sinn raulich

 

Jetz hann ich geläs, dass mer Scbeck wegschmuse kann

Des wer ich glei mol ausprowiere dann

 

Die Formel wär "Ää Kuss gääche ää Gramm Schbeck"

Wonn ich jetzerd so rechne du, dann wär bis Woihnachde der alde weg.

 

Alla werd ab heid nor noch gekissd,

weil des gud geeche Endebrode und aach Gutsjer issd

Un weil des kisse so gons newebei noch Schbass mache dud

un's Gemiet rumwiehle

die neie Kalloriebombe, umwonnele dut in lauder Gliggsgefiehle

desdewäche muss e neggisch Zuggerschnut jetz bei

Glaabs nor, ab jetz un bis die Gutsjer all gefuddert sinn, gebt des e Wohnsinnskisserei.......

Schaaaaaaaaaaaaaaamatz **gg**

 

Ähr liewe Leit , werrn hunnert,

lewen lang und känner sterb’,

und wann’s aach noch so stärmt und dunnert,

 

newwelich ess un merb

 

 E gequelldi Grumbeer mit Blutworschd

un Andiftschesalad

 

                                                                                                

Die Paelzermad hot feschdgeschdellt, dass die Lieb' viel länger hält

Wann Er un Sie sich täglich drum bemiehn

un am selwe Zibbel ziehn.......

 

 

   

 

 

Änns musche schdehds der märge,

wann du schwach bischd; Äbbel schdärge!

Äbbel sin die beschde Schpeise

fer Dehääm un fer uff Reise,

fer die Alde, fer die Kinder,

fer de Summer, fer de Winder,

fer am Owend un am Moije,

du deer schdehts fer Äbbel soije.

 

Äbbel glätten der doi Schdärn,

bringen Phosphor in doi Härn.

Äbbel gewwen Kraft un Mut

Un erneiern aach doi Blut,

helfen mit gesund se bleiwe,

bisch doch mol krank,dann du se reiwe.

 

Drum Freind, kumm - loss der rode,

ess Äbbel frisch, gekocht, gebrode.

Alle Daag so fünf bis zeh.

Wersch defunn net dick, wärsch jung un schee

Un kriesch Nerve wie en Schdrick.

 

Dassdes wääsch – im Abbel leit doi Glick! 

 

 

 

 

Heit gebts frisch Gemies - muss jo leider so langsam alles weg aussem Gaade. Zuminneschd muss mer schneller soi wie die Schnegge 

Iwwerhaupt, sowas hann ich noch net gesieh.
Denne Schnegge kammer schun Nome gewwe, die kummen alle Daag om selwe Platz werrer fresse.
Ich hann, nor mol so aus Schbass Ännerer mit griener Fäb en Schtrich uff de Buggel gemolt - wärsches net glaawe, awwer am näxschde Daag war die wirrer am selwe Salatkopp am mampfe.

Ich hunn se jetztert Bruno gedaaft  :-) un losse fresse, vunn mär aus alles ratzekahl. So e aami Schnegg soll jo aach net lewe wie en aame Hund,newohr. 

Fer Moije koch ich aach noch Broggelbohnesupp, weil die erschd rischdisch schmecke dut, wonnse uffgewärmt werd und dodezu gebts dann Abbelpannekuche.

Jo, jo - fers Fudder soit meischdens jo die Mudder

Am gligglischde soll die jo ogeblich sinn, bei äm vunn ähre drei K's
Kinner - Kärch orrer in de Kich......

ob des in de heidisch Zeit noch so schdimme dut, ich glabs jo net. 

nix desdo trotz, gugg ich jetzterd awwer mol in ää K eninn, nämlich in moi Kich (dass do wenigschdens aa e Schnegg drin is) 

Alla donn, hallen eich frisch un dass mär kää Klache kummen,gelle......

 

 

Is jo mol werrer *Dunnerschdaag*

Heit Moije steht der Dunnerkeils doch drauss un wollt erinn -
hot on die Däer gedunnerd dass mär määne het känne, es dunnerd ....
un des nore, weiler soooo aarisch schnell uff de Dunnerbalge hot misse
Dunnerschlagg, hunn ich mich do verschrocke -

"ei gewirrerdunnerkeil, du Muschgedunner, du dunnerkeilser",

konnsch du net klingle wie alle Annern aach, hunn ich dann losgedunnerd.

"Dunnernochenoi" plärrd der do, "loss mich bloss gons schnell vorbei"

Un so war der Dunnerschdaagmoije e äänzich "dunnerei"

Dunnerlittche määnt e