Geschichde vunn Dehääm

"Wie is'n de erschde Salzweck uff Ameriga kumme?" 

mecht de Heiner gern wisse. 

Die Leit guggen sisch all ganz dabbich o. 

"A forzdrugge naderlich." 

 

                

De liewe Gott war seid 6 Daach nemmi gesieh wor.

Am 7. Daach hoddene de Petrus gfunne un frocht: Wo warsche dann die ganz ledschd Woch?

 

Gott zeicht no unne dorch die Wolge un saat schdolz "guggemol, was ich gemacht hann"

Petrus guggt un froot: "Was issen des"

 

" Des issen Planet un ich hann Lewe druffgesetzt. Ich wers Erd nenne un es werd e foi Plätzje un e Schdell mit uhoimlichem Gleichgewichd sinn, saat de Gott.

Gleichgewicht? froot Petrus.

 

Gott erklärt un zeicht debei uff unnerschiedliche Schdelle vunn dere Erd.

Zum Beischbiel Nordameriga – des werd reich un Siedameriga aarisch aam soi.

Do hunn ich en Kondinent mit weiße Leit un dort mit schwarze.

Monche Länner werrn aarisch aam un drugge sinn, annere sinn dick mit Eis üwwerzooche.

 

De Petrus war vunn dere Ärwet aarisch beindruckt.

Er guggt genauer hie un määnt "Was issen des do"

 

Des, des iss die Palz !!!, säät do de Gott – die schännscht un beschd Schdell uff dere gans Erd.

Dort hots bloss nedde Leit, wunnerprächdische Wälder, Seen un idyllische Berchlandschafde. Es gebt urgemietliche Woischduwwe, legger gekochdes...mer kann garned soviel uff ämol esse un prowiere un oft denkt mer so fer sich-

 

"Wann doch moin Buggel (Rücken) bloss noch Maa (Magen) wär"

 

Des gebt de Middelpunkt fer Gesellischkeit, un do kummt die *Weltachs* anne...

Die Mensche wu do in de Palz lewen sinn schänner, intelligender, viel geschickder, fleissischer un hänn de märscht Humor.

 

Petrus zieht soi Kapp for dere Leischdung,

haakt awwer nochemol nooch un froot

"Awwer moi Herr, hoschd du ned vumme Gleichgewicht geredd, des wu iwwerall soi soll"???

Mach der dodrum mol kää Sorje, grinst do de Gott.....

"In de Näh isses Saarland" ****    

 

 

Ich hann emol e Bopp gehatt, jessas, war die schäe.

Giesela hot se g'hees, e lieb Gesicht und schtramme Bäe.

Im Scheesje han ich die gedrickt, die Frankestross bis ganz enuff.

Dort owwe hot se rausgederft. Am Waldrand bei de Ami hot de Hund gekläfft.

Märscht hot die Mamme was ins Scheesje neigesteckelt, des han ich do drowwe dann erausgewerkelt.

Mer han gespeelt,- uff rer Deck han mir gesesse, getrunke un ach was gegesse.

Ich han se gekämmt und Zepp geflecht un was hann ich uffbebasst dass die er Kläed nit dreckisch macht.

Manchmol, wann ich Heit dort owwe steh, denk ich an moi Giesela, was war moi Kindheit doch so schee.

Hach ja......

© Paelzermad 2006

               

So wars.....  Die Events der WM haddden ogefang un drum  

liefen ach die Uhre  annerschdrum  

Bei uns in Lautre gabs kää halde  Die Stadt stand Kopp, die Junge, wie die Alde.  

G'feiert hämmer bis die Vechel peife
do half kää Feierwehr, kää Streife
mir doobten, dass die ganz Palz bebt   
des hot noch nät mol, Köln an Fassenacht erlebt.
Moins ging´s dann häm, kennt ihr des raffe
dann sinn mir frisch geduscht zum schaffe.
Und Owends, es war zwar echd als Mord
do sinn mir halt, schun werrer fort.
So sinn mir halt, in Lautre – Proschd -  un's Herrgeddel  erhalt´s.  

De Fussball un die goldisch Palz

  

© Paelzermad 2006

Bei uns in de Pfalz gebts aach so e 54 % dicher Kreiderschnaps

Der heest "KRAWWELDIEWANDNUFF"

So was ähnliches wie

Schwarzwälder Kerschwasser mit oigebauder Zigga. beliebt, scherf und orischinell:

Mer nenntne aach
Zehennägelkringelnsich
Haarundfingernägelausfaller

Jedenfalls schmeckt der faschd wie

"Strichbimbulibockforzelorum"!

Weesche jetzt was fer en Schnaps ich mään ??

© Paelzermad 2006

De Horschd, de Bruno,  "Ich" un de Peder

Pälzer Bu

Ich bin en echte Pälzer Bu, (Mäde) De (die) stärkscht vun unsre Gass,

hei, wer die Pälzer Buwe (Mädels) kennt, des is e edli Rass'

kä Schlippche un kä Krage, nä, des is uns viel zu dumm,

mer fliechen jo de ganze Daach im Chauseegrawe rum.

Refrain

Horch do mol hie, des klingt ganz pälzerisch, hollahiaho!

Voller Witz un voller Schneid, so babbeln do die Leit.

Vor so 're Ausdrucksweis hot jedermann Reschpekt.

Des is un bleibt de unverfälschter Pälzer Dialekt.

Un wann zwää Pälzer Hännel hen, des is e wohri Frääd,

en Fremder, wu voriwwergeht, vergeßt's sei Lebdag net.

Die Werter, wu do fliechen riwwer un niwwer iwwer de Disch,

die stehn noch in käm Lexikon, die sin jo noch ganz frisch,

Refrain

Horch do mol hie, des klingt ganz pälzerisch, hollahiaho!

Voller Witz un voller Schneid, so babbeln do die Leit.

Vor so 're Ausdrucksweis hot jedermann Reschpekt.

Des is un bleibt de unverfälschter Pälzer Dialekt.

Zwää Buwe spielen Klickerles un kriehn miteinanner Krach:
He Bankert, geb mei Klicker her, sunscht schlag ich der uff's Dach.
Geh häm du mit deim Krusselkopp un wäsch der mol dei Lais.
Wann ich der uff de Zünder klopp, dann drehscht du dich im Kreis.

Refrain

Horch do mol hie ...

Ei Du Bangert, ei, Du scheeler, ei, Du Rindvieh, Du Kamel,

ei, was bischde dann fer äner, ei, was gugschte dann so scheel?

Du hoscht jo in dem Lewe noch kä Kannelwasser g'soff,

wann ich dich am Schlawitsche nemm, dann saufschte's awwer doch!

Refrain

Horch do mol hie ...

 

Bekanndes Pfälzer Lied, den Dichter kenn ich (leider!) ned.

Ich saa Eich nore äens.....

Wann eiern Bangert, unsern Bangert nommol Bangert schennt,

schennt unser Bangert eiern Bangert solang Bangert,

bis eiern Bangert unsern Bangert nemmie Bangert schennt.

So dass n'ers wissen.....