Geschichde vunn Dehääm

An äne deng ich mit Sicherheit ned, odder doch - irschendwie schunn.....

Friehjer hat ich en klääne Daggel.
Waldi hodder gehääs.
Ich wääs noch genau wie ich denne krieht hann. Schwer hann ich defor schufde gemisst.
Bei's Spächeles (so hunn die gehääs) musst ich wie long die Kohle aussem Keller schlebbe un die Kich butze.
De ald Schpächele war de Oba vunn moim Schulfreind Joachim. Die waren Frieher in Minche gewohnt un sin dann doher bei uns gezo.
Newer dem alde Baurehaus vumm Spächele hunn die sich en Bungalow hiegebaut.
Der Joachim is jo dann bei uns in die Schulklass kumm un weil mir jo aussem selwe Dorf waren, hod der mich Nomiddags mitgenumm zum speele in ähre Scheier.

Die hadden immer klääne Katze in de Scheier renne un aach klääne Hundcher.
Dortmols hunn ich jo noch ned gewisst, dass der ald Spächele die immer vekaaft.
Mir Kinner hadden vor dem Alde schunn immer en Heidereschbekt, weil der immer wiescht war.
Kinner kunnt der grad so wennisch leide wie die Dierscher.
Der hod nore sich selwer gekennt un nore Geld gesieh.

Der Joachim hat aach angscht vor soim Großvadder un mir hann uns immer veschdeggelt, wammer ne kumme gemergt hunn.
Manchmol hodder sich aach ogeschlisch un uns an de Ohre geress, wanner uns vewischt hot.
Gemacht hunn mir nix schlimmes, bloss mit denne Dierscher gespeelt, ne Wasser hiegeschdelld un Fudder zesamme gesuchd.

Amme schääne Daach (Der Joachim un ich hadden uns mo wirrer veschdeggelt.) hunn ich gesieh, dass der no denne Hundscher trede dut, un aa mid soim Schdegge gehjese schlaat. Du hunn ferschderlich gejault.
Wie der wischt Mann fort war, hunn mir die Hundscher in de Arm genumm un gestreichelt un gegreint, so lääd hunn die uns gedu.
Ää Daggelche war debei, denne hodder besunnerschd getriezt, weil der net so schää war, wie die Annern. Der war e bisje lang gerot un hat aach schtaksische Bääncher. Der klää Ragger un ich, mir warn glei ä Herz un ä Seel.
Ich bin hääm un hunns moiner Momme gesaat.
"Momme, ich mach alles was de willsch, ich helf der bei alle Awede, wonn ich nor des Daggelsche kriehje kann".

Klänes, hot'se gesaat – guggemol, mär hunn grad frisch gebaut, e eischenes Heisje un e Dach üwwerm Kopp, des is doch wischdisch.
Mär hunn kää Geld fer so e Daggelsche. Was soll der donn üwwerhaupt koschde"
Ich hanns jo noch ned gewisst, hann mir e Herz genumm un bin bei den wiescht Mann hiegang.
"Herr Spächele, ich hätt sooooooooo gern den klääne Daggel, den wu'se jo eh ned vekaafe kennen"
Den willsche hunn, den wolld ich grad vesääfe, weil ich mit dem nix ofange kann".
Hach Gott....mär is faschd es Herz schdeh geblebb. Bidde, bidde, was sollern koschde, hunn ich gefroot.
Fünfezwansich Merk, dann kannschene mitnemme, awwer des will ich Heit noch wisse.

Ich bin häm gerennt, gebeddelt bei moiner Momme.
Nää, määnt se mit traurische Aue, des is viel Geld, des konnisch der ned gewwe.
Dodefunn missemer lewe, bis de Babbe es Schlechtwedder rum hot un werrer was vedient.
Nä moi Schätzje, so lääd wie mers dud, des geht ned.

 Ich hunn mich in die ald Audogarasch gehockt un iwwerleet.....un wann ich schaffe geh fer des Geld~~~~
Widder die Gass efor, mit Herzklobbe geklingeld.
Die Fraa Spächele war an de Deer un ich hunn’se gebiddelt un gebeddelt, dass'se mich ähre beim butze helfe losst, bis ich des Daggelche vedient hunn.
Sie hot ährn Mann dann rumkrieht, awwer zu was fer'me Preis.
Der hod gesaat, weil der klää Daggel jo dann so quasi ab Heid schunn moi wär, misst ich aa fer dem soi Fudder schaffe.

Glei nooch de Hausaufgawe bin ich alle Daa hiegang un dann hodder mich schaffe geloss bis umfalle.
Wo rennsch du dann alle Middag so eilisch hie, hot mich die Mamme mol gefroot. Ich geh speele mit de Mäd, hunn ich geflungerd.

De ald Spächele war en richdische Will-Ewwer. Der hot immer de Kohlekaschde uffgezo un eninnge....nä, des kommer nedemol do schreiwe.
Odder doch, es waa jo so – in de Kohlekaschde einngerozzd hod’dä – iiiiiigitt…..

Dem soi Fraa hot mer lääd gedu. Sellie hat nix schäänes.
O’geplärrt hodderse un ich glaab, handgreiflich is der aach worr. Die war so vehäärmt un duckmoserisch.
Därer selieb hunn ich die Sawwerei wegmache geholf, aach wanns mich als beinoh gehobb hodd.

Drei Woche is des so gang, do hod die Momme was gemerkt.
Saamol, frocht'se, was issen mit deer los, wie siehsch du dann aus, bisch du krank, orrer briehsch du was aus.
Erscht hunn ich nix gesaat, awwer sie hot gebohrt un gebohrt un dann hunn ich gegackst un ährer alles vezeeld.

Wie die gehäärt hot, was der wiescht Spächele mit meer macht is die aussem Haus gerast – hot mich mitgeschlebbt un bei denne vorre Schdurm geklingeld.
De Ald war selwer an de Deer.
"Sie zeich ich oo, uffem Gerischd, sie Kinnerschänner un Dierquäler, hot se gekrisch.
Was glaawen sie dann wer sie sinn, e Kind so aussenitze".
Der is frech gewääs wie Rotz. Hot gesaat, ich hätt des alles freiwillisch gemach, do kännt mer soi Fraa froo, die dät's beschdädische un hot die Deer zu gebaddschd.

Jetz hodd drowwe uffem Dorf änner gewohnt, der war beim Gericht. Zu dem is die Momme hie.
Ich will e Ozeich mache, hot se gesaat un dem Mann alles vezäält, aa dass der Spächele mär des Daggelsche veschbroch hätt, wonn ich defor schaffe du.

Der Mann hot gemäänt loss mich des mache, ich redd mid dem emol Tacheless. Sowas derf der ned mache.

Es enn vumm Lied war.....Mit dem Gerichtler durft ich hie un mär des Daggelsche hole, glei am selwe Daach noch, weil ich angschd had, dassern vesääfe dut.

Was mär des weh gedu hod, wie mer do hiekumm sinn un der Ald Schdinker gesaat hot, der Daggel wär fortgeloff. orrer so.
Jerenfalls wärer nimmie se sieh, in de ganz Scheijer ned. Mär kännden jo nochgugge geh.

Ich bin in die Scheier gerennd, hunn alles abgesucht...nix.... uff ämol häär ich e leises peife...
De Joachim hat sich wirrer veschdeggelt. Kumm, ich wääs wore den klää Daggel hiegedu hot.

Draus himmerm Hingelschadall hadderne in en Grumbeersack geschdeckt un owwe zugebunn.
Fers vesääfe haddem wahrschoins die Zeit nedmee gelangt. Gott sei Dank, war ich froh.
Ich hunn den Klää do erausgehol un dem Gerichtler den Sackk gezeijt.
Der hot was in soi Buch geschribb un ich duft mit dem klääne Kerlche Hääm geh.

Die Mamme hot gemäänt. Jetz hosche fer den klääne Ragger sooooo gekämpft, jetz bringe mer den aa noch satt.

So lang de Waldi gelebt hot – immer wann de ald Spächele am Deerche vebei gang is mit soim Schdegge, er hoddene furschbar veklefft un soi Zäh gefletscht.
Ich glaab, wann’ner naus gekännt hätt, der hädd denne Drecksack wiescht gebiss.
De Waldi un ich warn unzertrennlich bis er mit ferzeh Johr die Daggellähmung krieht hot un geschdorwe iss.

Denne ald Spächele hunn ich gehasst solang wierer gelebt hot un e safdisch Schdrof hadder jo aach krieht, des hodd ich vumm Joachim gewisst.
Es hässt jo immer dass kään Mensch wiescht gebor werd –
Bei dem kann des awwer ned geschdimmt hann, der war schunn wiescht gebor un war soiner Lebdaach wiescht geblibb……..

 

 

 

 

 

Jo Sundaa is Heid, die Uhre hann'se widder serickgeschdelld so dass ich Heid Moije e bisje ins Drudele kumm bin.

Was for'n Schdress.....Die Zeit hod kaum gelangd fer moi Rätsel se mache, do muschd aach schunn Friehschdick gemach werre, weil - um zwelfe is jo in gons Deitschland schunn werrer Middaa :-)

Un Heid is aa noch Palmsunndaa. "Isses am Palmsunndaa klar un roi, kann des e gud Zeiche fer de Summer soi"

Jo, wammer Heid Moije enausguggt, dann isss jo alles gesaat

 

Geschder hann ich Blimmelscher kaafd, fer die Schärwel uffem Friedhof nei se sezze.

Koine Schongs - es hodd so geschitt, dass die glatt vesoff wären.

Im Gade wa's Fränzje, de klää Molltruff aa in ar'scher Not, weils soi Molltruffshaufe weggewäsch hodd un soi Gäng, wurer grad gegrab  g'hadd hadd, die hodds dorchgeschbield.

Hoffentlich is des aam Kerlche ned abgesoff mid Monn un Maus.

Ich frää mich immer wanner beim Nochber driwwe fleissich graawe dud, des gebd so schääne Muschder in dem soi Wiss

 

Üwwerhaupt 's Fränzje.... schää dasser widder do iss no dem elend lange Winder.

Die Azzle schbaziern aa drauss rum, als obse ganed fort waren un die Amschdle sin frech wie Rotz. Die hubbsen uff de Balgon un klaun die Krimmele vum Abbelkuche.

Geschder hunn ich'se debei beowachd un de Kuche in Sicherheit gebrung.

Dä Abbelkuche schmeggd awwer beschdimmd b'sunnerschd gud weil -

moi Babbe, wann dä omends vun de Awet Hääm kumm iss, hodd immer g'saat "Willsche e Schdigg vunn moim Brot hunn, des is was gons b'sunneres, weil do die Vechelscher drüwwergepiff hänn" - Mir zwää Pänns hunn uns drum geriss

Ach, ich kumm schunn widder vum hunnerdschde ins Dausendschde.....Wammer so beim vezeele iss, falld äm vun Sellemols bis Subbehawwe alles inn

Palmsundaa un bloss siwwe Grad.

An moim Palmsundaa Sellemols, waas aa so kalt.

Ich hadd e foi schwazzes Kreppkläädsche middeme weiße Kräägelsche o - un seidische Schdrumbhosse.

Moi Omma Lena - ich här'se noch wie Dortmols - deed jezz saa - zieh gescheide Unerhosse drunner, fer so neimorische Fluddschelscher esses veel so kalt  - un Recht hadd'se.

Die Kerchebänk waan aaaschkalt un mir waan froh, wiemer uffschdeihje gekännd hunn.

 

Alla dann - en schääne Pamlsundaa.....

~~Die paelzersch~~

 

 

Sunndaach is

 

Un ich laafch do nixahnend anne, frää mich uffen schääne Schbaziergang im Pälzer Wald – wupp machds  - un baufdisch, hock ich uffem Bobbes.

 

Kummd do Ääner hinnischmer geloff un froot bleed „sinn’se uff e Schdiggelche gladdes kumm“

Ich häddem middem naggische Bobbes ins Gesicht schbringe känne, wann der ned grade saumäässisch weh gedu hätt.

Glei druff schdreggder mer die Hand anne un seed „ach Gott Fraa, hunnse sich hoffentlich nix gedu“

Alla do wars widder gut un ich hunn mir denne Kneecht emol e bisje genauer betracht.

Gegrinst hodder jo, wierer mer dann uffgeholfe hot, awwer e neddes Grinse hadder druff.

 

‚s is net gut, mudderseeleallääns dorch de Wald se dabbe, wanns so mords gefrore iss. Ich geh  mit, ich glaab mir hunn die selb Richdung.

Ich wolld uff de Bremerhof, saa ich – ei ich aa, seed’er.

Alla gut….

Beim losmaschiere hunn ich uff de erschde Meder, aarisch’s Aua am Schdeiss gemerkt.

Geht’s, froot er - un middeme süffisande Grinse määnt’er „ e bisje massiere deet jezz helfe“ – „Nä, nä ‚s geht schunn….

Ich war Geschder erschd  beim Dokder, weil mir moi linges Bää so weh gedu hot.

Des isses Alder, sääd mer doch do glatt der Quacksalwer.

Awwer ich, ned faul, , hunnsem dann vekliggerd.

„Nääää, Herr Dokder - des kann schummol gar ned soi,.

Guggenso mol, moi rechdes Bää hod gar nix, bumberlxsund issses - un des is genauso ald wie’s Onner“ Der hodder velleicht bleed aus de Wäsch geguggd, der Sell, vezeel ich moin Mitmaschierer.

 

Erschd guggder mich o, wie en Ochs wanns blitzt, dann blätscht er sich die Hänn uff die Schengel un lacht wasses Zwerchfell härgebd.

Awweil wär ich jo Beinah druff eninngefall, awwer bloss Beinah, lachd er….

Alla ‚s Eis war gebroch. Mir sinn uff de Bremerhof geloffe, hunn dort schää minanner Kaffee getrunk, veel gelacht un Schbass gehadd.

Wie mer Häämzu sinn, hunn mir uns glei de nexschde Sunndaach ausgemach.

 

Heid is widder Sunndaach –Jo -  un glei geht’s ab enaus in de Wald.

Awwer Owwacht muss ich gewwe,

dass ich ned uff „e Schdiggelche gladdes kumm“ am Borrem orrer so – gelle *gg*

alla dann .....

__________________$$$$$
_______________$$$$$__$$________$$$$$$$$
__________$$$$__$$$$___$$_____$$$$$____$$
______$$$___$$$$________$$_$$$______$$$
___$$$_$$$$______________$$_______$$$
$$$_$$$$________________$$______$$$
$$$$_________________$$$_____$$$
$$________________$$$_____$$$
$$_____________$$$_____$$$
_$$________$$$$____$$$$
__$$____$$$_____$$$$
___$$_$$$$___$$$$
____$$_____$$$$
__$$_____$$$$
$$____$$$$
$$_$$$$
$$$$$_____$$$$$___________$$$$$__________
_________$$$$$$$_________$$$$$$$_________
_________$$$$$$$_________$$$$$$$_________
__________$$$$$___________$$$$$__________
__$$$$_____________________________$$$$__
_$$$$$$___________________________$$$$$$_
__$$$$$$_________________________$$$$$$__
___$$$$$$_______________________$$$$$$___
____$$$$$$$___________________$$$$$$$____
______$$$$$$$_______________$$$$$$$______
_________$$$$$$___________$$$$$$_________
____________$$$$$$$$$$$$$$$$$____________
______________$$$$$$$$$$$$_______________

 

eier paelzermad :-)

 

 

 

Sundaach, korz vor zehne  - Zeit fer in die Kerch.

's Kaddel grießd "Gemoin Herr Parre",
nickt no Rechts un Links un hockt sich glei in de erschd Bamk vorre anne

De Parre preddischd vun Sell un Jenem, vun Sodom un dem Annere aach  -
Ausem Xangbuch werren Lieder xsung –
un aach noch im Paule Ruddolf soi Dechdersche gedaafd.

Dann is die Kerch aus - un nore die wu noch beichde gehen, die bleiwen hogge.
's Kaddel hoggd aach.

's hoggd un hoggd noch immer wie längschd de Ledschde außem Beichdschduhl widder erauskumm is.

Do siehd's de Parre hogge un froot
"Ei Kaddel, du hoggsch jo immer noch do, willsche aach beichde odder hosche Kummer"

Nää saat's Kaddel, "ich waad nore bis Sie de Klingelbeidel ausleeren.

"Waaaaaaaaaaaas", guggd de Parre gons entgeischderd,
"wie kääm ischen dezu vor doine Aue de Klingelbeidel ausseleere – was gehden dich des o, wie veel Geld do sesammekumm is"

"Ach Herr Parre, ei nää - des will ich jo garned wisse, des dud mich jo gaaaaaarned inderessiere"
awwer moi Kall, dä hod an soine beschde Schaffhosse de Knobb velor-
un ich wolld hald mol gugge,
ob do in dem Klingelbeidel velleichd ebbes bassendes debei wär"  :-)  ;-)  :-)

© paelzermad

 

 

 

Zeit die Kieh wiedder naus ze losse,

de Ochs - ab enaus uff die Wiss un middem Wasserschlauch abgeschbrizzd.

De Welschkornewwer an de Waldrand losse,

dort wu die Buchele un die Ääschelebääm schdehn.

De Fuudermais is all,

un unner denne Bääm finder immer noch genung Buchele un Äächele, mid un ohne Peifcher ;-) fer se fresse.

De Maldersack kammer richde, fer dann de Oschderhaas ze fange ;-)- schliesslich hodd der noch jed Meng Aawet.

Der muss e Schdeisje Aijer omole.

Moos hole un Hasselrude un Neschdcher baue fer die Kinner....

Wammer aus veseh e Elwetritsch vewischt, is aach ned schlimm, awwer 's iss dann hald kään Oschderhaas;-)

Iwwerhaupt Haas....

Moi Obba un moi Babbe, die hunn um diedo Zeit immer Falle vor die Lecher uff de Felder geschdellt.

Dodemit hunn die Labbè gefang un an Oschdre hodds immer Wildhasebroore gebb.

Ich hat do immer kää Hunger, hunn mich mit bunde Aijer un Schoggelad vollgeschdobbd,

dass ich bloss nix vunn dem aame klääne Haas do in de Pann, esse muschd :-X

Ach, Oschterhaas, Du guudes Dier!

Du bischt mär lieb un siess;

Doi Aijer schmeggen besser als

Des bescht gekocht Gemies!

Doi Ohre, die sinn grooss un lang,

Doi Schwanz iss korz gebabbd; -

Dieweil mir schloofen, kummscht du schdill

In unser Haus gedabbd.

Du bisch  kää brauner Schoggeladehaas

Mit Ohre lang un g’schpitzt;

Mit schdeife Bää un schdeifem Hals,

Wo in de Schaufenschdre sitzt.

Nää, nää! Du bischt kää Zucker-Haas,

Doi Aij kää  Zucker-G’schleck;

Net g’macht am Fliesband

Net halwer Farb un Dreck!

Du leesch doi Aijer in jed Neschd,

Un gackschd kää äänzich Word;

Duhscht alles in de schdille Nacht,

Not gehsche widder ford.

Mä heerd dich ned, mä siehd dich ned,

Doch bisch’d e guudes Dier;

Du hobbelsch leis de Gaadepad entlang,

Kumm ball - mir danken schää defier….

 

 

Jo. genau so hot des gehääs, wo ich Geschder Omend war.

Des war direggd en Genuss fer Gaume, Aue un es Ohr. 

Ogefang hod des Ganze middem Saladdeller. Der hat de Name "aus Feld, Wald un Wasser.Druff war Feldsalat, Orangescheibcher mid'rer Kersch in de Mitt- Wildlachssträäfe mit Preiselbeerdubbe druff un Paschdedescheibcher.

En subber Aueschmaus un aarisch legger.

So - un dann is losgang…..

 

 Acht Laieschauspeeler hunn die Familje Schmittbauer geschbeeld, die sich zum esse innerer Wertschafft trifft. Es Familjeowwerhaupt hat’s befohl.

En Mann un e Fraa hunn e bisje üwwer des vezeelt, was uns do so erwaade du dun hunn gesaat dasses Licht kabutt is un mir uns ned wunnern sollen, wanns ab un zu mol ääfach ausgeht..Nodem des Schdick vorgeschdellt war, is die Supp kumm.

E delikat Gemiesesüppsche, nore die Leffel warn e bisje klää

Dann isses weidergang.

 

 De Senior hodd voll Geld gehang un die ganz Blooss bis Dato unnschdizzd.

Zwää Dechder, die Ää hod gesoff, wie e Loch – die Anner had dauernd annere Männer am Reggelche hänge. Bei der Feier hadd’se schunn wirrer en Annere noch debei – nämlich en franzeesische Galan.

Der hod so uff fransosedeitsch „Arscheloch“ zu ääm vunn denne Vorgänger, vunn soim Liebsche, gesaat.

De ganze Saal hodd sich kabutt gelacht…..

 Debei war aach de Engel Tom, middeme jung Määdsche. Jeder hodd gemäänd, des wär Soim soinie.Vunn de Schwischersöhn war de ään gleichzeidisch de Vemöschevewalder, de Anner war Dokder – un dann war do noch en Veflossene, der war irschendwas am Bau.

Uff alle Fäll, hannse all vumm „Ald“ gelebd  un warn sosesaa abhängich vunn dem soim Gudwill.

Jo, un jezz  kummd der Sell, an demme Omend do oo un saat dasser widder heirade geht un zwar e blutjung Dingelche.

Die ganz Bloss is faschd in Omacht gefall, wierer dem Tom soi Mädsche, als zukinfdisch Fraa Schmittbauer vorgeschdellt hot.Oooor, do isses losgang….. De Senior war am Enn so fuchsdeiwelswild, dasser Jedem die Appanaasch gestrech - un die komplett Blooss enterbt hot.

Genau do isses Licht ausgang , es hot gekresch un gerumbelt un wies Licht wirrer o war, war de Alt dod.

E Messer midde im Herz harrer schdegge..

 

Die Weibse hun gegreind, die Männer hunn die Leich enausgetraa un rinkumm isses Kalbsgeschnezzelde in Morschelrahmsoss un Buweschbazze middeme Schbarschelpäggelsche owwedruff..

 

No dem Gang isses widder weirergang.

 

 Jo, wer wars jezz, wer kinnds gewess soi – des wurden mir als Zugugger dann gefroot.Zeddelscher sinn ausgedääld wor, wumer de Mörder druff okreize konnt. 

Ich hunn de Vemöschensvewalder ogekreizt un hat Recht.Leider warn noch elf Annere grad so schlau wie ich un’s hod misse ausgelost werre.

Des Krimibuch hod dann en Mann gewunn. 

Schaad, hunn ich noch gedengt, wie de Noochdisch uffgetraa worr is.‚s war schunn elf inzwische.

Was fern schääne Deller. Ahhhhh un Ohhh hodds dorch ge Saal geraund.

Es war aach ääfach bongforzionees.

Uff dem Deller war en Schoggeladeschbichel, newe droo Beerescheibscher un Kiwi un e halwie Quetsch, schää gefächerd.

Bällscher vunn Schoggelade-un Mandelmousse warn druff vedäält un im helle Klecks  hod die Mordwaff geschdogg. E Messer aus hell un dunkler Schoggelad. An de Kling war Preiselbeergelee veschmeert. 

Des war en gelungene Ufftritt, en runde Omend un ich zieh moi Kapp for some tolle Infall, wu der Wert do gehatt hatt.

Dreizeh mol hadder jezz schunn ausfekaafenes Haus, hodder uns noch vezeehld un sich aarisch gefrääd, dass mir soveel geklatschd hunn. 

Des vezeel ich jezz weider, nadieerlich ned um wasses geht un wer’s war….klor, newohr ….. 

Alla dann…..

eijer paelzermad

 

Geschderomend saat's Fried -  

Du Ernschd, was mache mern Moije.
Moije?, ei wieso dann Moije, was issen do besonneres.
Ei Moije es doch Froleichnam, en Feierdaag.

Ach jo, saad de Ernschd – des is jo der b'sonnere Daa ver alle Vechel.
Fer die Vechel ??, runzeld die Fried die Schdern.
Jo klor, des is de äänzischde Daa wo die Schbatze uff de Himmel schei..... kännen.  :-)
Infäll hosch du, wie e ald Haus......

Alla gut moi Maad, mer kännd Moije mol was grille, draus im Gaade. Gell do wollsche doch druff enaus, moi Herzebobbesje, sääd de Ernschd un grawweld's Fried am Griewehälsje.

Du hosch ich mo widder dorchschaut wie Fenschderglas, moi Gudschder –
Ich hunn aach zwää Rhabarwerkuche gaback, so wiedene gern hosch – mit Aijerguss un Änner midderer Baiserhaub.
Ach, bisch der doch die Beschd.... isser ned jezz schunn kald ???.....
Nää moi Knoddeljersch, deer bleibt schää de Schnawwel sauwer bis Moije. Nix gebds....

De Ernschd schdeggd soi Peif in die Gosch un knerweld vor sich anne.
"So e Geizkraa..... awwer waad nor, moi Schatzebambelsche.
Wannde Heid uff die Naachd in die Schlofkammer kummsch un, dich an moin Buggel drigge dusch un schmuuse willsch –
do saa ich dann aach " Nää Friedsche, Heid bleibt dä schää de Schnawwel sauwer. Nix gebds...."

Desdo will ich sieh, lachd's Frieda un denkt sich schunn was hexisches aus, wos genau wääs, mit wassene erum krieht.
Mä muss schliesslich nore wisse, wie mers Hunnsche fiehrt, dasses ned uffs Schdriggelsche sch...... ;-)
's Fried guggd in de Himmel un denkt sich – Desdo werd Moije en schääne Daa  - un jezz geh ich mo die Bedder uffdecke  :-)

Alla dann....
 :-)
 

 

Sunndaags Moijens um fünfe – es Lena dut grad die Frieda melge.
 
Es Maalche, die Greet, es Hanne un's Gerda hodd's schunn ferddisch.
De Bruno werd jo net gemolk *gg*, nää  - awwer ausgemischd werre, muss noch.

Des kännd jo aach de Hannes mache – Hannes??? Haaaaaannnnnnnnnnes? plärrd's Lena.
Der Sell schdelld sich bloss mo werrer daab, dasser in Ruh soi Sunndaagsmoijens-Peifche raache kann.
An därer suggeld der jo schdunnelang, wanns sinn muss  :-)
Der rolld sich jo Moijens aussem Bett, eninn in die Krachledderne un die Schulderhalfder drüwwer.
Es Hemm vekehrderum, ogezoo wie's Kaddel owwenuff. De Linge Sogge is bloo, de Rechde braun, awwer des is dem Schloofkopp piepegal. Hauptsach er kann jezz enaus- un sich so hääßgeliebdes Peifche oschdegge.
* Aaahhhh, wie guuuuuut * häärdene's Lena dann, ummerm Schloofschduwwefenschder uffschnaufe.

Soller doch, - mär esses jezz grad emol egal.
Do kanns im Schdall hald schdinge, dass'es ähm die Schdrimmb enunnerrolld – ich geh jetz die Hingel fiddere un die Aijer fer de Kuche un fer bei de Moijekaffee, sammele.

Dorch de Gaade, ehinner in de Hingelschdall, dreht sich's Lena korz erum un sieht grad noch de Hannes in de Kuhschdall schlabbe, nadeerlich mit de Peif in de Gosch.
Ha.... die brauch der awwer aach, bei dem *Parfeng * im Schdall  :-) Trallala.....

"Putt, putt, putt, moi Hiehnscher -  Putt, putt, putt, moi Hoh'
Ei, wo hunn er Liewe dann, all die Aijer hiegedoo'  :-) "

Mähschdens veschdeggelen'se die jo in de Scheier. Es machd richdisch Schbass, im uffgeschitt'ne Schdroh no de Neschder se suche.
Gag,gag,gag - schennt's alle Nos lang, wann's Lena wirrer Ääns gefunn hot un's Hingel uffgeschreckt defunfladderd.

Äänezwonsich Aijer hodd's jezz im Kerbsche ingesammeld. Des langt aach noch fer en schääne Randonkuche.
Veschdeggeld im Schdroh finnd's Lena awwer ned noire Aijer.
Ach gummol do, die Katz hot Junge gemach – ach näää, wie goldisch.

Do werd glei mol e bisje frisch gemolge Milch gehol. E bisje mid Wasser vedinnt, dasses die Kätzjer aach vetran.
Nää, wie schää die schlawwern, dene schmeggd's.
Die Ald kummd grad die Scheierdeer erinn, driggd sich beim Lena um die Bään un schmäächeld sich mit leisem Miau beim in.
Kumm hää Muggi, do is aach e Schisselche Millich fer dich.

Jessas, jezz musses sich awwer schbude.....
Glei kummd de Hannes un will soin Kaffee, - de Hefedääg muss ogesetzt werre, es Gemies gebuzzd, die Grumbeer geschääld, es Flääsch in de Hawwe - un nothin noch die Schdubb gewachst, weil die buggelisch Vewannschaft kummd.
's iss jo Sunndaag....

Alla dann.......

 

'raus aus'em Plümmo un ninn in die Pusche......

Die Glogge leiden schunn - 's werd hegschde Eisebahn.
Ich sieh's kumme, dasses mol widder nemmie fers Kaffeetringe langd, weil, derweil de Parre schunn's bede ofangd.

Ei Gewizzeldunnerkeil, wo sinnen jezz werrer moi Schlabbe - Gasdon, hosch du die widder in doi Hundehidd veschlebbd. Saukeeder schbinnischer.

De Borrem in de Kich is aaschkalt.
Bisses Weschwasser kochd, schlubb ich in die Schdiwwele, do driwwe in de Besemkammer.
Die hadd ich zwar schunn ewisch nimmie o, awwer egal,
hää demit.....

Fiiep...- Schreck.... - kreisch.... do hot e Maus eningebaut.
Ach du moi liwwer, des fangd jo gut o.

Im Franz soi Laatsche schdehn do im Eck, mo voooorsichdisch eninngelinsd.
Nä, muffelen e bisje, awwer schunschd - sauwer.

An die Fies geschlubbd un enaus in die Hundehidd, moi Schlabbe hole.

Der Ää is e bisje kabudd.
Dem hod de Gasdon e Loch vorre in die Zeh gekaut.
So en dolle Hund......
Ok, der hädd Geschder soin Knoche krieje misse, des wääs der Sell ganz genau.
Ich hunns mo widder vegess un der hod sich dodefor an moine Schlabbe giedlich gedu.
Drin in de Kisch jomerd die Wasserhex vor sich hie.

Es Wasser ins Wäschlafäng gekibbd un's Naachdhemm aus - Gesichd gewäsch, die Zorrle gebännischd, Zäh gebuzzd -
fer Mää hann ich jezz kää Luschd.
Wo sinnen jezz moi Klamodde, die hadd ich doch Geschder do an de Hooge gehung.
Ah....do.... eninngeschlubbd - die Schdrimb hunn e Laafmasch, machd nix, dreh ich'se erum  ;-)
Es Klaad es lang genung un in de Kerch muss ich mich jo ned bigge.
De Kamm -  Hergoddnochemol wu issen der jezz werrer....
In demdo Sauschdall, finnsche Heid mo werrer nix.
En Blick uff die Uhr - zeh vebei.....
Schbinnebää un Hexezauwer, desdo machen die extra - Sunndags Moins die Uhr schneller laafe losse....
Nadeerlich, in de Kerch hoggd schunn Alles, de Parre bet grad soi Liddenei erunner.
Ich drick mich beis Gerdsche in die Dritt Bank - Ma'mo Platz, do bass ich noch debei.
De Parre guggd mich vorwerfsvoll o....

Was willer dann - soll froh sinn, dass ichs iwewerhaubd geschafft hunn, noch se kumme.
Der määsd mo dorchmache, was ich hinner mir hunn 
Sunndaachsmoins :-)  ;-)  :-)

 

 

 

Sunndaach war's, grad wie Heit....

Ich war väzeh un mir muschden jo Sunndaags in die Kerch, so korz vor de Kumfemation erschd Recht.

Die Kerch war drunne in de Schadt, drei Killomeder de Berch enunner.

Uffem Häämweg, die Amtsgass enuff, bin ich beim Andre vebeikumm, e'mme klääne Klääderlade.

In de Auslaach schdand e Bopp, die hat e Kläädsche o, ach Gott wie wunnerhübsch - direkt zum veliewe. Ich hunns gesieh -un glei hot moi Herzbännel dro gehung.

Es war e leichdes Schdöffche mid bunde Blimmelcher, mit Rüschjer un Bännelscher fer hinne se binne. Unnerum hats e weisses Schbizzebördche. Ich kunnd mer direkt die geheegelde Knieschdrimb midd'em Mausezähncherand un moi weisse Schbangeschuh drunner vorschdelle.

Was deed de Axel Aue mache, (In den war ich Dortmols knall veschoß J)

 wann ich mich in dem Kläädsche dreh.

 

Ab do, bin ich alle Sunndaach  gugge gang, obse des Kläädsche noch im Fenschder hunn.

Solangs do war, bin ich vor dem Schaufenschder geschdann un hunns bewunnerd un war aach e bisje traurisch, weil ich kää Geld hadd, fer mer sowas schäänes se kaafe.

 

Die Momme brauchd ich gar ned erschd se frooche. Mir hadden Dortmols grad gebaut un's Geld war ganz genau ingedääld.

Wannde jezzerd ball e Lehrschdell hosch un was vediensch, hodd die Momme gesaad – dann veschbrech ich der, dass'de des Geld behalle derfch. Awwer, du musch aach mir veschbreche, dodefunn dann alle Monad was ze schbare.

Jo, awwer bis do Anne is noch e Schdick weit un ob des Kläädsche dann noch do is, ich glaabs jo ned. Widder mol traurisch bin ich Hääm.

 

Middags nom Gescherr schbiele, bin ich mit moim klääne Daggel Waldi ab, die Lochwiss hinne nunner, in de Wald.

Dort eninn ins Schlangepäädsche. Der Ingang war dorch Geschdrüpp gut veschdeggeld un gar net leichd se finne.

Aischendlich hunn des Päädche, nore die Oiheimische gekännt.

Manchmol war dort e Liewespäärche beim knuddele.

Als Kinner hunn mir die gern belauschd J

Es war e veheirad Fraa aus unserm Ort un der Mann war e Geschäftsmann aus de Schdadt.

Die warn als so veliebd, die hunn die Welt drumerum gar nimme wohr genumm. Mer hod geschbierd, dass Jedem soin Herzbännel am Anner hängd.

Ob die widder do sinn, denk ich grad, wie moi Blick uff  de Weg fallt.

Do leid e Briefdasch, so e bisje veschdeggeld, newe unnerm Moos.

Ich heb se uff un gugg eninn. Zwee Hunnerder warn im hinnerschde Gefach - un wem'se geheerd, des kunnd ich uffem Ausweis lese. Es war der Mann aus de Schdadt.

 

Ach du moi Liwwer, denk ich – was mach'ichen jezzd.

Ich hunn korz nogedengd, de Waldi genumm un bin Hääm.

Momme, gugge Mol, was ich gefunn hunn, do unne im Schlangepäädche.

Ach Gott, sääd'se des geheerd jo dem Fuhrunnernemmer vun de Schdadt. Der is Jächtler un hot's sicher uff soim Reviergang velor.

Kumm, nemm doi Rad, fahr enunner un bring'sem. Jo, des mach ich.....

Hmmm...hunn ich üwwerleet, wann jezz awwer dem soi Fraa die Dier uffmachd, was soll ichen dann saa.........

Drunne okumm, schell ich – Er schdehd in de Dier.

"Tach, ich hann do Ährne Briefdach gefunn" Er zieht die Dier schnell hinner sich zu un saat.

Wo warse dann, ich hunnse schunn gesucht.

Ich war mimm Waldi unnerweegs un do hoddse Eijenswu im Wald gelee, saa ich.

Er guggd mär e Aacheblick feschd in die Aue, ich hall Schdand un in dem Moment gehd die Dier hinner uns uff.

Soi Fraa froot, "was issen los"

Här Ida guggemol, des Klää hot uff de Hääder Schossee moi Briefdach gefunn, die muss ich velor hunn, wie ich do middem Guschdav e Schwätzje gehall hunn.

Denk der mol Onne, was e ehrlich Mädche – gebbem nore was devor, säät soi Fraa.

Er hold de Geldbeidel eraus un gebd mer fuffzisch Mark, e Vemöösche fer mich Sellesmol.

Da moi Maad, un Dange nochemol defor, zwingert er mär zu.

Ich kunnd vor lauder Frääd nix mä saa, hunn moi Rad die drei Killomeder enuff uff die Hääd gedriggd - un nor gedengt.

Moi Kläädsche..... Ich krie moi Kläädsche ........Juchuuuuuuu J

  

 

Häär, des muss ich eich jo vezeehle.

Es Paelzermad hot e "Bärwel"

 

Jo genau, ohne des Bärwel geh ich jo Neiens mäh anne.

Ich fahr mid dem Bärwel in de Weldgeschichd erum, in alle Gasse eninn un widder enaus.

Häär, was hadder ich e angschd vor dem Neije, was do so alles uff mich zukumm is.

Es Bärwel is kumm -  un guud iss.

Mad, do kännsche Des un dort kännsche Sell un hinnenooch do des aa noch– klar doch......warum dann ned.

Es Bärwel werd  ingeklickt un schunn gehd die Poschd ab.

No Mannem, no Heidelbersch, no Schwetzinge, no Bensem, no Binge, no Kreiznach, no Kerschem, - iwwerall anne un aach widder Hääm.

Es Bärwel saad mer wus lang gehd, weil......

's Bärwel ich moi niejes Sadeliddenavi J

e geil Sach, des...gelle

määnt die paelzermad

 

Do isse mol widder, die  "Pälzersch"

 (so nennt mich ein gude Freund, vunn driwwe üwwerm Wasser un dem wink ich jetzt mol b'sunnerschd lieb)  

Wennigschdens am Sunndaach muss ich mir mol e bissje Zeit abknabbse, fer do mol widder se schreiwe.

Geschder war ich kompleddo kabuddo – Noja, mer is jo aach nemmie es jingschde un des Moijens um Viere uffschdeije, die ganz Woch, des bleibd jo ned in de Knoche schdegge. 

Moin Obba hod immer gesaad "En aawetsamme Mensch braucht kää Wecker, die Aawet weckt äm un treibd äm enaus" Alla, do hod jo aach Moins am Viere/halwer Fümfe es Veeh im Schdall gekrech – do hod eh kääner mer schlofe känne.

Bei uns rangst heegschdens als de Kader – jo echt...der rangst manchmol richdisch laut, aach wanner daachsüwwer razze dud - mir hann do schunn schallend gelacht.J 

Heid Moije hädd ich jo leie bleiwe gekännt, awwer des is jezz schun so in Flääsch un Blut üwwer gang, dass ich sogar am Sunndaachmoije um Fümfe Kaffee koch, de Kader fiddere du un mich gemiedlich mimme Rätselheft ins Esszimmer hiehock.

's ess e herrlich Ruh, so Frieh – ich hunns gern un kann so schää e bisje rät'sle un moine Gedange noohänge. 

Am Freidaag war ich uff de Hääd, bei moiner Momme. Ich hatt jo seit Woinachde kää Zeit, for lauder schaffe. Ach Gottsche, was isse sammegang, seid'se dodeledschd die Gripp g'hadd had, trotz geimpft.

So schmaalsche iss Ährene Gesichdsche wor, die Hänn so foi – Die Klaarer sinn'rer jezz all veel so weit. 's Gaby war ned do, so hunn ich midderer gekochd, gess un vezeeld.  

De Klaache Franz wolld se Dunnerschdaachs besuche, awwer do hoddse's Gaby grad geduschd, alle kummder hald wannannerschd widder. Hoffentlich ned so ball, weil der aach nix heerd un immer's ää un Selwe vezeehle dud, hod die Momme gemänd.

De Faule Jaggob war aa mol do. Der waas jo alle Neiischkeide, kummd noch iwwerall erum. Der iss sozesaa es Daachbläädsche vunn de Hääd.Do erfahrd'se alles wasse wisse muss, um ned gans so abgekabseld  do hinne in de Frangeschdross se wohne.

Vum Babbe hadd'ses veel, er wär jezz am siwwezehde, dreiunachzisch Johr alt.

Noch iss nix vegess, nix velor, kään Daach, kää Schdunn un kää Minudd -

 

 "Erinnerunge lind und leise –

zart geh'n Gedange uff die Reise-

landen sacht, eijenswu in de Unendlichkeit-

"Gedange tragen Herzen weit"... 

Die Veschelscher – kännsche ned emol die Vochelhaisjer uffhänge un voll Fuuder mache, froot se.

Sie guggd so gere zu, wann die sich an de Haisjer ums Fuuder schdreiren.Moi Eldrehaus schdehd jo noh beim Wald un Vechel kummen do in alle Greese.

 So wunnerprächdisch bunt, klääne, große – Sorde wu mer so kaum se sähne krieht. Die Momme kennt'se allminanner.

E Schisselsche mid Fuuder hun ich direkt howwe uff die Finschdebank geschdelld un kaum dass ich mich erum dreh, gehds Geschill do drauß schunn los.

Ach was hod moi Momme sich gefrääd. Jezz hodd's Gaby hald nore noch ää Aawed meh – 's muss alle Daa die Fuuderkäschde ufffille. Ich wäss, es machds, weil's aach soi Schbass dro hod, wann moiner Momme Ährne Aue lächeln....... 

"Mid so klääne Sache, kammer ähr e große Fräd mache"

 

Ich habe mir folgenden Spruch in mein Arbeitszimmer gehängt und will ihn mir ein wenig zu Herzen nehmen:

Die Gedanken hängen am Gestern, die Wünsche hängen am Morgen.
Erinnern und ersehnen- und jetzt?
Das Jetzt wandert unbemerkt klammheimlich hinüber zum Gestern,
unbeachtet, vernachlässigt, sich selbst überlassen.

Die Atemzüge nicht genossen, das Lachen nicht richtig gehört,
das Schmecken kaum gespürt, das Du gegenüber nicht gesehen,
die Kraft des Danks nicht genützt.

Unbewusst lassen wir
die Perlen des Augenblicks verstreichen,
als seien sie nicht auszuhalten,
als hätten sie nichts zu sagen

( Iris Mandl- Schmidt). 

En sunnische Daach, so wie do bei uns in RLP, wünscht eich

die Paelzermad

Do isse widder..... 

Die Johreszeit, wu ich eischendlich gar ned leide kann.

's is Schnuddelwedder drauß – newwelich kald un glatt, wammer Moijens ned mid rechend.

Sogar geschneet hots schunn. Leije geblebb iss awwer nix.

Alle Geboot begäänd äm Wer, wu de Schnubbe hot und egal wiemer aach uffbassd. Es vewischt äm unner Garandie aa.

Ebbes schäänes hod die dungel un leise Zeit awwer doch.

 

Moijens in de Frieh un Owends, wanns grad finschder werd, wern bei uns Dehääm Kerzjer ogeschdeggd.

Ich lieb den Geruch un des wame Lichd in de Schdubb. Sogar moi Rätselheft mach ich am Liebschde beim Kerzelichd.

Mer sitzt aach werrer meh beisamme, dud vezeehle iwwer Sell un Jenes.

Treffd Freind, emol zum Käffche tringe, un schbaziere geh.

 

Geschder war ich mid moiner Freindin unn moim "Schdengelche"

(Des häßd so, weils ohne soi Glimmschdengelcher ned lewe kann) *gg*

uff'rer Tubber Paady, bei de goldisch Dochder vunn moiner liebschd Kolleschin, wu ich je g'hadd had.

Achzeh Leid, orrer so, had se zu dere Vorfiehrung ingelad. Debei war aach die Oma – un die had en Hefekranz gebagg, awwer Hallo, war der mmhhhhhhhhhhhh.

Mir is bei dem Kranz de Randonkuche vun moiner Oma ingefall. Der war nore e gut Schdigg greeßer. In die Forme Sellesmol hod e gud Kilo Mehl ninn gebassd.

 

Nä, sääd die Oma, Randonkuche is des do awwer ned, weil Randonkuche is mit Backpulver – derdo is jo mit Hef.

Recht haddse, do isses mer widder ingefall. Hefekuche hodds efderschd gebb, Randonkuche an Feierdaa.

 

Die goldisch Krott hat vunn denne neimorische ~Muffins~ gebagg, mit Schoggelad. Ei veduzz, die warn jo genauso legger.

Abbelschnegge hodds dann frisch aussem Owwe geb, weil die Tubbertande jo ährne Sache vorgschdelld hod. Dodebei war aach so e Schnizzler, wo die Äbbel so klää schnizzle dud, ei grad wiemer se hawwe will.

Nochemol e Anneres wu die Niss gemahl hod. In ännie vun ähre Schissele hoddse dann die Äbbel midde Niss un'eme bisje Zugger vemischd – Had Blädderdääg debei, den hoddse ufferolld, die Abbelfüllung enin, zammegerolld in diggere Scheiwe ( Schnegge) geschnidd . Alles uff die Baggunnerlaach (nadierlich aach vunn Tubber) un ab in de Owwe. – Warn aach kää Owwekruzze – nää warn gud. J

 

Des Brot wuse in der Silikonform alswie e Berremsche gebagg had, des war ned so moins....

Awwer alla, ich bin hald e Kernertande – wärs Vollkornbrod gewäss......

(aach e ziemlich gaagelisch Sach, die Baggforme)

 

Jo, Schissele  mid Deggele, in alle Greeße. Kanne fer de Kaffee un Kännscher fer die Milch. Häwwelcher fer warm se halle un Welle fer in die Mikrowell. Schääne Sache un prakdisch is jo vieles aa.

Herz was begehrschde – alles kunnd mer kaafe. Jo, mer muss debei saa, es is aach ned grad e billisch Sach.

Die erklärn zwar ährne dääls gesalzene Preise midde lange lewensdauer, awwer ich mään:

E bisje "bezahlbarer" derfd der Schbass schunn sinn, grad in de heidisch Zeit vunn o'mass Harz4 - un wu jeder schbare muss.

Ausser, die wollen, dass Tubber nore fer e beschdimmdie Gesellschaftsschicht sinn soll, was ich mer awwer ned vorschdelle kann.

Ich hunn jo aach so Manches schunn e paar Johr lang, awwer es Welljerholz, des hunn ich noch ned.

Des määchd ich gern prowiere - un fer die Momme die neie Milch un Zuggerhäwwelcher. Ährnie sinn schunn "Annaduwak" alt.

Die Gewerzdeesjer sinn e bassend Geschenk fer Wen, fer Woihnachde.

Des war en schääne Nomiddag, mit viel Vezeehlcher un Prowierles. Ich hoff fer die goldisch Krott aach.

En liewe Gruß an Allminanner vunn de 

paelzermad

 

Allweil kummen'se aus alle Richdunge, mid Audo, Fahrrad, Bus und Bahne

un tringen denne gude neije Woi.

als Unnerlaach gebds Grumbeersupp, uffgemozzd mid Sahne

wie kännds aach annerschd soi.

 

Derweil muschd schlitzohrisch sinn, willsch aach en gude Platz vewische

die Selle dränglen nämlich iwwerall eninn.

De Berll flie't uffen freie Platz un land gekonnd uff ääm vun denne Dische

Bauff, schunn hoggsche midde drin

 

In Woilaun werd vezeeld, gesung un mid Musik geschungeld

Feez, Weck, Worschd un Woi.

So gehd's frehlich, munder weider, bis mer sich kennt un bisses dungeld.

Wie kännds aach onnerschd soi.

 

Wär so e Woifeschd mol erlebd hodd, dem gefallds un der kummd ned allää, wanner widderkimmd

Schliesslich sinn mir do in de Pfalz Dehääm, wu's bassd un ewe alles schdimmd.

 

Proschd Gorschel – 's kummd en b'sunnerschd Foine

Vun denne neije Pälzer Woine J

 

 

Moi liewer Scholli – Geschdern im Gaade.... 

Vier große Quetschekuche, zwää defunn mit Riwwele un zwää ohne -  un so schdigger zwonsich Lidder Grumbeersupp, hänn die vebuzzd, wie nix.

Ei beinoh hädden die geguggd wu noch määner hääkummd.. 

Ääni fun de Fraue, is aach schunn üwwer de fuffzisch, awwer e rassisch Fraa un gerdeschlank Elvira hässt'se.

Ich hun geguggd wie e Audo. Ei des hod jo drei Deller Supp eweg gemach un vier Schdigger Quetschekuche.

Soi Monn hod nore mirrem Kopp geschiddeld un mir hann uns gewunnerd wu des Perseenche des alles hieschaufele dud.

Wie's dann endlich ferdich war, is soi Mann bei's an de Disch – hodds iwwer de Kopp geschdräächeld un ganz zärdlich zum gesaat.

"Schatz, soll ich der noch e paar Aijer bagge, ned, dass'de ned satt wersch. ;-)  :-)  ;-)  

Mir hunn uns ball die Bux veschdrulld, vor lauder lache :-)

Üwwers Wocheend war ich do ufferer Klausurtaachung in de Südpalz.

Imme vier Schderne Hodel, midde in de Woiberje geleeche.

Allää die wunnerprächdisch Fahrd dorch die klänne malerische Woiderfscher is schun was fers Dräme. Iwwerall hängen die Rewe iwwer die Gässjer un Blumme ball an jedem Fenschder. Alle Gebodd siehd mer e uffenes Hofdor mid uffgebaude Schdännscher devor.

Do gebds Persching,  Äbbel, Qwetsche, Beere, Grumbeere, Salad, Gummere un alles was do jezzerd grad reif is, se kaafe.

Fer des alles richdisch osegugge muss mer ohalle un ausschdeije.

E Uzahl vun Mensche, Audos un sogar Busse drängeln sich dorch die enge Gässjer. Manchmol määnd mer grad - kää Schongs, do kumm ich nie im Lewe dorch, awwer uff wunnersamie Weis gehds dann doch.

Ogefang hod die Taachung Freidaachs Nomiddaachs. Z'erschd mol zwä-drei Schdunn was geschaffd, awwer dann en gemiedliche Omend middeme gude Esse un emme legger Woiche. 's es jo e bissi schbäd wor, bei nedder Unnerhaldung un e b'sunnerschd romandisches Flair uff dere groß Terass. Ich war die äänzichd Fraa unner lauder Männer.

Geschloof hun ich wie gebobbeld inneme Dobbelzimmer – Was määnche, ob ich allä war – alla, alles bin ich deer jo ned grad uff doi Neigiernos. **g**

 

Samschdaachs Moijens in de Frieh bin ich enunner, enaus vor die Dier.

Was fern Obligg.....

Rebschdegg soweid ich gugge kunnd. Trauwe blaue und griene, richdisch schääne digge Hängel – Die Sunn is grad uffgang, die Vechelscher hun aus de Hegge gepeff. Klääne Eidechse hunn sich uffem waame Schodder gesunnt. Blummebeede, odder besser gesaad Blummeflegge in voller Prachd, ingefassd mit Waggerschdää.

Garned weit eweg  schdehd e ehemolisch Kloschder, wu Heid aach e guudes Drebbsche gemach werd  - un vorrischmär de nahe Wald, owwenuff, dort lääfd e Sesselbohn uff die Burch. Die war ich mir Freidaachs schun ogugge.

 

So schää, so en Friede.....Ich kunnd mich gar ned satt gugge – wär gern geblibb...

Mär gebd sowas am friehe Moije aarisch viel, ich sauch des uff wie en Schwamm un geheer dann aach widder gern zum "Salz der Erde"

 

Des Friehschdigg no dem Genuss, war dobbeld gut.

Bis um ään Uhr hunn widder die Kepp geraachd, dann nommol e vier Schderne Esse, so mid allem Drum un Dro....un dann - ab Hääm.

's war ääfach schää........

 

Was machschen wann de e Schlang im Gaade siehsch?????? –

Ei ooschdelle, was'n sunschd. 

 

Nää, awwer jezz mol Schbass Beiseid – Ledschde Mondaach gehds Gaby enunner in de Gaade. 's will die Bohne robbe un Tomade, die wu rot leichden bis enuff ins Kichefenschder.

Wies do so de Gaadepaad lang leeft, siehds uffemol, wie sich driwwe beis Schwowe Gadedeerche was beweche dud.

Ach Gott, denkts noch so fer sich, was waren des awwel – gehd uff des Deerche zu un schnerrt direkt serick.

Fauchd doch do e diggie-feddie un gar ned kläänie Schlang es Gaby wierisch o.

Die leid do uffem Beddon un sunnt sich, wolld jo wahrschoins ned geschderd werrn.

 

Es Gaby war gelähmd vor Schreck. E paar Minudde esses schdeggeschdeif do geschdann, de Mund uff fer se kreische, awwer es kummd kää Word üwwer soi Libbe.

Es hodd die Schlang ogeguggd wie hipnodisierd un no Luft geschnappd.

 

Ach du Scheiwekleischder, wu kummd die dann hää - un wassem in dem Aacheblick so alles dorch de Kopp geschoss is.

 

Uff äääämol renndes los un kreischd "Friedel, ans Schwowe Gaadedierche is e Schlang"

"Ei wen kännden ich do orufe – die Bollezei, die werrn wisse, was do se mache is".

 Gesaat, geduu......

So ugefähr e halwie Schdunn schbäder klingeld en Mann un e Fraa an de Dier.

"Ei mir kummen vum Dierschutzveroi aus Marem – ihr hädden do e Schlang"

Jo, un was fer äänie, saats Gaby und fiehrd die zwä an des Schwowe Gaadedierche.

 

"Ja, wo is die dann jezz, do hoddse gelää – achgoggachgodd, wann die jezz in unserm Gaade is" seed's Gaby ganz uffgereechd.

 

Der Mann hod en lange Schdegge debei un schdocherd iwwerall in de Bisch un Planze erum. Z'erschd ins Schwowe Gaade, dann bei Ähne driwwe. Die Tomadeschdeck, die Bohne, die Rhabarwerblädder – iwwerall schdeggder soin Schdegge eninn un schdocherd do erum.

 *Nix*  Die Schlang is nimmie do.

Ei Fraa, saat der Mann zum Gaby – sie hädden die Schlang feschdhalle misse bis mir kummen.

"Ich glaab Sie hunnse ned all am Seijer, Ich die Schlang feschdhalle, ich loss mich doch ned beisse".

"Näää, seet der Mann, hädden Se mol bloss e Sack driwwer geschmess, odder en Äämer drüwwergeschdilbd. Des hädd schun gelangd."

 

"So finnen mir die jo nimmie, das hodd do kää Wert mäh -  mir gehen un die Rechnung schiggen mir Ähne zu"

's Gaby war baff gepläddeld wie bazzisch dass der war un had gar kää Worde.

 

Am annern Daach hod der Veroi bei meine Momme ogeruf un dere den ganze Schamass aach vezeehld. Die, glei bei mir ogeruf, weilse des jo nimmie so gud veschdeje kann un ned gewissd hot – was mache.

Ich war der velleichd sauer, was der Veroi sich innbild.

Kummen aaschschbäder mol o un männen, die Schlang waad bloss uff die. Dann noch velaude se losse, die Gaby hädd geloo un'se veäbbeld - Un mid dem Kram moi Momme, e Fraa vun achzich Johr un ned gesund, am Dellefon se belächdische.

Ei  ich waad nore uff die Rechnung – dann is awwer Pole uff un Russland zu.....

 

Dasses Gaby ned geloo hodd, wäss ich, weils seid dem Daa nimmie in de Gaade gehd – vor lauder angschd die Schlang kännd doch noch do eijenswu sinn un es beisse.

 

"Was machschen wann de e Schlang im Gaade siehsch?????? –

Ei ooschdelle, was'n sunschd".

 

Alla bei dere Art vun Schlang losse mer des velleichd doch besser sinn, odder.......

 

 

 

Heid is Sundaach un uff de Sundaach fräd sich de Guschdav immer säächnarrisch, weil

Sundaachs gebds es leggerschde Fudder.

Do kummd die Marri ogeschlabbd, middem Schorz, unnem Koppduch umgebun un schlebbd sich ab mimme Äämer, randvoll mid Saufudder.

Die Rechde vun de Ganz Woch, alles was in de Kich iwwerisch beglebb is, hoddse zammegeschidd un im Hawwe gud dorchgekochd.

En Hawwe gequellde, die dinne Grumbeere vunnem Friehagger, die hodds dem Wutz extra noch debei gekochd.

 

Zwä Schdunn hod's Marri des Fudder kald geriehrt, dass de Guschdav sich jo ned die Schuckschdeggernos dro vebrennd.

 

Der is nämlich so vefress, die Marrie wääs des – der deed denne Troog leerbuzze ohne äämol rumsegugge.

 

Jezzerd awwer, endlich schlebbds Marri denne Äämer ebei.

Em Guschdav so Schwänzje gehd wie mimme Maschinche genurld, eriwwe un eniwwer.

So schnell kommer gar ned gugge.

Un grunze duder, oing,oing....wie wanner däm Rudi Rüssel Kongerenz mache wolld.

 

Enin mid dem Pambes in de Troog un dann die Schdoppuhr geschdelld.

De Guschdav is nämlich Weldmäschder im Sundaachs-Saufudder-fresse.

 

Es Marri feierd ne noch o –

Jo moi Gudschder, fress du schä, mach nore alles eweg – des gebd en gude Winderschbeck un machd mer die Kiehltruh voll.

 

Musch dich sowieso e bisje eile, weil – ich glaab de Winder kummd Desdojohr friehjer als mer dengd. Des schbier ich in de Knoche.

 

De Guschdav leggd de Troog noch sauwer, es Marrie leerd en Äämer Wasser no – un dann machder sich eniwwer in soi Schlofegg.

Soi vollgefressenie Wambe schaugeld debei, als wannse sich glei aushewwele wolld.

Links newer de Schdalldeer schlofd de Guschdav am Liebschde.

Do hods'em frisches Schdroh uffgeschidd, dasser aach gemiedlich leije kann un des Fudder schää oschlaat.

Jo moi Wutzje, was e gud Schdiggelsche Veeh is, des leet sich-gelle....

Heid Omend bring ich der nommol was, is jo schließlich Sundaach Heid - gell Guschdav......

 

 Heid Moije bassierd, glei no'de sechs... Ich fahr die B270 lang, uffem Weech no Kreiznach.

Korz hinner de Roggeheiser Innfahrd, kummd so e wieschdie, uüwwersichtlichie Kurv.  70 derf mer do un ich had aach ned mäh druff.

Gott seis gelobd, gedrummeld un gepeff, weils schunschd häd känne aarisch haklisch fer mich werre.

Ich fahr in die Kurv eninn, wie uff äämol middeme Hechdschbrung e Reh üwwer die Leidplank geflo kummt. Des knallt mer vorre ons Audo un fliehd üwwer die Schossee in de Wald enin.

Des ganse is so schnell gang, ich hadd kää Schaas gehad, denne Unfall ze vehinnere. 

Es Schlimmschde awwer war -  wie ich geschdann hun, kummen zwää Klänne Rehkitzjer o, hubbsen aach üwwer die Schdross, beschdimmd ährne Mudder no.

Ich kunnd jo do in der eklisch Kerv ned schdeje bleiwe,

bin gefahr bis do, wu ich erumdrehje kunnd.

Serigg un de Schosseegrawe abgeguggd.

Gefunn hunn ich awwer nix, aach ned moi WV Zeiche, des war nämlich abgeplazzd un aach üwwer die Schossee geflo.

 

Ich bin dann gleich links enin, Richdung Bollezei Roggehause.

Der Bollezichd hod sich den Schade am Audo ogeguggd.

Es Nummerschild vebellernd un die Halderung veplazzd – es WV Zeiche abgeplazzd un es Plasdik drummerum kabudd.

Iwwerall hun die braune Hoor dringeschdogg, schunschd war nix.

Is alles uffgenumm wor un gebd en Vesicherungsschade.

 

Ich hunn bei dem Bollezichd erschd mol ausgezidderd, so uffgerechd war ich.

 

Fraa.... määnder, des bassierd awwel werrer alle gebodd, do sin sie ned die

Erschd un aach nid die Ledschd.

Des war fer mich awwer kää Droschd.

Er hod mer dann aa gesaat, dass de Ferschder ogeruf werd. Der muss gugge obber des Reh un die Junge find.

 

Ich bin froh, dass mär nix bassierd is, awwer - Mär is ganz schlechd, wann ich denk, dass die zwä Kitzjer jezz vehungere missen, nor weil ich grad in dem Aacheblick mit 70 do endlang gefahr bin.

Schlimm, so ebbes, glawens nor.......

O Herr halt oi mid doinem Seechen....

 

 Do drauss uff de Hääd, do hängen die Sauerkärschebääm voll, als wann's es ledschde Mol wär, die Naschd brechen ball zamme vun dere schwere Laschd –

un die Himbeere kammer gar ned so schnell robbe, wie die no'reifen. 

Alla, kannschders jo üwwerleeje "obsch's Obschd kochsch, orrer obsch's Obschd ned kochsch"...ich hunn hald e Dääl gekochd......J 

Jetz ropp ich do schun zwä Woche lang, alle zwedde Daa ä Kachelsche nom annere voll mid denne Himbeere.  Koch Schmär defun un frier die schäänschde in, fer Himbeerkuche.

Ofangs wars jo gar kää Sach, awwer jezz no dem veele Rää.......Geschder is mer uffgefall, dass do in denne Himbeere Änner wohnt, nämlich

De Himbeerworm 

Die Himbeer lockt mit Färb un Duft, de Sammler, Wanz un Schnegge.

De Himbeerworm, der fiese Schuft wählt 's Himbeerinnre zum Veschdegge.

Mä nämmd die pralle, reife Beere – Es Wasser sammeld sich im Mund

Die Zung prieft, was des wäre, so länglich, frei beweeschlich,rund.

Zuuuuuu schbäd – Der Worm hod schun de Weesch gefunne

Üwwern Gaumeseechel in de Maa, no unne.

Mim Aroma vun de Himbeer schmeggd der aach gar nid mol so fad

Nor- Himbeer ohne Wormgeschmack, des is wodruff de Gaume waad. 

Drum solld mer erschd mol mid de Aue gugge, bevor mer so e Beer dud schlugge....gelle... J

 

*mol frech grinst* die ~~Paelzermad~~