Fer all die wu des englisch ned so kännen – Halloween is jedenfalls kään Gruß on Wien....
Nä, des is De Omend vor Allerheiliche
Aussem Allerheilichefeschd is jedenfalls der Name Halloween entschdanne
Zesammegestzt aussem englische All Hallows Eve (OED: 1556
„Halhalon evyn“ Chron. Grey Friars),
von eve (evening, „Vorabend“)
und hallow („Heiliger“).
Zum Urschprung vunn dem Halloween gebts jo unnerschiedliche Erklärunge.
E hischdorischie, gut erklärdie sieht jo en Keldische Urschprung.
Nochlese kammer des bei:
http://de.wikipedia.org/wiki/Halloween
Unn es schdehd jo nummo feschd –
"Die Kelde waren in de Palz, also warn'se Pälzer" **gg**
Was jo bewiss iss dorch denne Ringwall uff unserm Dunnerschberg un dem Keldedorf in Schdäbach.
Ich saa jo, wonn numo des Halloween ned Pälzisch is.....
Egal wie aach immer, mer feiern des Halloween jo aach schunn Johre un die Kinner hunn nochimmer ährn Riesschbass dodro.
Im Gaade werren jed Johr extra Kürbiss gesät un zugeguggt wie die wachsen. Immer mol e bisje rumgedreht, dasse jo aach schä rund wärrn, weil mer dodraus jo dann im Oktower die Gesichder schnitze dut.
Je grauslich-schäner so en Kürbis aussieht, umso mäh Schbass machts,
denne vor de Hausdier ufffzeschdelle
un sich se fräe wonn'ne Onnerleid betrachde dun.
Bei uns im Gaade hots Desjohr drei schääne geb.
Änner e bisje klääner, die annere zwä sinn schänne Kepp.
Frieher, wie ich e Kind war, hot mer die Kepp aus Dickworzele geschnitzt. Kürbis hann mir ned gekännt.
Riewekepp hot mer die genennt, grad wie en schdure Bock, des is aach ein Riewe- orrer Dickworzelkopp **
**
Die Dickworzele, tja....die haddemer vumm Bauer – besser gesaat,
mir hann die geklemmt **gg**
Der Bauer hatt uns mol beim "klemme" verwischt, er hot jo gemänt, mir hänn die geklaut, awwer nee, des war bloss aus de Not gebor, weil....dem soi Dickworzele hatten so schää Kraut noch dro, grad so wie en Kopp voller Hoor.
Die warn äfach perfekt.
Alla, mär därfdense dann jo aach behalle, hunn misse awwer en Nomiddach uffem Agger, beim Dickworzelraffe helfe.
War e gut Geschäft, e dickes Lewwerworschdebrot hots do nämlich aach noch geb un was zu tringe.
Korz vor Halloween is dere Worzel de Kopp abgeschnitt worre, ausgeheehlt,
Aue un greisliche Zähn sinn eninn geschnitzt -
un e kläänie Kerz is noig'schdellt worr -
de Kopp werrer druffgehockt un ferdisch war deRiewekopp.
Jessas hadden mir unser Fräd.
In dere Nacht draus rumzieh hunn ich jo z'erschd ned gedärft. Am Fenschder die Nos plattgedriggt un zugeguggt, wer do draus an moim Dickworzelkopp vebeigeht un dassene kääner klaut, orrer kabuttmache dut.
Die Kerz hot geflaggert un's hot subber ausgesieh.
Schbäder, wie ich älder war, do därft ich jo aach so bis um Uhre zehne mit uff die Gass.
E aldes Leineduch umgehängt, Aueschlitz eninn geschnitt un e greislich Gesicht drufgemolt.
So sinn mir erumgezo, hann bei de Leid geklingelt un se verschrock.
"Sießes, orrer 's gebt saures" - so war unser Schbruch.
Die Määschde hunn denne Schbass mitgemach un uns sogar als was geschenkd.
Do war als was los.....jo, uffen Land war des halt viel schäner, alswie in de Schdadt.
Also ääns schdeht jo feschd, so en Kürbiskopp werd bei uns aach Desjohr geschnitzt un ob ners glawen orrer Ned – Ich deet jo narrisch gern mo werrer mit enaus geh in dere Nacht.
Schad dass ich aus dem Alder lang schunn eraus bin...vedammt lang sogar....
Un b'sunnerschd schad is, dass ich aach kää Dickworzele mä klemme kann, wär in moim Alder jo e bissje aarisch schräch...gelle..... 
Alla dann – viel Schbass in dere Nacht vor Allerheilische,
Viel Schbass an "Halloween"
http://www.theoworlds.com/Halloween/index.asp?CardID=92552
gebaschdelt aus alde Tank.
.jpg)
