Geschichde vunn Dehääm

 

Juchu, de Perschingskuche is gebagg....

 

Ich hann der doch do Heid misse uff e Begehung, do enunner noch Wacherem.

Iwwer zwä Schdunn sinn mir do dorchs Rothaus, dorch Schule un Kinnergärde gedabbd.

Moi Liwwer, had ich runde Fiess.

Vun Wacherem isses dann eniwwer uff Friedelsem, Gännem un Ellerschadt gang.

Ganz genau, dort wu moi geliebde Persching urschbringlich härschdammen, die "Ellerschadter Rode".

Alla, die Bauersfraa, bei der wo ich im Hoflade geschdann hann, die hod mer gesaat, dass die rode Persching erschd so Ofang Sebdember se kriehje sinn. Normal is des jo en Herbschdpersching, awwer Desdojohr ess jo alles e bisje Friehjer dro.

Schatt desse hadd die awwer die geele Persching, wu jetzerd schun reif sin. So sieß, so safdich und gar ned deier.

Ich hunn mer e Schdeisje ins Audo gepaggd, e Säggelsche Grumbeer debei und zwä Killo Quetsche.

Ich bin jo säächnarrisch druff, iwwer die Käffscher an de Woischdross entlang se fahre. Do mol osehalle, dort mol imme Hoflade se schnuse – Do nor gugge, dort was kaafe.

Mähschdens hann ich's Audo halwer voll mid lauder legger Sach.

Grad wie friehjer, wu die Schdadtleid immer uffs Land gefahr sinn - Däls fer se fechde un Dääls fer se fuggere, weils in de Schadt kä Gemies un Obschd un Worschd geb hod, odder ubezahlbar war. Des wääs ich aus alde Vezeelschers vun de Momme un vunn de ald Hildeoma.

Alla, kaum Dehäm, hun ich moi Krimmeldäg gemach un so Schdigger zeh Persching mid kochend Wasser iwwerbrieht. E bisje muss mer wade, die Schal zieht sich dann nämlich gons leicht ab.

In der Zeit hann ich e Blech geschmeerd un die Hälfd vum Krimmeldäg feschdgedriggd.

Do druff is dann e hab Pund Quarsch, veriehrd mid Zugger un emme bisje Buddingpulver kumm. Die halwe Persching druff un de Reschd Krimmele driwwer.

Gebagg hod des Blech so e Schdunn.

Un wie des erschd riiieeeeechd.....Schliessen die Kichedär zu un veschdeggelen die Messer, schunschd kann ich fer nix garandiere....**gg**

Moije isser awwer fällisch, do werder ogesäweld, der Perschingskuche -

Die FriedaElisabeth fräät sich aa schun druff.

 

Wann doch nor schunn Moije wär...hach joooooooooo.....

 

 

Die Nadur froot jo ned no Sundaach. Wanns Obschd reif iss musses abgemach un ingemach werre, wie grad jetz die Kersche. Die sin schwaz un knaggisch, grad reechd fer's Kerscheplotzer bagge.

 

Wann ich dro denk, bei uns Dehääm – mir hadden en Kerschebaam voller digger, schwazer Herzkersche direkt im Gaade hinner de Audogaraasch schdeh.

Drunner war e klää Bängelsche. Des had de Babbe aus dinne Dännscher geschroinerd.

Mä wie zwää Leid kunnden nid druff hogge, awwer's war e urgemiedlich Bängelsche.

Als kläänie Krodd hun ich dort immer mid moine Bobbe geschbeeld. Had moi Bobbescheesje unnerm Kerscheboom schdeh un unsern Waldi hod sich drin bräd gemach.

 

Wann die Kersche ogefang hun sich se färwe, bin ich efdersch mol uff des Bängelsche geschdieh un hun prowierd, wu ich drolange kann. Hod die Fried mich vewischd, hodds Schille geb.

Awwer dann, wannse richdisch reif warn hod Sundachs Moijens in de Frieh, de Babbe die Leeder ogeschdelld un is enuff geschdieh.

Debei hadder en Äämer un en Fleeschhoge. Mit dem hodder de Äämer an die Schprosse gehung. So kunnder mid alle zwää Hänn robbe.

Ich hun gewaad bisser rufd : Bobbesje, hall mol doi Scherzje uff.  :-) 

 - huns gemach un er hod mers Scherzje voll Kersche geschmiss.

 

Dodemit hun ich mich uffs Bängelsche vezoh un ugewäsch die Kersche gess. Mmhhhhhhh warn die legger.

Dortmols kunnd mers noch ugewäsch esse. 's waren jo noch wenisch Audos die Gass entlang und kaum en Fliescher, ned wie Heid.

 

Schbäder dann, ich war zwelf wie ich es erschdemol mid robbe gederfd hann. Uff'rer Leeder war ich nadierlich viel Friehjer schun, awwer Obschd robbe, des muschden mir Kinner jo aach erschd lerne. Die Baam warn hoch, die schmale Schbrosse un do owwe es Gleichgewichd se halle, des is gar ned so ääfach.

 

Am Liebschde war mir mid de Leeder enuff, en schääne Aschd gesuchd, wo mer die Kersche ball in die Gosch gegängd sin, druffgekraweeld, es Äämersche eijens wu drogehängd un losgang is.

Drunne hod die Momme sich de klääne Disch aus de Wäschkisch erausgehol un en Schduhl un hod schun mol ogfang se kärne.

En Kerschekärner hadden mir Sellemols noch ned. Die Momme had so e großie Hoornodel. Dodemid is des prima gang.

 

Aach schbäder, wie se dann vum Babbe so en Kärner kriehd hod, die hod mid nix annerem die Kersche gekärnd, als wie midd däre Hoornodel. Grad geschwor hodse druff un machds Heid noch so.

 

So schdigger drei Pund gekärnde Kersche hodds jo gebrauchd fer de Kerscheplotzer.

Alla – 's wars groß Kucheblech.

Die alde Weck warn ingewäschd, sin jezz ausgedriggd wor un in die groß Dägschissel kumm.

Debei is Zugger kumm, ned soviel, weils so Siesskersche warn. Fer die Groß Form warns so zwische zwää-un dreihunnerd Gramm. Zimt is drokumm, des schmeggd soooooo gud......mmhhhhh

Un finf Aijer. E gud Schdigg Budder hot aach ned fehle derfe un e Päggelsche Baggpulwer.

Die Kersche driwwergeschrähd, die Ärmel hochgekrembeld un mid zwää Hänn alles gud dorchenanner gemengd.

Die groß Form is mim Bensel ingebudderd - mid Weckmehl ausgeschrähd un der Plotzerdääg eninngefilld wor.

Solang wie der Kerscheplotzer dann gebagg hod, solang hädd ich vorm Owwedärsche hogge un uffgebasse känne. Den Geruch hunn ich bis Heid ned vegess.

 

Hodds den Kerscheplotzer zu frischer Gemiesesupp aussem Gaade geb, als Middachesse, dann sin die Niss eweggeloss wor.

Hoddsen awwer als Kuche fer zum Kaffee geb, dann is do noch e Gläsje Woibrand drokumm un gemahlene Haselniss.

Egal wie, der Plozzer war un is uuuuuhoimlich gud.

 

Kerscherobbe un Kerscheplotzer bagge,mach ich noch Heid fers Lewe gern.

Juni - un grad is jo widder soweit.....:-)

 

Wers Rezept prowiere will, kanns gern hann......

        Eich en schääne Sundaach un en Gude ;-)                  

  

 

Hefezopp, so wie'ne moi Oma schun gemachd hot.....

Zutate fer ääner Zopp : 

450 g Mehl

250 g Schmand  e bisje waam mache

1 Würfel Hefe

20 g Zucker

Aus de erschde vier Zutate en Vordäg herschdelle        

Un 15 Minudde gehje losse.   

100 g Butter    lauwarm dezugewwe

30 g Zucker

1 Eßl. Rum

50 g Rosinen

50 g gehackte Mandeln  

Alles gut minanner veknede un 60 Minudde gehje losse.  

Den Däg in drei Rolle däle.

Zu'me  Zopf flechde, uff e Baggblech leje, rund vorme -

in die Mitt e feierfeschdes Schisselsche eninnschdelle -

un nochemol 30 Minudde gehje losse.  

Mit Eigelb bschdreiche.

Bagge bei 180 ° ca 40 Min.  

Nom Bagge des Schisselsche glei vorsichdisch erausdrehje.

Wanner ganz abgekäld ess, in die Mitt Holzwoll eninn mache

un bund gefärbde Aijer drueffleje.

Velleicht bassd a noch e klä Häsje debei.  

E Gud Gelinge un

"Frohe Oschdre"

 

wünschd die paelzermad

 

 

Ich bin zwar ned am Rosemondaach gebor,awwer
"Du närrisch Gescherr"- des säät moin Monn aach alsemol zu meer.

Heid gebts bei uns no aldem Brauch, Fassnachtskichelcher un Woisoß.
Des hod moi Oma schun so gemach un aach moi Momme.

Alla hunn ich mer gedenkt, es schmeckt jo gar ned mol so iwwel, werds aach bei uns om Rosemondaach so beibehall.

Die Woisoß werd mirreme *Gude Dröbbsche* gekochd un abkälde geloss,
nod werd in die Woisoß en schdeggeschdeife Eischnee eninngezoo, so dasses aussieht, als ob Eisberje druff schwimmen.

Des is echt legger un bringt äm in Schdimmung fer Fassenacht ze gugge, egal ob Dehämm vorm Glotzkaschde, orrer eijenswu, ääner vun denne Umziech.

Hauptsach Schbass gehatt...gelle....;-)

PS: Wer's Goggo fahre muss, des werd sauwer ausgelost weil,

der Sell krieht nämlich kää Woisoß zu soine Krebbel.

Ned dass der in soim Hormel in de Schosseegrawe fahrd.....gelle ;-)

Eich all veel Schbass uff de Gass...
~~paelzermad~~

Wann'd jezerd wisse willschd wie's gemach werd...

froo mich doch ääfach .......**s**

 

 

 

 

Heit war so en schdressische Daach, der hot Heit Moije schunn um fümfe demit ogefang,

dass moi Ambännche in moine Schdrumbhosse hänge blebb iss un e Loch geriss hot.

Ei, do war ich vunn Null uff Hunnerd in Dreikommanix.

Gewizzeldunnerkeil hunn ich gedengt, wanns so schunn ofangd......

Ins Audo eninn, vunn do o hots Dellefon nemmie schdill geschdann.

Wann des schdimmd, was Heit die Bildzeidung schreibt, ei do hann ich Heit Krebsschdrahle genung abkriehd.

Erschd in de Schdadt erumgebrummd, do un dort was erledische und dann uff Alse.

Dort muscht ich e Uffmass mache.

Werrer Häm ins Birro, Mails geles un Dellefon abgehärd un ab.... -  

werrer enaus do un dort noch des un des erledische.

Beim Gloggeschlaach wars korz vor zwelf un ich war gebicheld.

Aus, Schluss hunn ich gedengt...Alleweil fahr ich ins Lidl un kaaf Heef - fahr Häm un bagg Fassnachstkichelcher.

So hunn ichs aach gemach.

 

Ää Killo Mehl in e Schissel gesibbd

En halwe Lidder Milch warm gemach und do drin zwää Werfel Heef uffgeleesd.

Die Heefmilch bei's Mehl geb

150 g Zugger debei gedu

Ään Becher Schmand dezu geleerd

4 Essleffel Eel mit drunnergeriehrd

zwää Aijer drogeschlaa un alles mid de Knethoge gud geriehrd.

 

Denne Hefedääg  mimme Handuch abgedeggd un warm geschdelld.

Isser schää uffgang, eraus uff de Disch geleerd un dorchgekned. Vielleicht noch e bisje Mehl dro gewwe.

Ned so feschd un ned so wääch derf der Dääg sinn.

So – jez wird der e bisje ausgewälljerd, so Schdigger 3 Zendemeder dick.

Mimme Tringeglas Bällcher aussteche un uff Brettcher leje, dass die nochemol geje kännen. Wann dodraus schääne, digge Bällcher worr sinn, dann kummen die in die hääs Frittös un werren hiwwe un driwwe ausgebagg.

Fer absedroppse kummen die uff en Kucheroschd un werren dann in Zimt/Zugger gewälljerd.

Wann die dann ganz kalt sinn, werd Himbeer odder Johannesbeergelee in die Kucheschbritz mit der lange Tüll gefillt un die Kichelcher dodemit gefillt.

Jez kunnd ich mich jo mo werrer ned bremse, hunn glei ääns probiere misse un wissener was......

Ei, die sin gut......

Ich wääs wer sich do Moije noch driwwer fräje dut......

 

"Moi Momme, un moi Bu"

 

Schbritzgebaggenes

Nom Rezept vunn moiner Mudder,

entwerrer mit Hasselniss, orrer b'sunnerschd legger, mit Walniss
 

Was mer brauch - un wie'mers machd:

250 Budder
2 Ajer
250 g Zugger
1 Vanillezugger
200 g gemahlene Nisse minanner gut veriehre.

500 g Mehl no un no eninnschaffe,

erschd riehre un de Reschd dann unnerknede.

De Dääg derf ned zu wääch sinn.

Wanns needich is, noch e paar Niss orrer e bisje Mehl unnerknede.

Awwer owachdbasse, - zu feschd derfer aach ned sinn.....

Iss e roinie Gefiehlssach....

De Dääg in e Gebäckschbritz fille, orrer, wies moi Momme immer gemachd hod, dorch de Fläschwolf drehje.

Dodefor gebts exdra Uffsätz mit veschiedene Forme.

Om ääfachschde un schnellschde geht’s, wann zwää minanner schaffen.

Ääner dreht un de Onner schneid die Plätzjer ab,

formt se glei in de Hand zu'me Kringelsche orrer zu'rer klääne Well

un leet se uffs Backblech.

Mid e bisje Iwung geht des Ruckzuck.....

Geback werren die dann bei bei 175° ca. 10-15 Min.

Des Schbritzgebaggne mit de Ende in Kuvertüre tauchen,

uff Alufolie trockne losse un dann in Dose setzen.

Mir hunn Dehääm fer die Plätzjer exdra en Koffer gehadd.

Der is mit Folie ausgeschlaa wor

un die Sorde sinn newernanner eninn gesetzt wor.

 

Deggel zu un abgeschloss, weil schunscht immer mol wirrer de Ää orrer de Onner schnuse gang wärn.

 

Sunndaags als hod die Momme dann e Vesuchsschdiggelsche erausgeriggd.....weil mär gar so gebeddeld hann – aach moin Babbe......Jo – Sellemols.....

 

Alla...bagge is jo kää Hexerei un macht aarisch viel Schbass – awwer Zeid muss mer defor hann......

 E Gudes Gelinge winscht die Paelzermad.....

 

 

 

 

Geschdern war ich jo uff de Häd bei moiner Momme, s'war jo allerhand se mache. De Grieschnitt im Vorgaade war fällisch un de Scherezaun ums Haus erum muschd aach geschdrisch werre. Alla, de "Ablecher"  :-))))  war mit,  es Wedder hot oinischermasse gehall un so hammer viel geschaffd.

Awwer des wolld ich eich eischendlich gar ned verzehle....

nää – vezeele wolld ich eich vum *Abbelgligg* un warum Äbbel  gligglich machen. 

Freidaach Middach had ich uff äemol de Rabbel krieht –Hunn en Budding aus knapp emme Schobbe Milch gekochd

(der muss e bisje digger soi, wie schunschd)

20 Äbbel geschält un's Kernhaus ausgeschdoch.

 ausseme Killo Mehl

zwä Päckcher Baggpulwer

200 Gramm Zugger

4 Aijer

12 Eßleffel Milch

300 Gramm Budder

en schääne Knetdäg gemach un e Schdick defunn ausgewälljerd. 

Jetzerd hunn ich immer än Abbel uff de Däg gesetzd E paar Rumrosine in des Kernhausloch geschdobbd un zwää Teeleffelcher vun dem Budding aach dort dezu.

Mirreme Dägrädche dann en greesere Kreis ausgeradeld un denne Abbel in den Däg oigewiggeld.

(Dägrechde werren ääfach abgeschnitt un bei de näxschd Portion werrer mit ausgewälljerd.)

Denne Abbel wie en Grumbeerkloß schää in de Hänn drehe un so de Däg gut odrigge. Uff e großes Kucheblech mit Baggbabier, die Äbbel druffsetze. 's bassen 12 Äbbel uff so e Blech.

Moi Äbbel warn jo ned grad klä un so hot moi Däg bloss fer siwwezeh Schdigg gelangd.. Die fimf wu iwwerisch warn, hunn ich uff e rundes Quetschekucheblech gehoggt.

Uff alle Äbbel hots dann noch en Klecks Budding owwedruff gewwe, weil des äefach schää aussieht, wann die gebagg sin.

Ab eninn in de Owwe mit de Blech – Heißluft sei Dank, geht des jo alles in äänem Rutsch.

Die Äbbel baggen bei 180° e gurie Schdunn – mit Heißluft nadierlich e bisje wenischer. Muss mer hald enin gugge, ob die schunn leicht braun un gar sin. 

Hui waren die schää, wie'se so uffem Dich geschdanne hänn, zum abkälde. Änner schääner wie de Onner, 's war grad e wohrie Prachd - un erschd der herrliche Geruch.

Es Wasser iss mer in de Gosch 'zamme geloffe - un wissener was.... Ich kunnts mer ned vekneife, änner vunn denne Äbbel enaus uff de Balgon se schdelle, bloss dasser schneller kald werd un ich denne fuddere kann.

(Soviel zum innere Schwoinehund) ** ;-)  :-)  ;-)  ** 

Siwwe schdig hann ich midgenumm fer moi Momme, weil ich wääs dass die se gern esse dud.

Oooor.... wie ich donaus kumm bin, in de Schdubb hinne enin, wu'se in ährem Sessel gehockd hod, die Kuchebox uffgemach -  un dann des Schdrahle vunn de Frieda-Elisabeth gesieh hann......

"Ach Gott, was e Fräd un ....oooor sinn die schää".....Sie hod sich ball gar nimmie oikrie känne.

Do war mid ääm Schlagg die gonz Aawet vum Freidaach vegess.

Um korz node drei hotse schunn zum Kaffee geruf, kunnts gar nimmie abwade so en Abbel se schbachdele.

"So safdich de Abbel un schä knuschbrich de Däg", hot moi Frieda-Elisabeth gesaat...'s hot gebassd...... 

Wie ich moi Momme so in ährm "Abbelgligg" gesieh hann, hunn ich so for mich gedengt –  

Friejer war se jo e Dunnerkeilsie un aarisch schdreng war se aach. Manchmol hunn ichse ins Kaggaduggaland gewinschd, wonn se gar so eschlich war. 

Sie war im Kriech Owwerfeldwewel beim Rode Kreiz un sowas is hald fers Lewe drin, des hot moi Babbe immer gesaat, wonn ichem vorgejammerd hann.....

Wahrscheins hadder Reschd gehatt.

Heid, viel älder un selwer Mudder, denk ich do driwwer doch e bisje annerschd. Leicht hats die Momme jo äre gons Lewe ned gehatt un sicher hotses  aach nie bees gemännt un desweche machts mer Heit frät, se e bisje gligglich se mache –

 **un seis aach bloss mid Abbel im Schlofrock**

So hääsen die nämlich  :-)  

 

 Es i-Dübbelche fer aarische *Sießmeiler* is jo dann Sahne dezu, orrer e frischie Vanillisoß.....gelle.... 

Falls ner nobagge wollen, e gudes gelinge un lossens eich schmegge

 

Herzliche Gruß ~~die Pälzermad

 

Jetzt im Herbschd - Die Äbbel sinn reif un klar dassmer jetzerd Abbelkuche backe muss.

Nore muss mer uffbasse, ned jeder Abbel iss aach en Backabbel.

Ich back am allerliebschde mit Boskop.

Des is en zarde Abbel un e bissje seierlich.

Egal wellen Däg mer defor wählt, en Boskop kammer fer jeden Abbelkuche nemme, der werd immer gar un schmeckt äefach gut.

Fer so se esse, werd der de Meischde so sauer sinn, awwer backe dut der sich äenzichadisch.

 

Moiner Momme ährn liebschder Abbelkuche geht so:

 

 1 Kg  reife Äpfel, schälen und achteln. 

375 g Butter           gut rühren

300 g Zucker         dabei einrieseln lassen

1 P Vanillezucker

6 Eier                       nach und nach mit unterrühren

375 g Mehl  und

3 Teel. Backpulver         drübersieben und unterrühren 

Un so geht’s:

E 26'er Schpringform gut oifedde - vunn dem Riehrdäg die Hälft eninn fille.

Die Abbelschnitze schää uffem Dääg vedäle un de Reschd Däg driwwerschdreiche. 

Backe bei ca 175° - e gudie Schdunn. 

Mim'me Holzschdäbche prowiere ob kään Däg mä dro hänge bleibt. 

Wann de Kuche ferdisch iss, außem Owwe nemme,

glei aus de Form löse un uff e Kuchegitter sterze. 

3 – 4 Eßleffel Aprikoseschmär imme Pännche häs mache,

denne Kuche dodemit oischdreiche un kalt werre losse. 

Dann Puderzucker mit e bisje häser Milch un e paar Trobbe Rumaroma glattriehre 

"Awwer Owacht, die Glasur derf ned so dinn werre". 

Denne Kuche mit der Glasur iwwerziehe un trockne losse.

Schmeckt suuuberlegger.....

**Gudes Gelinge**  

Für alle Nicht - Pfälzer hier die "Translation" **gg** 

Von dem Rührteig die Hälfte in eine gefettete und mit Semmelbrösel ausgestreute Springform geben  (26 cm)

Die Apfelschnitzen auf dem Teig verteilen und den Rest Teig darüberstreichen. 

Backen bei 175° gut eine Stunde  

(Stäbchenprobe machen) es darf kein Teig mehr daran kleben. 

Ist der Kuchen fertig gebacken, herausnehmen und gleich aus der Springform lösen.

Auf ein Kuchengitter  stürzen. 

Aprikosenmarmelade in einem Topf heiss machen und den Kuchen sofort damit glasieren.

Kalt werden lassen.

Dann aus Puderzucker, Rumaroma und etwas heißer Milch eine Glasur rühren ( nicht zu dünn) und den Kuchen damit überziehn. 

~~Gutes Gelingen~~

Schmeckt superlecker.

 

 Wie häst'es doch so schä:

*An dem Kuche kännt mer sich grad rund esse zumme Abbelkärbche*

 

 

 

Mir hatten jo Heit zum Middagesse wellen gehatt, awwer wommer net alles selwer mache dut, dann ess aach nix gemach.....Wääsche, so wellen in Plastikpell un aarisch drugge war der aa.

De rischdisch Pälzer Saumaache is jo wie de Name schunn saat, imme Saumaache.

Denne muss mer sich beim Metzjer vorbeschdelle weil, der muss jo e paar Daach im Salzwasser leie, nothin werder gut ausgeschpült un zwä vunn denne drei Löcher zugebunn.Dann kann mer des Füllsel dort enin stobbe.

 

Dess Füllsel muss sorchfältisch zesammegeschdellt sinn, so dass der Saumaa, wommerne nochherd uffschneid, e bisje bröeggele duut. Mer muss halt e gut, scharf Messer hann un e bisje uffbasse beim Schneide, dasser net ausenonnerfallt.

 

Ha....genau desdeweeche machen jo Heitzudaags viele Metzjer des ferdisch Hackbrät eninn, do kanner nemmie ausenannerfalle, awwer genau des machd denne Maache a forzdrugge.

 

Echde Liebhaber peifen uff so en noochgemachde Hawwedreck, orrer määnsche, de Herr Kohl un soine Schpezies härren sowas gesse – nääää, em Lewe net - die wollen rischdischer Saumaa hunn....

 

Alla mol do's Rezept, so wiene moi Monn bei uns im Gaade for die gons Mannschaft gekocht hot.

Jo, dä war safdisch un sowas vunn guuuuud.

Die Gaadenochber hunn sich de Ranze vollgeschlaa, bisse nemmie "bapp" saa gekennt hunn.

 

Jetzt bassen uff – so geht’s:

 

Ein klänne, frische, sauwer gebuzzte Saumaache vumm Metzjer besoije

375 g magerer Schweinebauch in Wärfelcher geschnitt

375 g Schweinefleisch, aach in Wärfelcher geschnitt

375 g Brotworschtfillsel (bloss kä Hackfleischbrät odrehe losse)

1 – 2 druggene Weck vunn Vorgeschdern **g** in Milch oiwääsche un dann ausdrigge

1 kg angekochde Grumbeere (därfen net schunn gar sinn, weil die sunscht zu wääsch werrn)

        die missener e bissje kalt werre losse un aach in klänne Wärfelcher schneide

3 Aijer

2 Zwiwwele gewärfelt

1 Bund gladdi Pedersill

1-2 Knowwelochzehje

Alles dorchenonnermenge un mit Salz, Peffer, Muschkatnuss (awwer frisch vunn de Nuss geriwwe) un Majoran kräfdisch abschmegge.

 

So un jetzt kummts: am Beschde halt Ääner denne Saumaa feschd un de Anner bind zwä Löcher feschd zu, losst awwer e Schdick Gordel länger, weils nocherd aach fers ledschde Loch noch lange muss, un dodemit glei e Halderung fer de Kochlöffel gemacht werd.

 

Dann schdobbder alles eninn. Des Fillsel muss schää feschd eninngedriggt werre, demits kää Luftbloose gebt.

So un jetzt noch zubinne un denne Saumaa in en große Hawwe mit siedendem Salzwasser hänge.

 

Des Wasser in dem Hawwe muss siede (ned koche) un muss denne Maache bedecke.

Un dass der jetzt net uff de Hawweborrem sinkt un ohänge duut – dodefor schdeckt mer en große Kochlöffel, wu iwwer de Hawwerand bassd, dorch die Gordel un hängt denne Maache ins siedende Wasser.

 

Dodrin muss der donn so 2-3 Schdunne vor sich hie siede ( ned koch, weil er donn platzt und ehr donn Worschtsupp hunn, awwer kään Saumaa).....

 

Wanner gut is, kummt er uff e Brett, werd e bisje ruhe geloss un donn vorsichdisch in so zwä Zendimeder dicke Scheiwe geschnitt.

 

Dodezu gebts Sauerkraut un Grumbeerschdambes......

 

Wääsche was? - Moije saa ich demm Metzjer Bescheid, dass ich vunn de näxschd Wutz de Maache brauch....**gg**